അടുത്തിടെ അവസാനിച്ച ഇംഗ്ലണ്ടിനെതിരെയുള്ള പരമ്പരയിൽ ശ്രേയസ് അയ്യർ തകർപ്പൻ പ്രകടനമായിരുന്നു നടത്തിയിരുന്നത്. ഇപ്പോൾ താരത്തെ പ്രശംസിച്ചുകൊണ്ട് സംസാരിക്കുകയാണ് ഇംഗ്ലണ്ട് ഇതിഹാസ താരം കെവിൻ പീറ്റേഴ്സൺ. ഷോർട്ട് ബോളുകൾ നേരിടുമ്പോഴുള്ള ശ്രേയസിന്റെ സമീപനത്തെക്കുറിച്ചാണ് പീറ്റേഴ്‌സൺ സംസാരിച്ചത്. മലയാളി താരം സഞ്ജു സാംസൺ അയ്യർ ഷോർട്ട് ബോൾ കളിച്ച രീതി കണ്ട് പഠിക്കണമെന്നും മുൻ ഇംഗ്ലണ്ട് താരം പറഞ്ഞു. 

'ഒരാഴ്ച്ച പിന്നിലേക്ക് പോയാൽ മനസിലാവും. ശ്രേയസ് അയ്യർ ഇംഗ്ലണ്ടിനെതിരെയുള്ള ആദ്യ മത്സരം കളിക്കേണ്ട ആളായിരുന്നില്ല. എന്നാൽ തനിക്ക് കിട്ടിയ അവസരം അദ്ദേഹം നന്നായി ഉപയോഗപ്പെടുത്തി. ഷോർട്ട് ബോളുകൾക്കെതിരെ അവൻ നന്നായി കളിച്ചു. ഷോർട്ട് ബോളുകൾ കളിയ്ക്കാൻ ബുദ്ധിമുട്ടുള്ളൊരു താരം ഈ അവസരം കൃത്യമായി പരിഹരിച്ചു. സഞ്ജു ടി-20യിൽ ബുദ്ധിമുട്ടിയ ഇത്തരത്തിലുള്ള ഷോർട്ട് ബോളുകൾ ശ്രേയസ് കൃത്യമായി കളിച്ചു. സഞ്ജു സാംസൺ തന്റെ തെറ്റുകളിൽ നിന്നും പഠിക്കാൻ തയ്യാറായില്ല. അവൻ ഒരേ രീതിയിൽ പുറത്തായി. ബൗളർമാർ അവനെതിരെ ഉപയോഗിച്ച പ്ലാൻ മനസ്സിലാക്കാൻ സഞ്ജുവിന് സാധിച്ചില്ല. എന്നാൽ ശ്രേയസ്സിന്‌ അത് കഴിഞ്ഞു,' കെവിൻ പീറ്റേഴ്സൺ സ്റ്റാർ സ്പോർട്സിലൂടെ പറഞ്ഞു.  

ഇംഗ്ലണ്ടിനെതിരായ ഏകദിന പരമ്പരയിൽ തകർപ്പൻ പ്രകടനമായിരുന്നു അയ്യർ നടത്തിയിരുന്നത്. രണ്ട് അർദ്ധ സെഞ്ച്വറികളാണ് താരം പരമ്പരയിൽ അടിച്ചെടുത്തത്. നീണ്ട കാലങ്ങൾക്ക് ശേഷമാണ് അയ്യർ ഇന്ത്യൻ ടീമിൽ തിരിച്ചെത്തിയിരുന്നത്. തന്റെ തിരിച്ചുവരവിൽ ഗംഭീര പ്രകടനമായിരുന്നു അയ്യർ നടത്തിയത്. 

2023 ഐസിസി ഏകദിന ലോകകപ്പിൽ തകർപ്പൻ പ്രകടനം ആയിരുന്നു ശ്രേയസ് അയ്യർ നടത്തിയിരുന്നത്. ഇന്ത്യയെ ആ ടൂർണമെന്റിൽ ഫൈനലിൽ എത്തിക്കുന്നതിൽ അയ്യർ വഹിച്ച പങ്ക് വളരെ വലുതായിരുന്നു ടൂർണമെന്റിൽ 530 റൺസ് ആയിരുന്നു താരം അടിച്ചെടുത്തത്. എന്നാൽ പിന്നീട് നീണ്ട കാലത്തോളം ഇന്ത്യൻ ടീമിൽ നിന്നും അയ്യർ പുറത്താവുകയായിരുന്നു.

അതേസമയം ഇംഗ്ലണ്ടിനെതിരായ ടി-20 പരമ്പരയിൽ നിരാശജനകമായ പ്രകടനമായിരുന്നു സഞ്ജു നടത്തിയിരുന്നത്. അഞ്ചു മത്സരങ്ങളിൽ നിന്നും വെറും 51 റൺസ് മാത്രമാണ് സഞ്ജു നേടിയത്. മത്സരങ്ങളിൽ പുൾ ഷോട്ട് കളിക്കുന്നതിനിടെയാണ് സഞ്ജു പല തവണയും പുറത്തായത്. അവസാന മത്സരത്തിൽ സഞ്ജുവിന് പരുക്ക് പറ്റിയിരുന്നു. മത്സരത്തിൽ ബാറ്റ് ചെയ്യുന്നതിനിടെയാണ് സഞ്ജുവിന് പരുക്ക് പറ്റിയത്.