ജയ്പൂര്‍: രാജസ്ഥാനിലെ ദൗസയില്‍ ഹോളി ആഘോഷങ്ങളില്‍നിന്ന് വിട്ടുനിന്ന 25 വയസ്സുകാരനെ കഴുത്തുഞെരിച്ച് കൊലപ്പെടുത്തി. റാള്‍വാസ് ഗ്രാമത്തിലെ ഹന്‍സ് രാജ് ആണ് കൊല്ലപ്പെട്ടത്. ബുധനാഴ്ച രാത്രിയാണ് സംഭവം. മത്സര പരീക്ഷകള്‍ക്ക് പഠിക്കുന്നതിന്റെ ഭാഗമായി ഹന്‍സ് രാജ് ലൈബ്രറിയില്‍ ഇരിക്കുമ്പോള്‍ അശോക്, ബബ്ലു, കലുറാം എന്നിവര്‍ വരികയും നിറം പുരട്ടാന്‍ ആവശ്യപ്പെടുകയുംചെയ്തു. ഇത് വിസമ്മതിച്ചതിനാണ് യുവാവിനെ മറ്റ് മൂന്നുപേരും കൊലപ്പെടുത്തിയതെന്ന് അഡീഷണല്‍ പോലീസ് സൂപ്രണ്ട് (എ.എസ്.പി) ദിനേശ് അഗര്‍വാള്‍ പറഞ്ഞു. ഹന്‍സ് രാജ് നിറങ്ങള്‍ പുരട്ടി ആഘോഷത്തില്‍ പങ്കാളിയാകാന്‍ വിസമ്മതിച്ചപ്പോള്‍ മൂന്ന് പേര്‍ ചേര്‍ന്ന് അയാളെ ചവിട്ടുകയും ബെല്‍റ്റ് ഉപയോഗിച്ച് അടിക്കുകയും കഴുത്ത് ഞെരിച്ച് കൊല്ലുകയുമായിരുന്നു.

സംഭവത്തെത്തുടര്‍ന്ന് നീതി ആവശ്യപ്പെട്ട് ഹന്‍സ് രാജിന്റെ കുടുംബവും നാട്ടുകാരും ദേശീയപാത ഉപരോധിച്ചു. ഇരയുടെ കുടുംബത്തിന് 50 ലക്ഷം രൂപ നഷ്ടപരിഹാരം, കുടുംബത്തിലെ ഒരാള്‍ക്ക് സര്‍ക്കാര്‍ ജോലി, പ്രതികള്‍ക്ക് മാതൃകാപരമായ ശിക്ഷ നല്‍കുക തുടങ്ങിയ ആവശ്യങ്ങളാണ് പ്രതിഷേധക്കാര്‍ ഉന്നയിച്ചത്. നടപടി സ്വീകരിക്കുമെന്ന് പൊലിസ് ജനക്കൂട്ടത്തിന് ഉറപ്പ് നല്‍കിയതിനെത്തുടര്‍ന്നാണ് ഉപരോധം അവസാനിച്ചത്. ഒളിവില്‍പോയ പ്രതികള്‍ക്കായി തിരച്ചില്‍ ഊര്‍ജ്ജിതമാക്കി.

 In a shocking incident, a 25-year-old man in Rajasthan lost life for refusing to participate in Holi celebrations, highlighting the dangers of forced revelry and violence.