കോഴിക്കോട്: വിര്‍ച്വല്‍ അറസ്റ്റ് തട്ടിപ്പിലൂടെ വയോധികനില്‍ നിന്നും പണം തട്ടി. കോഴിക്കോട് എലത്തൂര്‍ സ്വദേശി ചാക്കുണ്ണി നമ്പ്യാരാണ് തട്ടിപ്പിന് ഇരയായത്. 8.80 ലക്ഷം രൂപയാണ് തട്ടിപ്പു സംഘം ഇദ്ദേഹത്തില്‍ നിന്നും തട്ടിയത്. മുംബൈയില്‍ നിന്നുള്ള ഉന്നത പൊലിസ് ഉദ്യോഗസ്ഥനാണെന്ന് പറഞ്ഞാണ് പണം തട്ടിയത്. ജോലി ചെയ്തിരുന്ന സമയത്ത് മനുഷ്യകടത്ത് നടത്തി എന്ന പേരിലാണ് തട്ടിപ്പു സംഘം വയോധികനെ ബന്ധപ്പെട്ടത്.

കേസിന് ആവശ്യമായ ബാങ്ക് രേഖകള്‍ അയച്ചു നല്‍കാന്‍ ആവശ്യപ്പെട്ട സംഘം ഇതുപയോഗിച്ച് ഇദ്ദേഹത്തിന്റെ അക്കൗണ്ടില്‍ നിന്നും പണം തട്ടുകയായിരുന്നു. ജനുവരി മാസത്തിലാണ് തട്ടിപ്പ് നടന്നത്. മുംബൈയില്‍ ജോലി ചെയ്തിരുന്ന കാലത്ത് ഇയാള്‍ക്ക് മനുഷ്യകടത്തുമായി ബന്ധമുണ്ടെന്ന് പറഞ്ഞാണ് ഫോണ്‍ സന്ദേശം ലഭിച്ചത്. ഡെപ്യൂട്ടി കമ്മീഷണര്‍ എന്നു പറഞ്ഞാണ് തട്ടിപ്പ് സംഘം ബന്ധപ്പെട്ടത്. കേസില്‍ നിന്ന് ഒഴിവാക്കണമെങ്കില്‍ ബാങ്ക് രേഖകള്‍ അയച്ചു കൊടുക്കണമെന്നും ആവശ്യപ്പെട്ടിരുന്നു. ഇതിന്റെ അടിസ്ഥാനത്തിലാണ് ബാങ്ക് രേഖകള്‍ അയച്ചു നല്‍കിയത്. 

രേഖകള്‍ അയച്ചതോടൊണ് പണം നഷ്ടപ്പെട്ടത്. ബന്ധുക്കളടക്കം ഇക്കാര്യം അറിഞ്ഞപ്പോഴാണ് താന്‍ തട്ടിപ്പിന് ഇരയായതായി ഇയാള്‍ക്ക് മനസ്സിലായത്. എലത്തൂര്‍ പൊലിസില്‍ പരാതി നല്‍കിയിട്ടുണ്ട്. പൊലിസ് കേസെടുത്ത് അന്വേഷണം ആരംഭിച്ചു. തെലങ്കാനയിലുള്ള ബാങ്ക് അക്കൗണ്ടിലേക്കാണ് പണം പോയിട്ടുള്ളതന്നാണ് പ്രാഥമിക അന്വേഷണത്തില്‍ പൊലിസ് കണ്ടെത്തിയിരിക്കുന്നത്.