ജമ്മു: ഓപറേഷന്‍ സിന്ദൂറിന് പിന്നാലെ അതിര്‍ത്തിയില്‍ നടന്ന പാക് ഷെല്ലാക്രമണത്തില്‍ രൂക്ഷ പ്രതികരണവുമായി പി.ഡി.പി നേതാവും ജമ്മു കശ്മീര്‍ മുന്‍മുഖ്യമന്ത്രിയുമായ മെഹബൂബ മുഫ്തി. തീരാപ്പകകളില്‍ എരിയുന്നത് നിസ്സഹായരായ സാധാരണ മനുഷ്യരാണെന്ന് അവര്‍ എക്‌സില്‍ കുറിച്ചു. കവര്‍ന്നെടുക്കപ്പെട്ട ഈ ബാല്യങ്ങള്‍ ഏത് വാക്കുകള്‍ക്കും പ്രകടിപ്പിക്കാനാവാത്ത നോവാണെന്നും കഴിഞ്ഞ ദിവസം പാകിസ്ഥാന്‍ നടത്തിയ ഷെല്ലാക്രമണത്തില്‍ കൊല്ലപ്പെട്ട കുഞ്ഞുങ്ങളുടെ ചിത്രം പങ്കുവെച്ച് അവര്‍ കൂട്ടിച്ചേര്‍ത്തു.

'ഭയാനകമായ പഹല്‍ഗാം ആക്രമണത്തിനുശേഷം ദുരന്തത്തിന്റെ ഏറ്റവും വലിയ ആഴം  കണ്ടു കഴിഞ്ഞെന്നാണ് ഞാന്‍ കരുതിയത്. എന്നാല്‍ ഇന്ന് ഇന്ത്യ-പാകിസ്ഥാന്‍ സംഘര്‍ഷത്തിന്റെ ക്രോസ്ഫയറില്‍ കൊല്ലപ്പെട്ട നിഷ്‌കളങ്കരായ ഈ കുഞ്ഞുങ്ങളുടെ ചിത്രം കണ്ടപ്പോള്‍ മോശമായ അനുഭവങ്ങള്‍ ഇനിയുമേറെയുണ്ടെന്ന് എനിക്ക് തോന്നുന്നു. പ്രതികാരങ്ങള്‍ക്ക് അവസാനമില്ലെന്നിരിക്കെ നിസ്സഹായരായ സാധാരണക്കാരാണ് അതിനുള്ള വില നല്‍കേണ്ടി വരുന്നത്. ജീവന്‍ കവര്‍ന്നെടുക്കപ്പെട്ടതും മുറിവേറ്റതുമായ ബാല്യങ്ങള്‍ ഏത് വാക്കുകളിലും പ്രകടിപ്പിക്കാന്‍ കഴിയാത്ത നോവാണ്' അവര്‍ എക്‌സില്‍ കുറിച്ചു. 

After the horrific Pahalgam attack I thought I had seen the depths of tragedy. But today as I looked at the haunting image of innocent children killed in the crossfire of India-Pakistan tension I realized the worst may still lie ahead. When vengeance knows no end it is the… pic.twitter.com/1cQ9oDN9g5

— Mehbooba Mufti (@MehboobaMufti) May 7, 2025

ജമ്മുകശ്മിരിലെ പഹല്‍ഗാമില്‍ കുടുംബത്തോടൊപ്പമെത്തിയ വിനോദ സഞ്ചാരികളെ ഏപ്രില്‍ 22നു കൂട്ടക്കൊലചെയ്ത ഭീകരര്‍ക്ക് കൃത്യം പതിനഞ്ചാം ദിവസം തന്നെ ഇന്ത്യ അതിശക്ത തിരിച്ചടി നല്‍കിയിരുന്നു. പഹല്‍ഗാമില്‍ പുരുഷന്‍മാരെ തെരഞ്ഞുപിടിച്ച് ഭീകരര്‍ വെടിവച്ചുകൊന്നതോടെ വിധവകളായ രണ്ട് ഡസനോളം വനിതകള്‍ക്കുള്ള ആദരവായി 'ഓപറേഷന്‍ സിന്ദൂര്‍' എന്ന പേരില്‍ നടത്തിയ പ്രത്യാക്രമണത്തില്‍ ലഷ്‌കര്‍ കമാന്‍ഡര്‍മാര്‍ ഉള്‍പ്പെടെ 70ലേറെ പേര്‍ കൊല്ലപ്പെട്ടു. 60 പേര്‍ക്കു പരുക്കുണ്ട്. 

പിന്നാലെ പാകിസ്ഥാന്‍ അതിര്‍ത്തിയില്‍ നടത്തിയ ഷെല്ലാക്രമണത്തില്‍ കുഞ്ഞുങ്ങള്‍ ഉള്‍പെടെ 15 പേര്‍ കൊല്ലപ്പെട്ടിരുന്നു.