വെനസ്വെല: കോപ്പ അമേരിക്ക അണ്ടർ 20 ചാമ്പ്യൻഷിപ്പിൽ ആവേശകരമായ ബ്രസീൽ-അർജന്റീന മത്സരം സമനിലയിൽ പിരിഞ്ഞു. മത്സരത്തിൽ ഇരുടീമുകളും ഓരോ ഗോൾ വീതം നേടി പോയിന്റുകൾ പങ്കുവെക്കുകയായിരുന്നു. ടൂർണമെന്റിൽ ഇത് രണ്ടാം തവണയാണ് അർജന്റീനയും ബ്രസീലും നേർക്കുനേർ എത്തുന്നത്. ഗ്രൂപ്പ് ഘട്ടത്തിലെ മത്സരത്തിൽ എതിരില്ലാത്ത ആറ് ഗോളുകളുടെ തകർപ്പൻ വിജയമായിരുന്നു അർജന്റീന സ്വന്തമാക്കിയിരുന്നത്. എന്നാൽ ഈ തോൽവിക്ക് കണക്കുതീർക്കാനുള്ള സുവർണാവസരമായിരുന്നു കാനറിപ്പടക്ക് രണ്ടാം മത്സരത്തിൽ ലഭിച്ചിരുന്നത്. എന്നാൽ മത്സരം സമനിലയിൽ അവസാനിക്കുകയായിരുന്നു. 

മത്സരത്തിൽ 40ാം മിനിറ്റിൽ ക്ലോഡിയോ എച്ചെവേരിയിലൂടെ അർജന്റീനയാണ്‌ ആദ്യം ഗോൾ നേടിയത്. അർജന്റീനക്ക് അനുകൂലമായി ലഭിച്ച പെനാൽറ്റി കൃത്യമായി ലക്ഷ്യത്തിൽ എത്തിച്ചാണ് താരം അർജന്റീനക്ക് ലീഡ് സമ്മാനിച്ചത്. എന്നാൽ രണ്ടാം പകുതിയിൽ ബ്രസീൽ തിരിച്ചടിക്കുകയായിരുന്നു. 78ാം മിനിറ്റിൽ റയാനിലൂടെയാണ് ബ്രസീൽ സമനില ഗോൾ നേടിയത്. വിജയഗോളിനായി അവസാന നിമിഷം വരെ മികച്ച നീക്കങ്ങൾ ഇരു ടീമുകളും നടത്തിയെങ്കിലും ലക്ഷ്യം കാണാൻ സാധിക്കാതെ പോവുകയായിരുന്നു. 

മത്സരത്തിൽ 57 ശതമാനം ബോൾ പൊസഷൻ സ്വന്തമാക്കിയ അർജന്റീന 12 ഷോട്ടുകളാണ് ബ്രസീലിന്റെ ഗോൾ പോസ്റ്റിലേക്ക് ഉതിർത്തത്. ബ്രസീൽ എട്ട് ഷോട്ടുകളും എതിർ പോസ്റ്റിലേക്ക് ഉന്നം വെച്ചു. എന്നാൽ ഇതിൽ ഇരു ടീമുകൾക്കും രണ്ട് വീതം ഷോട്ടുകളാണ് ഓൺ ടാർഗറ്റിലേക്ക് എത്തിക്കാൻ സാധിച്ചത്. 

നിലവിൽ ഫൈനൽ റൗണ്ട് ഗ്രൂപ്പിൽ ബ്രസീൽ ഒന്നാം സ്ഥാനത്തും അർജന്റീന രണ്ടാമതുമാണ് ഉള്ളത്. നാല് മത്സരങ്ങളിൽ നിന്നും മൂന്ന് ജയവും ഒരു സമനിലയും അടക്കം ഒമ്പത് പോയിന്റാണ് ഇരു ടീമുകൾക്കും ഉള്ളത്. എന്നാൽ ഗോൾ വ്യത്യസത്തിൽ മുന്നിലെത്തിയതിനാലാണ് ബ്രസീൽ ഒന്നാമത് തുടരുന്നത്. ഗ്രൂപ്പ് ഘട്ടത്തിൽ രണ്ടാം സ്ഥാനക്കാരായാണ് അർജന്റീന ഫൈനൽ റൗണ്ടിലേക്ക് മുന്നേറിയത്. നാല് മത്സരങ്ങളിൽ നിന്നും രണ്ട് വീതം വിജയവും സമനിലയും ആയി എട്ട് പോയിന്റോടെയാണ് അർജന്റീന രണ്ടാം സ്ഥാനം സ്വന്തമാക്കിയത്. ബ്രസീൽ മൂന്നാം സ്ഥാനത്തുമാണ് ഫിനിഷ് ചെയ്തത്. നാല് മത്സരങ്ങളിൽ നിന്നും രണ്ട് വീതം ജയവും തോൽവിയും ആയി ആറ് പോയിന്റാണ് ബ്രസീലിന് ഉണ്ടായിരുന്നത്.