ബാംഗ്ലൂർ: റോയൽ ചലഞ്ചേഴ്‌സ് ബെംഗളൂരു താരം ദേവ്ദത്ത് പടിക്കൽ ഐപിഎല്ലിൽ നിന്നും പുറത്തായി. ഹാംസ്ട്രിംഗിന് പരുക്കേറ്റത്തിന് പിന്നാലെയാണ് പടിക്കൽ ഐപിഎല്ലിൽ നിന്നും പുറത്തായത്. പടിക്കലിന് പകരക്കാരനായി മായങ്ക് അഗർവാളിനെയാണ് ആർസിബി ടീമിലെത്തിച്ചത്. ഈ സീസണിൽ ആർസിബിക്കായി മിന്നും പ്രകടനമായിരുന്നു പടിക്കൽ നടത്തിയിരുന്നത്. ആർ‌സി‌ബിക്കായി 10 മത്സരങ്ങളിൽ നിന്നും 247 റൺസാണ് പടിക്കൽ നേടിയത്. രണ്ട് അർദ്ധ സെഞ്ച്വറികളും താരം നേടിയത്. അതുകൊണ്ട് തന്നെ പടിക്കലിനെ പോലുള്ള താരത്തിന്റെ അഭാവം വരും മത്സരങ്ങളിൽ ആർസിബിക്ക് കനത്ത തിരിച്ചടിയായിരിക്കും നൽകുക. 

പടിക്കലിന് പകരമെത്തുന്ന മായങ്ക് അഗർവാളിന്റെ പരിചയ സമ്പത്ത് ആർസിബിക്ക് കരുത്തേകുമെന്നാണ് പ്രതീക്ഷിക്കുന്നത്. ഐപിഎല്ലിൽ 127 മത്സരങ്ങളിൽ നിന്നും 2661 റൺസാണ് അഗർവാൾ നേടിയിട്ടുള്ളത്.   ഒരു സെഞ്ച്വറിയും 13 അർദ്ധ സെഞ്ച്വറിയും താരം സ്വന്തമാക്കിയിട്ടുണ്ട്. 

ഈ സീസണിൽ സ്വപ്ന തുല്യമായ മുന്നേറ്റമാണ് ബെംഗളൂരു നടത്തികൊണ്ടിരിക്കുന്നത്. എട്ട് വിജയങ്ങളുമായി 16 പോയിന്റോടെ പട്ടികയിൽ രണ്ടാം സ്ഥാനത്താണ് ആർസിബി. ഈ സീസണിൽ ബെംഗളൂരുവിന്റെ ഓരോ വിജയത്തിനും വലിയ സവിശേഷതകൾ ഉണ്ടായിരുന്നു. 

സീസണിലെ ആദ്യ മത്സരത്തിൽ നിലവിലെ ചാമ്പ്യന്മാരായ കൊൽക്കത്ത നൈറ്റ് റൈഡേഴ്സിനെ വീഴ്ത്തിയാണ് ബെംഗളൂരു തുടക്കം കുറിച്ചത്. രണ്ടാം മത്സരത്തിൽ ചെന്നൈ സൂപ്പർ കിങ്സിനെയും ആർസിബി പരാജയപ്പെടുത്തി. 17 വർഷങ്ങൾക്ക് ശേഷം ഇതാദ്യമായിട്ടാരുന്നു ചെപ്പോക്കിന്റെ മണ്ണിൽ ആർസിബി ചെന്നൈയെ കീഴടക്കിയത്.

എന്നാൽ മൂന്നാം മത്സരത്തിൽ ഗുജറാത്ത് ടൈറ്റൻസിനോട് ബെംഗളൂരു പരാജയപ്പെട്ടിരുന്നു. പിന്നീട് വാംഖഡെയിൽ മുംബൈ ഇന്ത്യൻസിനെതിരെയുള്ള മത്സരം വിജയിച്ചുകൊണ്ട് ആർസിബി തിരിച്ചുവരികയായിരുന്നു. ഈ സീസണിൽ മൂന്ന് മത്സരങ്ങളിലാണ് ആർസിബി പരാജയപ്പെട്ടത്. നാളെ ലഖ്‌നൗ സൂപ്പർ ജയന്റ്സിനെതിരെയാണ് ബെംഗളൂരുവിന്റെ അടുത്ത മത്സരം. ലഖ്‌നൗവിന്റെ തട്ടകമായ ഏകാന സ്റ്റേഡിയത്തിലാണ് മത്സരം നടക്കുക. 

Devdutt Padikkal Ruled Out Of IPL 2025 Due To Injury