ആയിരത്തോളം കുഞ്ഞുങ്ങൾ പരീക്ഷയെഴുതാനെത്തുന്ന കോഴിക്കോട് എളേറ്റിൽ എം ജെ ഹയർസെക്കന്‍ഡറി സ്കൂളിൽ പക്ഷേ കനപ്പെട്ട മൂകതയാണ്. പരസ്പരം കലപിലകൾ പറയാതെ ആരവങ്ങളില്ലാതെ അവർ പതിയെ ക്ലാസ് മുറികളിലേക്ക് കയറി. അവിടെ  49ാം നമ്പർ ക്ലാസ് റൂമിലെ ഒടുവിലത്തെ ബെഞ്ചിൽ ഒടുവിലത്തെ സീറ്റ് ഒഴിഞ്ഞു കിടക്കുകയാണ്. 62....07 നമ്പറുകാരൻ ഷഹബാസില്ല പരീക്ഷയെഴുതാൻ. 

ഇന്ന് അവരോടൊപ്പം പരീക്ഷയെഴുതേണ്ടതായിരുന്നു അവൻ. പഠനത്തിൽ മികവ് കാണിച്ചിരുന്നവനാണ് ഷഹബാസ്. തൊട്ടടുത്ത് കഴിഞ്ഞ മലയാളം മോഡൽ പരീക്ഷയിൽ മലയാള‍ത്തിൽ 40ൽ 35 മാർക്കുണ്ട് അവന്. ഈ ഉത്തരപേപ്പർ വാങ്ങാൻ ശനിയാഴ്ച സ്കൂളിലെത്താൻ കുട്ടികളോട് ആവശ്യപ്പെട്ടിരുന്നു എന്ന് ഓർത്തെടുക്കുന്നു അവന്റെ മലയാളം അധ്യാപിക. എന്നാൽ അന്ന് വന്നത് അവൻ ഈ ലോകത്തു നിന്നേ പോയി എന്ന വാർത്തയാണ്. സങ്കടം കടിച്ചു പിടിച്ച് അവർ പറയുന്നു. വെള്ളിയാഴ്ചയായിരുന്നു അവന്റെ ജീവനെടുത്ത അടിപിടി. 

പഠനത്തിൽ അവൻ മികവ് കാട്ടിയിരുന്നു. മിടുക്കനായിരുന്നു. നല്ല കുട്ടിയായിരുന്നു. അവ്‍റെ ഓർമകളിൽ അധ്യാപകർ വിതുമ്പുന്നു. ആകെ തകർന്ന മനസ്സുമായാണ് ഇന്ന് അവന്റെ കൂട്ടുകാർ പരീക്ഷയെഴുതാനെത്തിയിരിക്കുന്നത്. പലർക്കും പരീക്ഷക്ക് മുൻപ്  കൗൺസിലിങ് ഉൾപ്പെടെ നൽകിയിരുന്നു.  

Kerala Student Shahbaz's Death Mourned by Teachers and Friends