തിരൂര്‍:  ആം ആദ്മി നേതാവും പൊതുപ്രവര്‍ത്തകനുമായ സി.ആര്‍ നീലകണ്ഠന്‍ രാഷ്ട്രീയ സംഘര്‍ഷ മേഖലയായ  ഉണ്യാല്‍ അടക്കമുള്ള തീരമേഖലകള്‍ സന്ദര്‍ശിച്ചു. വര്‍ഷങ്ങളോളം കടലില്‍ പണിയെടുത്തും പ്രവാസ  ജീവിതം നയിച്ചുമുണ്ടാക്കിയ പാവങ്ങളുടെ ചെറിയ കിടപ്പാടങ്ങള്‍ ഉള്‍പ്പെടെ തകര്‍ക്കപ്പെടുന്ന അക്രമസംഭവങ്ങള്‍  ആവര്‍ത്തിക്കാതിരിക്കാന്‍ എല്ലാവരും പരിശ്രമിക്കണമെന്നു സി.ആര്‍ നീലകണ്ഠന്‍ അഭ്യാര്‍ഥിച്ചു.
പണവും  സ്വര്‍ണാഭരണങ്ങളും നഷ്ടപ്പെട്ട കുടുംബങ്ങള്‍ക്കു സര്‍ക്കാര്‍ നഷ്ടപരിഹാരം നല്‍കണമെന്നും അദ്ദേഹം ആവശ്യപ്പെട്ടു.  യഥാര്‍ഥ കുറ്റവാളികളെ നിയമത്തിനു മുന്നില്‍ കൊണ്ടുവരണം. കുറ്റവാളികള്‍ക്ക്  രാഷ്ട്രീയപാര്‍ട്ടികള്‍ സഹായം ചെയ്യരുതെന്നും സി.ആര്‍ കൂട്ടിച്ചേര്‍ത്തു. വിവാദത്തില്‍പ്പെട്ട തിരൂര്‍ രാജീവ്  ഗാന്ധി സ്മാരക സ്റ്റേഡിയത്തിലും ഇന്ധന ചോര്‍ച്ചയെത്തുടര്‍ന്നു നിരവധി കുടുംബങ്ങളുടെ കുടിവെള്ളം  മുടങ്ങിയ പയ്യനങ്ങാടിയിലും സി.ആര്‍ സന്ദര്‍ശനം നടത്തി.
ഷമീര്‍  കുറ്റൂര്‍, സെക്രട്ടറി സുകുമാരന്‍ പച്ചാട്ടിരി, മുബാറക്ക് വയനാട്, ഷബീറലി വേങ്ങര, ഷാഹുല്‍, ഫസല്‍ വെട്ടിച്ചിറ, പ്രൊഫ: സൈതലവി, അനീസ്  ദാസ് എന്നിവരും അദ്ദേഹത്തിനൊപ്പമുണ്ടായിരുന്നു.