കൊച്ചി: നടന്‍ ഷൈന്‍ ടോം ചാക്കോക്കെതിരെ പരാതിയുമായി പുതുമുഖ നടിയായ അപര്‍ണാ ജോസും. നടി വിന്‍സി അലോഷ്യസിന്റെ പരാതി ശരിയാണെന്നും സൂത്രവാക്യം സിനിമയുടെ സെറ്റില്‍വച്ച് ഷൈന്‍ തന്നോടും മോശമായി പെരുമാറിയെന്നാണ് നടിയുടെ ആരോപണം. തീര്‍ത്തും ലൈംഗികചുവയോടെയുള്ള മോശമായ സംസാരമായിരുന്നു ഷൈനിന്റേതെന്നും ഷൂട്ടിങ്ങിനിടയില്‍ ഇത് വലിയ ബുദ്ധിമുട്ടുണ്ടാക്കിയെന്നും അപര്‍ണ.

താനും കൂടെ ഇരിക്കുമ്പോഴാണ് ഷൈന്‍ വെള്ള പൊടി മേശപ്പുറത്തേക്ക് തുപ്പിയത്. വിന്‍സിയുടെ അനുഭവം ശരിയാണെന്നും സാധാരണ ഒരാള്‍ ഇടപെടുന്ന പോലെ അല്ല ഷൈന്‍ പെരുമാറുന്നതെന്നും ശരീരഭാഷയിലും സംസാരത്തിലും വല്ലാത്ത എനര്‍ജിയുണ്ടായിരുന്നുവെന്നും പരസ്പരം ബന്ധമില്ലാതെയാണ് സംസാരിക്കുകയെന്നും അപര്‍ണ.

സ്ത്രീകളുണ്ടെങ്കില്‍ അശ്ലീലം കലര്‍ന്ന രീതിയിലുമാണ് സംസാരിക്കുന്നത്. സിനിമയിലെ ഐസി അംഗത്തോട് പരാതി പറഞ്ഞിരുന്നുവെന്നും തന്റെ പരാതിയില്‍ ഉടന്‍ തന്നെ ക്രൂ പരിഹാരം കാണുകയും ചെയ്തു. പിറ്റേദിവസത്തെ സീനുകള്‍ തലേദിവസം തന്നെ ചിത്രീകരിച്ച് തന്നെ സുരക്ഷിതമായി പറഞ്ഞയക്കുകയും ചെയ്തു. നാട്ടിലായിരുന്നെങ്കില്‍ നിയമനടപിട സ്വീകരിച്ചേനെയെന്നും ചലച്ചിത്ര താരസംഘടനയായ അമ്മയ്ക്ക് വിവരം കൈമാറിയെന്നും അപര്‍ണ ജോസ് പറഞ്ഞു.