ദുബൈ: ഹജ്ജ് സീസണിന് മുന്നോടിയായി 14 രാജ്യങ്ങളിലെ പൗരന്മാര്‍ക്കുള്ള ബിസിനസ് വിസിറ്റ് വിസകള്‍ (സിംഗിള്‍, മള്‍ട്ടിപ്പിള്‍ എന്‍ട്രി), ഇ-ടൂറിസ്റ്റ് വിസകള്‍, ഫാമിലി വിസിറ്റ് വിസകള്‍ എന്നിവയുള്‍പ്പെടെയുള്ള ഹ്രസ്വകാല വിസകള്‍ നല്‍കുന്നത് താല്‍ക്കാലികമായി സഊദി അറേബ്യ നിര്‍ത്തിവച്ചു.

2025 ഏപ്രില്‍ 13 മുതല്‍ പ്രാബല്യത്തില്‍ വരുന്ന മൊറട്ടോറിയം ഇന്ത്യ, ഈജിപ്ത്, പാകിസ്താന്‍, യെമന്‍, ടുണീഷ്യ, മൊറോക്കോ, ജോര്‍ദാന്‍, നൈജീരിയ, അള്‍ജീരിയ, ഇന്തോനേഷ്യ, ഇറാഖ്, സുഡാന്‍, ബംഗ്ലാദേശ്, ലിബിയ എന്നീ രാജ്യങ്ങളിലെ പൗരന്മാര്‍ക്കാണ് ബാധകമാകുക.

നിലവില്‍ വിസ കൈവശമുള്ള ഈ രാജ്യങ്ങളില്‍ നിന്നുള്ള യാത്രക്കാര്‍ക്ക് ഏപ്രില്‍ 13 വരെ രാജ്യത്ത് പ്രവേശിക്കാം. ഏപ്രില്‍ 29 ന് മുമ്പ് അവര്‍ രാജ്യം വിടണമെന്നും ഗള്‍ഫ് ന്യൂസ് പങ്കുവെച്ച വാര്‍ത്തയില്‍ പറയുന്നു. 

കഴിഞ്ഞ ഹജ്ജ് സീസണില്‍ തീര്‍ത്ഥാടന ആവശ്യങ്ങള്‍ക്കല്ലാത്ത വിസകള്‍ ഉപയോഗിച്ച് ധാരാളം തീര്‍ത്ഥാടകര്‍ രാജ്യത്തേക്ക് പ്രവേശിച്ചതായി റിപ്പോര്‍ട്ടുകള്‍ ഉണ്ടായിരുന്നു. ഇതിനെ തുടര്‍ന്നാണ് സഊദി സര്‍ക്കാരിന്റെ നിര്‍ണായക തീരുമാനം. 

സൗദിയിലെ തീര്‍ത്ഥാടനത്തിന്റെ സുരക്ഷയും സംഘാടനവും ഉറപ്പാക്കുന്നതിനും മികച്ച രീതിയില്‍ കാര്യങ്ങള്‍ ഏകോപിപ്പിക്കുന്നതിനുമാണ് പുതിയ നിയന്ത്രണങ്ങള്‍ ഏര്‍പ്പെടുത്തിയിരിക്കുന്നതെന്ന് സഊദി അധികൃതര്‍ പറഞ്ഞു.

കഴിഞ്ഞ ഹജ്ജ് സീസണില്‍ നിന്നും പാഠം ഉള്‍കൊണ്ടാണ് ഈ തീരുമാനം ഉണ്ടായതെന്ന് ഈജിപ്തിലെ ടൂറിസം കമ്പനികളുടെ ചേംബര്‍ അംഗമായ ബാസില്‍ അല്‍ സിസി ഒരു ടെലിവിഷന്‍ അഭിമുഖത്തില്‍ പറഞ്ഞു.

'കഴിഞ്ഞ വര്‍ഷത്തെ പ്രതിസന്ധിക്ക് കാരണമായ രാജ്യങ്ങളെ അധികാരികള്‍ തിരിച്ചറിഞ്ഞിട്ടുണ്ട്,' ഹ്രസ്വകാല വിസകള്‍ ഉപയോഗിച്ച് ഹജ്ജ് നിര്‍വഹിച്ച വ്യക്തികളെ ഉന്നം വച്ചുകൊണ്ട് അദ്ദേഹം പറഞ്ഞു.

ഉംറ യാത്രാ ലോജിസ്റ്റിക്‌സുമായി ബന്ധപ്പെട്ട പുതുക്കിയ മാര്‍ഗ്ഗനിര്‍ദ്ദേശങ്ങള്‍ സൗദി ഉദ്യോഗസ്ഥര്‍ പുറപ്പെടുവിച്ചു. ഉംറ വിസ വിതരണം എല്ലാ വര്‍ഷവും ദുല്‍ഹജ്ജ് 14 ന് ആരംഭിച്ച് ശവ്വാല്‍ 1 ന് അവസാനിക്കും. ദുല്‍ ഹിജ്ജ 14 മുതല്‍ ശവ്വാല്‍ 15 വരെ ഉംറ തീര്‍ഥാടകര്‍ക്ക് രാജ്യത്തേക്ക് പ്രവേശനം അനുവദിക്കും. മതപരമായ യാത്രകള്‍ക്ക് ഉംറ വിസ നേടേണ്ടതിന്റെ പ്രാധാന്യം രാജ്യം ആവര്‍ത്തിച്ച് ഊന്നിപ്പറയുകയും അനുസരിക്കാത്തവര്‍ക്ക് നിയമപരമായ പ്രത്യാഘാതങ്ങള്‍ നേരിടേണ്ടിവരുമെന്ന് മുന്നറിയിപ്പ് നല്‍കുകയും ചെയ്തിട്ടുണ്ട്.

Saudi Arabia has halted issuing tourist, business, and visit visas to citizens of 14 countries, including India, affecting travel plans and international business relations. Find out the latest details.