ഡൽഹി: ഇന്നലെയും അമേരിക്കയിൽ നിന്നുള്ള അനധികൃത ഇന്ത്യൻ കുടിയേറ്റക്കാരെ എത്തിച്ചത് കൈയിലും കാലിലും വിലങ്ങണിയിച്ചെന്നുള്ള റിപ്പോർട്ടുകൾ സ്ഥിരീകരിച്ച് മടങ്ങിയെത്തിയ യുവാവ്. പഞ്ചാബ് ഹോഷിയാർപൂർ സ്വദേശി ദൽജിത് സിം​ഗാണ് വിമാനത്തിനുള്ളിൽ വിലങ്ങും ചങ്ങലയും ഉണ്ടായിരുന്നുവെന്ന് വാർത്താ ഏജൻസിയോട് സ്ഥിരീകരിച്ചത്. ഇന്നലെ രാത്രി അമേരിക്കൻ സൈനിക വിമാനത്തിൽ എത്തിച്ച 116 പേരിൽ ഒരാളാണ് ദൽജിത് സിം​ഗ്. രാജ്യത്തിന് ഇതിനേക്കാൾ അപമാനകരമായി ഒന്നുമില്ലെന്ന വിമർശനവുമായി കോൺ​ഗ്രസ് രംഗത്തെത്തി. പ്രധാനമന്ത്രി നരേന്ദ്ര മോദിയുടെ അമേരിക്കൻ സന്ദർശനം കൊണ്ട് എന്ത് ഗുണമെന്നും കോൺഗ്രസ് എംപി മനീഷ് തിവാരി ചോദിച്ചു.

116 ഇന്ത്യൻ അനധികൃത കുടിയേറ്റക്കാരുമായി രണ്ടാമത്തെ യുഎസ് സൈനിക വിമാനം ഇന്നലെ രാത്രിയായിരുന്നു അമൃത്‍സറിലെത്തിയത്. നാടുകടത്തപ്പെട്ടവരുടെ രണ്ടാമത്തെ ബാച്ചിൽ 65 പേർ പഞ്ചാബിൽ നിന്നും, 33 പേർ ഹരിയാനയിൽ നിന്നും, എട്ട് പേർ ഗുജറാത്തിൽ നിന്നും ഉണ്ടായിരുന്നു. ഉത്തർപ്രദേശ്, ഗോവ, മഹാരാഷ്ട്ര, രാജസ്ഥാൻ എന്നിവിടങ്ങളിൽ നിന്ന് രണ്ട് പേർ വീതവും ഹിമാചൽ പ്രദേശ്, ജമ്മു കശ്മീർ എന്നിവിടങ്ങളിൽ നിന്നുള്ള ഓരോരുത്തരും വിമാനത്തിൽ ഉണ്ടായിരുന്നു. നാടുകടത്തപ്പെട്ടവർക്കായി പഞ്ചാബ്, ഹരിയാന സർക്കാരുകൾ പ്രത്യേക യാത്രാ സൗകര്യങ്ങൾ ഒരുക്കിയിരുന്നു. അമേരിക്കയിൽ നിന്നുള്ള മൂന്നാമത്തെ വിമാനം 157 നാടുകടത്തപ്പെട്ടവരുമായി ഇന്ന് രാത്രി അമൃത്സറിൽ എത്തും.

13 കുട്ടികളടക്കം 104 പേരെ വഹിച്ചുകൊണ്ട് ഫെബ്രുവരി 5 നായിരുന്നു അമേരിക്കയിൽ നിന്നുള്ള ആദ്യവിമാനം അമൃത്സറിൽ എത്തിയത്. ഇവരെ കൈകാലുകളിൽ വിലങ്ങണിയിച്ച് എത്തിച്ചതിനെ തുടർന്ന് പ്രതിഷേധമുയർന്നിരുന്നു. എന്നാൽ പ്രധാനമന്ത്രി നരേന്ദ്ര മോദിയുടെ യുഎസ് സന്ദർശനത്തോടെ കാര്യങ്ങളിൽ മാറ്റമുണ്ടാകുമെന്നായിരുന്നു പ്രതീക്ഷ. കൂടാതെ, ട്രംപുമായി മോദി നടത്തിയ കൂടിക്കാഴ്ചയുടെ പശ്ചാത്തലത്തിൽ വിലങ്ങ് ഉണ്ടാകില്ലെന്നും റിപ്പോർട്ടുകളുണ്ടായിരുന്നു. അനധികൃത കുടിയേറ്റക്കാരെ അമേരിക്ക മാന്യമായി പരി​ഗണിക്കുകയും സൈനിക വിമാനത്തിന് പകരം യാത്രാ വിമാനം നൽകുമെന്ന് പ്രതീക്ഷിക്കുകയും ചെയ്തിരുന്നു. എന്നാൽ, അമേരിക്ക പഴയപടി തന്നെ ഇന്ത്യൻ കുടിയേറ്റക്കാരോട് പെരുമാറിയത് മോദിയുടെ അമേരിക്കൻ സന്ദർശനത്തിന്‍റെ പരാജയമായാണ് പ്രതിപക്ഷം ചൂണ്ടികാട്ടുന്നത്.

A young man's return with chains and a lock sparks curiosity, while the Congress party criticizes the Modi-Trump meeting as a failure.