റിയാദ്: ഈ വര്‍ഷം ഹജ്ജ് കര്‍മം നിര്‍വഹിക്കാന്‍ ആഗ്രഹിക്കുന്ന സഊദി പൗരന്മാര്‍ക്കും പ്രവാസികള്‍ക്കും മെനിഞ്ചൈറ്റിസ് വാക്‌സിന്‍ നിര്‍ബന്ധമെന്ന് സഊദി ഹജ്ജ്, ഉംറ മന്ത്രാലയം അറിയിച്ചു. മുമ്പ്, ഈ നിബന്ധന രാജ്യത്തിന് പുറത്തുനിന്ന് എത്തുന്ന ഹജ്ജ് തീര്‍ത്ഥാടകര്‍ക്ക് മാത്രമേ ബാധകമായിരുന്നുള്ളൂ.

മെനിഞ്ചൈറ്റിസ് വാക്‌സിന്‍ എടുക്കാത്തവര്‍ക്ക് ഹജ്ജ് പാക്കേജ് ലഭിക്കില്ലെന്നും മന്ത്രാലയം അറിയിച്ചു. ആഭ്യന്തര തീര്‍ത്ഥാടകര്‍ ഹജ്ജിനു പത്ത് ദിവസം മുമ്പെങ്കിലും വാക്‌സിന്‍ സ്വീകരിച്ചിരിക്കണം.

ആഭ്യന്തര, അന്താരാഷ്ട്ര തീര്‍ത്ഥാടകരുടെ ആരോഗ്യം സംരക്ഷിച്ചു കൊണ്ട് പുണ്യ ഹജ്ജ് കര്‍മം നിര്‍വഹിക്കേണ്ടുന്നതിന്റെ പ്രാധാന്യവും മന്ത്രാലയം എടുത്തുപറഞ്ഞു. സുരക്ഷിതമായ ഹജ്ജ് സീസണ്‍ ഉറപ്പാക്കാന്‍ തീര്‍ത്ഥാടകര്‍ ഇന്‍ഫ്‌ലുവന്‍സ, കോവിഡ്19 വാക്‌സിനുകള്‍ സ്വീകരിക്കണമെന്നും ആരോഗ്യ മന്ത്രാലയത്തിന്റെ സിഹത്തി ആപ്പ് വഴി വാക്‌സിനേഷന്‍ അപ്പോയിന്റ്‌മെന്റുകള്‍ ബുക്ക് ചെയ്യണമെന്നും മന്ത്രാലയം നിര്‍ദ്ദേശിച്ചു.

രണ്ട് മാസം മുമ്പ്, ഉംറക്കായി പുറപ്പെടുന്ന യാത്രക്കാര്‍ക്കുള്ള പുതുക്കിയ ആരോഗ്യ പ്രോട്ടോക്കോളുകളുടെ ഭാഗമായി എല്ലാ ഉംറ തീര്‍ത്ഥാടകരും പുറപ്പെടുന്നതിന് കുറഞ്ഞത് 10 ദിവസം മുമ്പെങ്കിലും മെനിഞ്ചൈറ്റിസ് വാക്‌സിന്‍ എടുക്കണമെന്ന് ആരോഗ്യ മന്ത്രാലയം നിര്‍ബന്ധമാക്കിയിരുന്നു. ഫെബ്രുവരി 10 മുതല്‍ പ്രാബല്യത്തില്‍ വന്ന ഈ നിയമം ഇപ്പോള്‍ എല്ലാ ഉംറ തീര്‍ത്ഥാടകര്‍ക്കും നിര്‍ബന്ധമാണ്. മറ്റു വിവരങ്ങൾക്കായി സഊദി ആഭ്യന്തര മന്ത്രാലയത്തിന്റെ ഔദ്യോഗിക വെബ്സൈറ്റ് ശ്രദ്ധിക്കുക.