മലയാളികള്‍ക്ക് ഡബിള്‍ ഡക്കര്‍ ട്രെയിനില്‍ യാത്ര ചെയ്യാന്‍ സാധിച്ചേക്കും. കേരളത്തിലേക്ക് ഡബിള്‍ ഡെക്കര്‍ ട്രെയിന്‍ വൈകാതെയെത്തും. തമിഴ്‌നാട്ടിലേക്ക് നിലവിലുള്ള ഡബിള്‍ ഡെക്കര്‍ ട്രെയിന്‍ കേരളത്തിലേക്ക് നീട്ടാനുള്ള ആലോചനയിലാണ് ഇന്ത്യന്‍ റെയില്‍വേ. 

തമിഴ്‌നാട്ടില്‍ നിലവില്‍ മൂന്ന് ഡബിള്‍ ഡെക്കര്‍ ട്രെയിനുകള്‍ സര്‍വീസ് നടത്തുന്നുണ്ട്. ഇതില്‍ ബെംഗളൂരു  കോയമ്പത്തൂര്‍ ഉദയ എക്‌സ്പ്രസ്, മധുര  ദിണ്ടിഗല്‍  പൊള്ളാച്ചി ട്രെയിന്‍ എന്നിവയില്‍ ഒന്നാകും പാലക്കാട്ടേക്ക് നീട്ടുക. പൊള്ളാച്ചി ട്രെയിന്‍ പാലക്കാട്ടേക്കു നീട്ടുന്നതിനാണ് റെയില്‍വേ പ്രഥമ പരിഗണന നല്‍കുന്നതെന്നാണ് റിപ്പോര്‍ട്ട്. കഴിഞ്ഞവര്‍ഷം തന്നെ ഡബിള്‍ ഡെക്കര്‍ ട്രെയിന്‍ ട്രയല്‍ റണ്‍ കേരളത്തില്‍ പൂര്‍ത്തിയായിരുന്നു.

ഇന്ത്യയില്‍ നേരത്തെ തന്നെ സര്‍വീസ് തുടങ്ങിയിരുന്നെങ്കിലും ഡബിള്‍ ഡെക്കര്‍ ട്രെയിനുകള്‍ കേരളത്തിന് ലഭിച്ചിരുന്നില്ല. ആദ്യഘട്ടത്തില്‍ തിരുവനന്തപുരം മുതല്‍ മധുരൈ വരെയുള്ള പാതയില്‍ ഡബിള്‍ ഡെക്കര്‍ ട്രെയിനുകള്‍ ഓടിക്കാനാകുമോയെന്ന് റെയില്‍വേ പരിശോധിച്ചിരുന്നു. എന്നാല്‍ ഡബിള്‍ ഡെക്കര്‍ ട്രെയിനുകള്‍ക്ക് അനുയോജ്യമായ പാതയില്ലെന്ന് കണ്ടതോടെ പദ്ധതി ഉപേക്ഷിക്കുകയായിരുന്നു. സംസ്ഥാനത്തെ പല റെയില്‍ പാലങ്ങളും സാധാരണ ട്രെയിനുകള്‍ക്ക് കടന്നുപോകാന്‍ പാകത്തിലുള്ളതാണ്. ഇത് മാറ്റാന്‍ വലിയ ചെലവാകും. പകരം കൂടുതല്‍ ഘടനാപരമായ മാറ്റങ്ങള്‍ വരുത്താതെ തന്നെ കോയമ്പത്തൂര്‍ പാലക്കാട് റൂട്ടില്‍ ഡബിള്‍ ഡെക്കറുകള്‍ ഓടിക്കാമെന്നാണ് സൂചന.