കോട്ടയം:  എരുമേലിയില്‍ മകളുടെ പ്രണയവുമായി ബന്ധപ്പെട്ട് വീട്ടിലുണ്ടായ തര്‍ക്കത്തില്‍ അച്ഛന്‍ പെട്രോളൊഴിച്ചു തീ കൊളുത്തി. അച്ഛനും അമ്മയും രണ്ടുമക്കളുമടങ്ങുന്നതാണ് കുടുംബം. സംഭവത്തില്‍ ഇളയമകന്‍ അഖിലേഷ് ഒഴികെ എല്ലാവരും മരിച്ചു. ശ്രീനിപുരം പുത്തന്‍പുരയ്ക്കല്‍ സത്യപാലന്‍, ഭാര്യ ശ്രീജ, മകള്‍ അഞ്ജലി എന്നിവരാണ് ദാരുണമായി മരിച്ചത്. ശ്രീജ സംഭവസ്ഥലത്തു വച്ചും മറ്റു രണ്ടുപേര്‍ കോട്ടയം മെഡിക്കല്‍ കോളജില്‍ വച്ചുമാണ് മരിച്ചത്.

വെള്ളിയാഴ്ച 12 മണിയോടെയാണ് സംഭവം. മകള്‍ ഇതര ജാതിയിലുള്ള യുവാവിനെ പ്രണയിച്ചതിലുള്ള എതിര്‍പ്പായിരുന്നു ഈ ദാരുണമായ മരണമെന്നാണ് പൊലിസിന്റെ പ്രാഥമിക നിഗമനം. വെള്ളിയാഴ്ച രാവിലെ അഞ്ജലിയെ വിവാഹം കഴിക്കണമെന്നു പറഞ്ഞ് ഒരു യുവാവ് വീട്ടില്‍ എത്തിയിരുന്നു. പിന്നീട് വാക്ക് തര്‍ക്കമുണ്ടാവുകയും ഈ യുവാവിനെ മകള്‍ വിവാഹം കഴിച്ചാല്‍ താന്‍ ജീവനൊടുക്കുമെന്നും പെണ്‍കുട്ടിയുടെ അച്ഛന്‍ ഭീഷണിയും മുഴക്കിയിരുന്നു. ഈ വിവരവും പൊലിസിനു ലഭിച്ചിട്ടുണ്ട്.

ഇയാള്‍ പോയ ശേഷമാണ് വീട്ടില്‍ വഴക്കുണ്ടായതെന്നും പിന്നീട് തീ ഉയരുന്നത് കണ്ടെന്നും അയല്‍വാസികള്‍ പറയുന്നു. വീടിന്റെ വാതില്‍ അടച്ച നിലയിലായിരുന്നു. സമീപവാസികളും അഗ്നിരക്ഷാസേനയും ചേര്‍ന്ന് തീ അണച്ചെങ്കിലും വീടിന്റെ ഉള്‍വശവും വൈദ്യുതി വയറുകളും മേല്‍ക്കൂരയിലെ ഷീറ്റുമെല്ലാം കത്തിനശിച്ചിരുന്നു. പൊള്ളലേറ്റു രക്ഷപ്പെട്ട മകന്‍ മാത്രമാണ് ഏക ദൃക്‌സാക്ഷി. ചികത്സയിലായതിനാല്‍ മകന്റെ മൊഴിയെടുക്കാന്‍ പൊലിസിനു കഴിഞ്ഞിട്ടില്ല. അഖിലേഷിന്റെ മൊഴി എടുത്താലേ എന്തെങ്കിലും വ്യക്തത വരൂ എന്നാണ് പൊലിസ് പറയുന്നത്.