മനാമ: ഈ വര്‍ഷത്തെ ആദ്യ പാദത്തിലെ കേസ് കണക്കുകള്‍ പുറത്തുവിട്ട് ബഹ്‌റൈന്‍ പ്രത്യേക അന്വേഷണ യൂണിറ്റ്. മോശം പെരുമാറ്റവും പീഡന ശ്രമവും ഉള്‍പ്പെടെ 17 പരാതികളാണ് യൂണിറ്റിന് ലഭിച്ചതെന്ന് ആക്ടിംഗ് അറ്റോര്‍ണി ജനറലും എസ്.ഐ.യു മേധാവിയുമായ മുഹമ്മദ് ഖാലിദ് അല്‍ ഹസ്സ പറഞ്ഞു. 

'തങ്ങളുടെ മുന്നിലെത്തിയ എല്ലാ കേസുകളിലും ആവശ്യമായ നടപടി സ്വീകരിച്ചു. എസ്.ഐ.യു പരാതിക്കാരുടെയും സാക്ഷികളുടെയും മൊഴികള്‍ കേട്ടു. പൊതു സുരക്ഷാ സേനയിലെ പ്രതികളെന്ന് സംശയിക്കപ്പെടുന്നവരെയും ചോദ്യം ചെയ്തു. ഏഴു പ്രതികളെ ഫോറന്‍സിക്, മെഡിസിന്‍ വിഭാഗത്തിലേക്ക് റഫര്‍ ചെയ്തു.' ഖാലിദ് അറിയിച്ചു.

മോശമായി പെരുമാറിയെന്ന പരാതിയിന്മേലുള്ള അന്വേഷണം യൂണിറ്റ് പൂര്‍ത്തിയാക്കി. അന്വഷേണത്തില്‍ പ്രതിയെന്ന് കണ്ടെത്തിയ വ്യക്തിയെ കോടതിയിലേക്ക് റഫര്‍ ചെയ്തു. യൂണിറ്റിന്റെ നിയമങ്ങളും ചട്ടങ്ങളും അനുസരിച്ചാണ് നടപടി കൈകൊണ്ടത്.