തിരുവനന്തപുരം: സംസ്ഥാനത്ത് നിലവില്‍ സര്‍വീസ് നടത്തികൊണ്ടിരിക്കുന്ന കെസ്ആര്‍ടിസി ബസുകളില്‍ ഭൂരിഭാഗം ബസുകളും കാലപ്പഴക്കമായതാണെന്ന് വിവരാവകാശ നിയമപ്രകാരം  ജീവനക്കാര്‍ക്ക് നല്‍കിയ മറുപടിയില്‍ അറിയിച്ചു. 4717 ബസുകളില്‍ മൂവായിരത്തിലധികവും പത്ത് വര്‍ഷങ്ങള്‍ക്കുമുകളില്‍ പഴക്കമുള്ളവയാണ്. ഇതില്‍ മതിയായ അറ്റകുറ്റപ്പണികള്‍ നടത്താതെ വര്‍ക്ക്‌ഷോപ്പുകളില്‍ കിടക്കുന്ന ബസുകളുടെ എണ്ണം 600 കവിയും. എട്ട് മുതല്‍ ഒമ്പത് വര്‍ഷം പഴക്കമുള്ള 673 ബസുകള്‍ സംസ്ഥാനത്ത് നിലവിലുണ്ട്. ഒമ്പത് മുതല്‍ പത്ത് വര്‍ഷം വരെ പഴക്കമുള്ള 857 എണ്ണവും പതിനൊന്നു മുതല്‍ പതിമൂന്ന് വര്‍ഷം പഴക്കമുള്ള 883 ബസുകളും സര്‍വീസ് നടത്തുന്നുണ്ട്. പതിമൂന്ന് മുതല്‍ പതിനഞ്ച് വര്‍ഷം വരെ പഴക്കമുള്ളതായ 891 ബസുകളും ,1261 ബസുകള്‍  നിലവില്‍ പതിനഞ്ച് വര്‍ഷങ്ങള്‍ക്കുമുകളില്‍ പഴക്കമുള്ളവയുമാണ്.

ഇടുക്കിയില്‍ ബ്രേക്ക് തകരാറിനെ തുടര്‍ന്ന് കെസ്ആര്‍ടിസി ബസ് കൊക്കയിലേക്ക് മറിഞ്ഞ് നാലുപേരുടെ മരണത്തിനിടയായത് അടുത്ത കാലത്താണ് . വര്‍ക്ക് ഷോപ്പ് അധികൃതരുടെ എണ്ണത്തിലുള്ള കുറവ് , അറ്റകുറ്റപ്പണികള്‍ നടത്തുന്നതിനാവശ്യമായ സ്ഥല സൗകര്യമില്ലായ്മ തുടങ്ങിയ പ്രശ്‌നങ്ങള്‍ പരിഹരിക്കുന്നതിനാവശ്യമായ നടപടികള്‍ സര്‍ക്കാര്‍ സ്വീകരിക്കാന്‍ വൈകുന്നതുമൂലം ജീവനക്കാര്‍ സുരക്ഷിതമല്ലാത്ത  സാഹചര്യത്തില്‍ സര്‍വീസ് നടത്താന്‍  നിര്‍ബന്ധിതരാകുന്നു . ഇത് ജീവനക്കാര്‍ക്കിടയിലും യാത്രക്കാര്‍ക്കിടയിലും ആശങ്ക വര്‍ദ്ധിപ്പിച്ചിട്ടുണ്ട്. അധികൃതരെ അറിയിച്ചിട്ടും അറ്റകുറ്റപ്പണിക്ക് എത്താന്‍ തയാറാവാത്ത വര്‍ക് ഷോപ്പുകളുമുണ്ടെന്നും പരാതിയുണ്ട്. സ്‌പെയര്‍ പാര്‍ട്‌സിന്റെ ലഭ്യത കുറവും മതിയായ ജീവനക്കാര്‍ ഇല്ലാത്തതുമാണ് അറ്റകുറ്റപ്പണികള്‍ നടത്താന്‍ കഴിയാതെ വരുന്നെന്ന് അധികൃതര്‍ ചൂണ്ടി കാണിക്കുന്നു.

സര്‍ക്കാര്‍  വിഷയത്തില്‍ ആവശ്യമായ നടപടികള്‍ കൈ കൊള്ളുന്നതിനു വേണ്ടി വാഹന തകരാര്‍ പരിഹാര രജിസ്‌ട്രേഷന്‍ ആരംഭിച്ചതായി അറിയിച്ചിട്ടുണ്ട് , ദീര്‍ഘദൂര ബസുകളാണ് കൂടുതലായും ഇത്തരം പ്രശ്‌നങ്ങളെ നേരിടുന്നത്. വാതിലുകള്‍ ഇളകിയും ബ്രേക്ക് തകരാറും മൂലം നിരവധി ബസുകളാണ് വഴിയില്‍ കുടുങ്ങി കിടക്കേണ്ടതായി വരുന്നത് . ദീര്‍ഘദൂര യാത്രക്കാര്‍ക്ക് വലിയ ബുദ്ധിമുട്ടുകളാണ് ഇത് മൂലം സംഭവിക്കുന്നത്.