കണ്ണൂര്‍: ഹൈന്ദവ ക്ഷേത്രങ്ങളിലെ പണം സര്‍ക്കാര്‍ എടുക്കുകയാണെന്ന സംഘ്പരിവാര്‍ പ്രചാരണം തള്ളി മുഖ്യമന്ത്രി പിണറായി വിജയന്‍. ക്ഷേത്രങ്ങളിലെ പണം സംസ്ഥാന സര്‍ക്കാര്‍ എടുക്കുന്നില്ലെന്നും അത്തരത്തിലുള്ള പ്രചാരണം ശുദ്ധനുണയാണെന്നും മുഖ്യമന്ത്രി പറഞ്ഞു. മക്രേരി ശ്രീ സുബ്രഹമണ്യസ്വാമി ക്ഷേത്ര തീര്‍ഥാടന ടൂറിസം പദ്ധതി ഉദ്ഘാടനം ചെയ്യുകയായിരുന്നു പിണറായി വിജയന്‍. 

കഴിഞ്ഞ ഒമ്പത് വര്‍ഷം എടുത്താല്‍ 600 കോടിയോളം രൂപ വിവിധ ദേവസ്വങ്ങള്‍ക്കും അവിടങ്ങളില്‍ നടപ്പാക്കിയ പദ്ധതികള്‍ക്കുമായി സംസ്ഥാന സര്‍ക്കാര്‍ ലഭ്യമാക്കിയിട്ടുണ്ട്. തിരുവിതാംകൂര്‍ ദേവസ്വം ബോര്‍ഡിന് 145 കോടി, കൊച്ചിന്‍ ദേവസ്വം ബോര്‍ഡിന് 26 കോടി, മലബാര്‍ ദേവസ്വം ബോര്‍ഡിന് 252 കോടി, ശബരിമല മാസ്റ്റര്‍ പ്ലാനിന് 84 കോടി, ശബരിമല ഇടത്താവളത്തിന് 116 കോടി, ശബരിമല സാനിറ്റേഷന്‍ സൊസൈറ്റിക്ക് 20 കോടി രൂപയും അനുവദിച്ചിട്ടുണ്ട്. മലബാര്‍ ദേവസ്വം ജീവനക്കാരുടെ ശമ്പളത്തിനായി കഴിഞ്ഞ സാമ്പത്തിക വര്‍ഷം 25 കോടി രൂപയാണ് വകയിരുത്തിയത്. ഉത്തര മലബാറിലെ ക്ഷേത്രങ്ങളിലെ ആചാരസ്ഥാനികള്‍, കോലധാരികള്‍ തുടങ്ങിയവര്‍ക്കുള്ള പ്രതിമാസ ധനസഹായ പദ്ധതിയുടെ ഗുണഫലങ്ങള്‍ രണ്ടായിരത്തോളം പേര്‍ക്കാണ് ലഭ്യമാകുന്നത്. ഈ സാമ്പത്തിക വര്‍ഷം അതിനായി അഞ്ചേകാല്‍ കോടി രൂപയാണ് വകയിരുത്തിയത്. സംസ്ഥാന സര്‍ക്കാര്‍ ക്ഷേത്രങ്ങള്‍ക്ക് വകയിരുത്തുന്ന ചെലവുകളില്‍ ചിലതാണ് ഇവിടെ സൂചിപ്പിച്ചത്. വസ്തുതകള്‍ മനസിലാക്കുന്നതിനാണ് ഇത്തരം കണക്കുകള്‍ അവതരിപ്പിച്ചതെന്നും സംസ്ഥാന സര്‍ക്കാര്‍ ക്ഷേത്രങ്ങളിലെ പണം എടുക്കുന്നില്ലെന്നും മുഖ്യമന്ത്രി പറഞ്ഞു. നാടിന്റെ സമാധാന അന്തരീക്ഷം സംരക്ഷിക്കുന്നതിനും സഹോദര്യം ഊട്ടി ഉറപ്പിക്കുന്നതിനും കഴിയുന്നവയാണ് ആരാധനാലയങ്ങള്‍. നാടിന്റെ പൊതുസ്വത്തായ ആരാധനാലയങ്ങള്‍ സംരക്ഷിക്കുകയും അഭിവൃദ്ധിപ്പെടുത്തുകയും ചെയ്യുക എന്നതാണ് സംസ്ഥാന സര്‍ക്കാരിന്റെ നയമെന്നും മുഖ്യമന്ത്രി കൂട്ടിച്ചേര്‍ത്തു.

ക്ഷേത്രങ്ങളുടെ സ്വത്ത് എടുക്കുന്നില്ലെന്ന് നേരത്തെ സര്‍ക്കാര്‍ നിയമസഭയില്‍ രേഖാമൂലം അറിയിച്ചിരുന്നു.

Chief Minister Pinarayi Vijayan said that government not taking money from temples