നമ്മുടെ വീട്ടില്‍ പതിവായുണ്ടാകാറുള്ള പച്ചക്കറികളില്‍ ഒന്നാണ് വെണ്ടയ്ക്ക. വെണ്ടയ്ക്ക വച്ച് പലതരം കറികളും വിഭവങ്ങളും ഉണ്ടാക്കാറുണ്ട് നമ്മള്‍. എന്നാല്‍ വെണ്ടയ്ക്ക മുറിക്കുമ്പോഴുണ്ടാവുന്ന വഴുവഴുപ്പ് പലര്‍ക്കും പ്രശ്‌നമുള്ള ഒരു കാര്യം തന്നെയാണ്. ഈ വഴുവഴുപ്പ് കൂടിയാല്‍ ഇത് രുചിയെയും ബാധിക്കും. അതുകൊണ്ട് വഴുവഴുപ്പില്ലാതെ വെണ്ടയ്ക്ക എങ്ങനെ മുറിച്ചെടുക്കാം എന്നു നോക്കാം. 

ആദ്യം തന്നെ നമ്മള്‍ വെണ്ട എടുത്ത് കഴുകും. ഇതു തന്നെയാണ് ആദ്യമായി ശ്രദ്ധിക്കേണ്ടതും. അതായത് പാചകം ചെയ്യുന്നതിനു തൊട്ടുമുമ്പ് വെണ്ടയ്ക്ക കഴുകരുത്. കുറച്ച് നേരത്തേ ഇതു കഴുകി വയ്ക്കണം. വെള്ളവും നന്നായി ഇതില്‍ നിന്നു പോവണം. എന്നിട്ടു മാത്രം മുറിക്കുക. 

കഴുകിയ വൃത്തിയാക്കിയ ശേഷം വൃത്തിയുള്ള ഒരു തുണി ഉപയോഗിച്ച് വെണ്ടയ്ക്ക് തുടച്ചെടുക്കുക. ഈര്‍പ്പമുണ്ടെങ്കില്‍ പാകം ചെയ്യുമ്പോള്‍ ഇവതമ്മില്‍ ഒട്ടിപ്പിടിക്കാനും സാധ്യതയുണ്ട്. അളവും ശ്രദ്ധിക്കുക. ഒരേ വലുപ്പത്തില്‍ മുറിച്ചെടുക്കുക. നീളത്തിലാണെങ്കിലും വട്ടത്തിലാണെങ്കിലും.  അപ്പോള്‍ വേവും ഒരുപോലെ കിട്ടും. 

വെണ്ടയ്ക്ക മുറിക്കുമ്പോള്‍ അതിന്റെ തലയും വാലും മുറിച്ചു കളയുക. വെണ്ട മുറിക്കുമ്പോള്‍ കത്തിയില്‍ വഴുവഴുപ്പുണ്ടെങ്കില്‍ നാരങ്ങാനീര് പുരട്ടിയാല്‍ മതിയാവും. പാചകം ചെയ്യുമ്പോഴും ഒട്ടിപ്പിടിക്കുന്നുണ്ടെങ്കില്‍ അല്‍പം തൈരോ നാരങ്ങയോ ചേര്‍ത്തു കൊടുത്താല്‍ മതി. ഇത് രുചിയും കൂട്ടും.