കുവൈത്ത് സിറ്റി: കടൽ വഴി കഞ്ചാവ് കടത്തിയ അഞ്ച് ഇറാനിയൻ പൗരൻമാർക്ക് വധശിക്ഷ വിധിച്ച് കുവെെത്ത് കോടതി. 176 കിലോഗ്രാം കഞ്ചാവ് കടൽ വഴി കുവൈത്തിലേക്ക് കടത്തിയതിനാണ് ക്രിമിനൽ കോടതി വധശിക്ഷ വിധിച്ചത്. ‌

ആഭ്യന്തര മന്ത്രാലയത്തിലെ ഡ്രഗ് കൺട്രോൾ ജനറൽ ഡിപ്പാർട്ട്‌മെൻ്റിലെയും (ഡിസിജിഡി) കോസ്റ്റ് ഗാർഡിലെയും ഉദ്യോഗസ്ഥരാണ് ഇറാനികളെ അറസ്റ്റ് ചെയ്തത്. അവരെ പിന്നീട് പബ്ലിക് പ്രോസിക്യൂഷന് റഫർ ചെയ്യുകയും അവിടെ അവർ ചോദ്യം ചെയ്യലിൽ മയക്കുമരുന്ന് കടത്തുകയായിരുന്നുവെന്ന് സമ്മതിക്കുകയും ചെയ്തു. ഡിസിജിഡി ഉദ്യോഗസ്ഥർ പ്രതികളെ കുവൈത്തിൻ്റെ പ്രാദേശിക ജല അതിർത്തിയിലേക്ക് 13 ചാക്കുകളിലായി പിടിച്ചെടുത്ത മയക്കുമരുന്നുമായി ഒരു ബോട്ടുവഴി പ്രവേശിക്കുമ്പോൾ പിടികൂടി എന്നാണ് കേസ് റിപ്പോർട്ട്. 26 അടി നീളമുള്ള ക്രൂയിസ് ബോട്ട് മുഖേനയാണ് ഇവര്‍ മയക്ക് മരുന്ന് കടത്താന്‍ ശ്രമിച്ചത്.

അതേസമയം രാജ്യത്തെ താമസ തൊഴിൽ നിയമങ്ങൾ ലംഘിച്ച 400-ലധികം വിദേശികളെ കുവൈത്ത് അധികൃതർ അറസ്റ്റ് ചെയ്തു. രാജ്യത്തെ ആറ് ഗവർണറേറ്റുകളിലായി ഒമ്പത് ദിവസം നീണ്ട സുരക്ഷാ പരിശോധനകളുടെ ഭാഗമായാണ് അറസ്റ്റ്. 

റെസിഡൻഷ്യൽ പ്രദേശങ്ങൾ, ഫാമുകൾ, എഞ്ചിനീയറിംഗ് കമ്പനികൾ എന്നിവിടങ്ങളിലാണ് റെയ്ഡുകൾ നടത്തിയതെന്ന് അധികൃതർ അറിയിച്ചു. തൊഴിലാളികളെ നിയന്ത്രിക്കാനും നിയമവിരുദ്ധ താമസക്കാരെ കണ്ടെത്താനും ലക്ഷ്യമിട്ടുള്ള സംയോജിത സുരക്ഷാ പദ്ധതിയുടെ ഭാഗമായി ഏപ്രിൽ 30 മുതൽ മെയ് 9 വരെയാണ് പരിശോധന കാമ്പെയ്‌നുകൾ നടന്നതെന്ന് കുവൈത്ത് ആഭ്യന്തര മന്ത്രാലയം വ്യക്തമാക്കി.

രാജ്യത്തുടനീളം നിയമവിരുദ്ധ പ്രവർത്തനങ്ങൾക്കെതിരെ കർശന നടപടി സ്വീകരിച്ചുവരികയാണെന്ന് മന്ത്രാലയം മുന്നറിയിപ്പ് നൽകി, നിയമലംഘകർക്കും അവരുടെ തൊഴിലുടമകൾക്കുമെതിരെ കർശന നിയമനടപടികൾ സ്വീകരിക്കുമെന്നും അധികൃതർ അറിയിച്ചിട്ടുണ്ട്.