കൊച്ചി: ദിനംപ്രതി ഒരുലക്ഷത്തോളം  പേര്‍ യാത്രചെയ്യുന്ന കൊച്ചി മെട്രോയുടെ സ്റ്റേഷനുകള്‍ക്കൊപ്പം പേര് ചേര്‍ക്കാന്‍ കമ്പനികള്‍ക്കിടയില്‍ മത്സരം. ആവശ്യക്കാര്‍ ഏറിയതോടെ മെട്രോയും പിന്നോട്ടില്ല. തിരക്കേറിയ സൗത്ത് സ്റ്റേഷന് ഒപ്പം പേര് ചേര്‍ക്കണമെങ്കില്‍ 53  ലക്ഷം രൂപയാണ് പ്രതിവര്‍ഷം നിരക്ക് നിശ്ചയിച്ചത്.

25 മെട്രോ സ്റ്റേഷനുകളില്‍ 18 എണ്ണത്തിന്റേയും പേരിന്റെ അവകാശം കമ്പനികള്‍ നേടിക്കഴിഞ്ഞു. ഏഴ് എണ്ണമാണ്  കോ ബ്രാന്‍ഡിങ്ങിനായി ഒരുങ്ങിയിരിക്കുന്നത്. സൗത്ത് സ്റ്റേഷനുപുറമേ തൃപ്പൂണിത്തുറ, എം.ജി റോഡ്, വൈറ്റില, കലൂര്‍, മഹാരാജാസ് കോളജ്, കടവന്ത്ര എന്നിവയ്ക്കാണ് നിരക്ക് നിശ്ചയിച്ചിരിക്കുന്നത്.

എം.ജി റോഡ്, വൈറ്റില, കലൂര്‍, മഹാരാജാസ് കോളജ് എന്നിവയ്ക്ക് 42 ലക്ഷം രൂപ വീതവും കടവന്ത്രയ്ക്ക് 37 ലക്ഷം രൂപയും തൃപ്പൂണിത്തുറ ടെര്‍മിനലിന് 30 ലക്ഷം രൂപയുമാണ് നിരക്ക്. 

സ്റ്റേഷന്‍ പേരിനൊപ്പം കമ്പനിയുടെ പേര് ചേര്‍ക്കുന്ന കോ ബ്രാന്‍ഡിങ്, സ്റ്റേഷനുകളുടെ എന്‍ട്രി/എക്‌സിറ്റ് പോയിന്റുകളില്‍ എല്‍.ഇ.ഡി സ്‌ക്രീനുകളിലും ട്രെയിനുകള്‍ക്കുള്ളിലും സ്റ്റേഷനുകളിലും ദിശാ ഭൂപടങ്ങളിലും പ്രദര്‍ശിപ്പിക്കും. ലൈസന്‍സിക്ക് പരസ്യങ്ങള്‍ക്കായി 10 ബോര്‍ഡുകള്‍ ഉള്‍പ്പെടുന്ന അഞ്ച് സ്റ്റേഷന്‍ പില്ലറുകളും നല്‍കും.
 
ട്രെയിനുകള്‍ക്കുള്ളിലെ അനൗണ്‍സ്‌മെന്റ് വഴി ഒരു ദിവസം കുറഞ്ഞത് 480 തവണയെങ്കിലും കോബ്രാന്‍ഡിങ് പേരുകള്‍ ഉപയോഗിച്ച് സ്റ്റേഷനുകളെ തിരിച്ചറിയാന്‍ സഹായിക്കുന്നുണ്ടെന്നും കെ.എം.ആര്‍.എല്‍ വ്യക്തമാക്കി. 

ഇതുവരെ കോബ്രാന്‍ഡിങ്ങിലൂടെ കൂടുതല്‍ വരുമാനം ഉണ്ടാക്കിയത് ആലുവ മെട്രോസ്റ്റേഷനാണ്. ഫെഡറല്‍ ബാങ്കാണ് ഈ സ്റ്റേഷന്‍ സ്വന്തമാക്കിയത്.