തിരുവനന്തപുരം: സംസ്ഥാനത്ത് ഇന്നും പരക്കെ ബോംബ് ഭീഷണി. മുഖ്യമന്ത്രിയുടെ ഓഫിസ്,  ട്രാന്‍സ്‌പോര്‍ട്ട് കമ്മീഷണറുടെ ഓഫിസ്, നെടുമ്പാശ്ശേരി വിമാനത്താവളം എന്നിവിടങ്ങളിലാണ് ഇന്ന് ബോംബ് ഭീഷണി ഉണ്ടായിരിക്കുന്നത്. ഇമെയില്‍ വഴിയാണ് ഭീഷണി സന്ദേശം വന്നതെന്നാണ് റിപ്പോര്‍ട്ട്. രണ്ട് ദിവസത്തിനിടെ എട്ട് ഭീഷണി സന്ദേശങ്ങളാണ് ഇതിനകം ലഭിച്ചിരിക്കുന്നത്.  ബോംബ് സ്‌ക്വാഡും ഡോഗ് സ്‌ക്വാഡും സ്ഥലത്ത് വിശദമായ പരിശോധന നടത്തുകയാണ്. 

ഇന്നലേയും സംസ്ഥാനത്ത് ബോംബ് ഭീഷണി ഉണ്ടായിരുന്നു. തിരുവനന്തപുരം സെന്‍ട്രല്‍ റെയില്‍വേ സ്റ്റേഷനിലും വിമാനത്താവളത്തിലുമായിരുന്നു ഭീഷണ സന്ദേശം ലഭിച്ചത്.  റെയില്‍വേ സ്‌റ്റേഷനെതിരായ ഭീഷണി സന്ദേശം സിറ്റി ട്രാഫിക് കണ്‍ട്രോളിലേക്കാണ് എത്തിയത്. ബോംബ് സ്‌ക്വാഡും ഡോഗ് സ്‌ക്വാഡും സ്ഥലത്ത് വിശദമായ പരിശോധന നടത്തിയിരുന്നു. 

തിരുവനന്തപുരം വിമാനത്താവളത്തിലും സമാനമായ ബോംബ് ഭീഷണി സന്ദേശം ലഭിച്ചിരുന്നു. മാനേജറുടെ ഇ-മെയിലേക്കാണ് ഭീഷണി സന്ദേശമെത്തിയത്. ഇന്നലെ ഉച്ചയോടെയാണ് വിമാനത്താവളത്തിലേക്ക് സന്ദേശമെത്തിയത്. സന്ദേശത്തിന്റെ പശ്ചാത്തലത്തില്‍ വിമാനത്താവളത്തില്‍ പരിശോധന ശക്തമാക്കി. 

അതിന് മുന്‍പത്തെ ദിവസം തിരുവനന്തപുരത്ത് രണ്ട് ആഡംബര ഹോട്ടലുകളില്‍ വ്യാജ ബോംബ് ഭീഷണിയുണ്ടായിരുന്നു. ശനി രാവിലെ 11 ഓടെസെക്രട്ടറിയറ്റിന് സമീപത്തുള്ള ഹില്‍ട്ടല്‍ ഹോട്ടലിലും ആക്കുളം പാലത്തിനുസമീപത്തുള്ള ഗോകുലം ഗ്രാന്‍ഡ് ഹോട്ടലിലുമാണ് വ്യാജ ബോംബ് ഭീഷണികളെത്തിയത്. ബോംബ് സ്‌ക്വാഡ് പരിശോധിച്ചെങ്കിലും ഒന്നും കണ്ടെത്താനായില്ല. മെയില്‍ വഴിയാണ് രണ്ടിടത്തും സന്ദേശമെത്തിയത്.  

വഞ്ചിയൂരിലെ ജില്ലാ കോടതിയില്‍ ബോംബ് വച്ചിട്ടുണ്ടെന്ന് വെള്ളിയാഴ്ച സന്ദേശം വന്നിരുന്നു. ഇതും ഇമെയില്‍ വഴിയാണ് എത്തിയയത്. 
കോടതിയുടെ ഔദ്യോഗിക മെയിലില്‍ വെള്ളിയാഴ്ച രാവിലെയാണ് വൈകിട്ട് സ്ഫോടനം നടക്കുമെന്ന ഭീഷണി സന്ദേശം എത്തിയത്. പൊലിസ് ബോംബ് സ്‌ക്വാഡിന്റെ സഹായത്തോടെ പരിശോധന നടത്തി. എന്നാല്‍ ഒന്നും കണ്ടെത്താനായില്ല. 

കഴിഞ്ഞ രണ്ട് മാസത്തിനിടെ വിവിധ സര്‍ക്കാര്‍ ഓഫിസുകളില്‍ വ്യാജ ബോംബ് ഭീഷണികളുമായി ബന്ധപ്പെട്ട് അഞ്ച് കേസുകളാണ് സൈബര്‍ ക്രൈം പൊലിസ് രജിസ്റ്റര്‍ ചെയ്തിട്ടുള്ളത്.