ലണ്ടൻ: ജൂൺ 20-നാണ് ഇന്ത്യയുടെ  ഇംഗ്ലണ്ട് പര്യടനം ആരംഭിക്കുന്നത്. ഈ സാഹചര്യത്തിൽ ഇം​ഗ്ലണ്ടിനെതിരായ ടെസ്റ്റ് സീരീസിൽ വിരാട് കോഹ്ലിയെ ക്യാപ്റ്റനാക്കണമെന്ന് അഭിപ്രായപ്പെട്ട് രം​ഗത്തെത്തിയിരിക്കുകയാണ് മുൻ ഇംഗ്ലീഷ് ക്യാപ്റ്റൻ മൈക്കൽ വോൺ. വിരാട് കോഹ്ലി ടെസ്റ്റ് ക്രിക്കറ്റിൽ നിന്ന് വിരമിക്കാൻ സന്നദ്ധത അറിയിച്ച സാഹചര്യത്തിലാണ് വോണിന്റെ പ്രസ്താവന. 

"ഞാനാണ് ഇന്ത്യയുടെ സ്ഥാനത്തെങ്കിൽ, ഇംഗ്ലണ്ടിനെതിരെയുള്ള ടെസ്റ്റ് സീരീസിൽ വിരാട് കോഹ്ലിയെ ക്യാപ്റ്റനാക്കുമായിരുന്നു. ശുഭ്മാൻ ഗില്ലിനെ വൈസ് ക്യാപ്റ്റനായി നിയമിക്കുകയും ചെയ്യുമായിരുന്നു," മൈക്കൽ വോൺ എക്സിൽ കുറിച്ചു. ഇംഗ്ലണ്ട് പര്യടനത്തിൽ ടീമിനെ നയിക്കാൻ വിരാട് കോഹ്ലി സന്നദ്ധത അറിയിച്ചെങ്കിലും കോച്ച് ​ഗൗതം ​ഗംഭീർ താൽക്കാലിക നായകൻ എന്ന നിർദേശത്തെ എതിർത്തതായി റിപ്പോർട്ടുകളുണ്ടായിരുന്നു. 

ഈ സംഭവത്തിന് പിന്നാലെയാണ് വിരാട് കോഹ്ലി ടെസ്റ്റ് ക്രിക്കറ്റിൽ നിന്ന് വിരമിക്കാനുള്ള താൽപ്പര്യം ബിസിസിഐയെ അറിയിച്ചതായി വാർത്തകൾ വന്നത്. രോഹിത് ശർമ ടെസ്റ്റ് ക്രിക്കറ്റിൽ നിന്ന് വിരമിച്ചതിന് പിന്നാലെ, കോഹ്ലിയും ടെസ്റ്റ് ക്രിക്കറ്റിൽ നിന്ന് വിരമിക്കുന്നത് ടീമിനെ ദുർബലപ്പെടുത്തുമെന്ന് ബിസിസിഐ ആശങ്കപ്പെടുന്നുണ്ട്. അതിനാൽ, ഇംഗ്ലണ്ട് പര്യടനത്തിൽ കളിക്കാൻ ബിസിസിഐ കോഹ്ലിയോട് അഭ്യർത്ഥിച്ചെങ്കിലും, അദ്ദേഹം ഇതുവരെ വ്യക്തമായ ഒരു പ്രതികരണം നൽകിയിട്ടില്ല.

ഇംഗ്ലണ്ടിലെ സീമിംഗ് പിച്ചുകളിൽ കോഹ്ലിക്ക് അത്ര നല്ല റെക്കോർഡല്ല ഉള്ളത്. ഇംഗ്ലണ്ടിൽ കളിച്ച 17 ടെസ്റ്റുകളിലെ 33 ഇന്നിംഗ്സുകളിൽ 1,096 റൺസാണ് കോഹ്ലിയുടെ സമ്പാദ്യം. ഇതിൽ രണ്ട് സെഞ്ചുറികളും അഞ്ച് അർദ്ധസെഞ്ചുറികളും ഉൾപ്പെടുന്നു. ഇംഗ്ലണ്ടിൽ അദ്ദേഹത്തിന്റെ ബാറ്റിംഗ് ശരാശരി 33.21 മാത്രമാണ്.

2018-ലെ ഇംഗ്ലണ്ട് പര്യടനത്തിൽ രണ്ട് സെഞ്ചുറികളും മൂന്ന് അർദ്ധസെഞ്ചുറികളും ഉൾപ്പെടെ 59.30 ശരാശരിയിൽ 583 റൺസ് നേടിയ കോഹ്ലി പ്ലെയർ ഓഫ് ദി സീരീസ് പുരസ്കാരം നേടിയിരുന്നു. എന്നാൽ, 2014-ലെ ഇംഗ്ലണ്ട് പര്യടനത്തിൽ ജെയിംസ് ആൻഡർസന്റെ സ്വിംഗ് ബോളിംഗിനെ നേരിടാൻ കഴിയാതെ, 10 ഇന്നിംഗ്സുകളിൽ 134 റൺസ് മാത്രമാണ് കോഹ്ലി നേടിയത്. 39 റൺസായിരുന്നു അദ്ദേഹത്തിന്റെ ഉയർന്ന സ്കോർ.

A former England captain has sparked debate with a social media post suggesting that virat kohli would be his top choice for captaincy in the England tour.