ദുബൈ: റമദാനിൽ സ്വകാര്യ മേഖല ജീവനക്കാരുടെ ജോലി സമയം ദിവസേന രണ്ട് മണിക്കൂർ കുറക്കുമെന്ന ട്വീറ്റുമായി മാനവ വിഭവശേഷി, സ്വദേശിവൽക്കരണ മന്ത്രാലയം. തൊഴിലാളികളുടെ ജോലിയുടെ ആവശ്യകതകളും സ്വഭാവവും അനുസരിച്ച്, റമദാൻ മാസത്തിലെ ദൈനംദിന പ്രവൃത്തി സമയത്തിന്റെ പരിധിക്കുള്ളിൽ നിന്നുകൊണ്ട് തന്നെ കമ്പനികൾക്ക് ഫ്ലെക്സിബിൾ ആയതോ അല്ലെങ്കിൽ വർക്ക് ഫ്രം ഹോം ഉൾപ്പെടെയുള്ള സാധ്യതകൾ പരിശോധിക്കാമെന്നും മന്ത്രാലയം വ്യക്തമാക്കി.

ഞായറാഴ്ച പൊതുമേഖലാ ജീവനക്കാരുടെ റമദാൻ പ്രവൃത്തി സമയം യുഎഇ പ്രഖ്യാപിച്ചിരുന്നു. പുതിയ സമയം അനുസരിച്ച് തിങ്കള്‍ മുതല്‍ വ്യാഴം വരെ ജീവനക്കാര്‍ക്ക് മൂന്നര മണിക്കൂറും വെള്ളിയാഴ്ച ഒന്നര മണിക്കൂര്‍ സമയവും ജോലിയില്‍ കുറവുണ്ടാകും. യുഎഇ ഫെഡറല്‍ സര്‍ക്കാര്‍ ആഴ്ചയില്‍ നാലര ദിവസത്തെ പ്രവൃത്തിദിനം നടപ്പിലാക്കിയിട്ടുണ്ട്. അതിനാല്‍, റമദാന്‍ ഒഴികെയുള്ള മാസങ്ങളില്‍ ജീവനക്കാര്‍ ഒരു ദിവസം എട്ട് മണിക്കൂര്‍ ജോലി ചെയ്യുന്നു. ഇതുപ്രകാരം തിങ്കള്‍ മുതല്‍ വ്യാഴം വരെ രാവിലെ 7:30 മുതല്‍ ഉച്ചകഴിഞ്ഞ് 3:30 വരെയും വെള്ളിയാഴ്ചകളില്‍ രാവിലെ 7:30 മുതല്‍ 12:00 വരെയും പ്രവര്‍ത്തിക്കുന്നു. 

വ്യത്യസ്ത ജോലി സമയം ആവശ്യമുള്ള ജീവനക്കാര്‍ക്ക് ഇളവുകള്‍ ബാധകമാണെന്ന് ഫെഡറല്‍ അതോറിറ്റി ഫോര്‍ ഗവണ്‍മെന്റ് ഹ്യൂമന്‍ റിസോഴ്‌സസ് (ഫഹര്‍) പ്രഖ്യാപിച്ചു. ശനി, ഞായര്‍ ദിവസങ്ങളാണ് ഫെഡറല്‍, ഗവണ്‍മെന്റ് മേഖലയ്ക്ക് ഔദ്യോഗിക വാരാന്ത്യങ്ങള്‍.

സർക്കുലർ പ്രകാരം, മന്ത്രാലയങ്ങളുടെയും ഫെഡറൽ അതോറിറ്റികളുടെയും ഔദ്യോഗിക പ്രവൃത്തി സമയം തിങ്കൾ മുതൽ വ്യാഴം വരെ രാവിലെ 9 മുതൽ ഉച്ചയ്ക്ക് 2:30 വരെയും വെള്ളിയാഴ്ച രാവിലെ 9 മുതൽ ഉച്ചയ്ക്ക് 12 വരെയും ആയിരിക്കും.

മന്ത്രാലയങ്ങള്‍ക്കും ഫെഡറല്‍ ഗവണ്‍മെന്റ് ജീവനക്കാര്‍ക്കും ദൈനംദിന ജോലി സമയ പരിധികള്‍ പാലിക്കുന്നതിനൊപ്പം, വിശുദ്ധ മാസത്തില്‍ അവരുടെ അംഗീകൃത വര്‍ക്ക് അറ്റ് ഹോം ഉള്‍പ്പെടെയുള്ള ജോലി ക്രമീകരണങ്ങള്‍ മാറ്റമില്ലാതെ തുടരാം. അംഗീകൃത മാര്‍ഗ്ഗനിര്‍ദ്ദേശങ്ങളുടെ അടിസ്ഥാനത്തില്‍ മൊത്തം തൊഴിലാളികളുടെ 70 ശതമാനത്തിന് വരെ വെള്ളിയാഴ്ചകളില്‍ വര്‍ക്ക് അറ്റ് ഹോം അടക്കമുള്ള സംവിധാനങ്ങള്‍ അനുവദനീയമാണ്.

The UAE has announced reduced working hours for private sector employees during Ramadan, with a daily work schedule of approximately 2 hours less than usual.