ഡൽഹി: ഇന്ത്യൻ വിക്കറ്റ് കീപ്പർ ബാറ്റർ കെഎൽ ഇന്ത്യൻ ടി-20 ടീമിലേക്ക് തിരിച്ചെത്തുമെന്ന് റിപ്പോർട്ടുകൾ. ഐപിഎല്ലിൽ ഡൽഹി ക്യാപ്പിറ്റൽസിനു വേണ്ടി നടത്തിയ മികച്ച പ്രകടനങ്ങൾക്ക് പിന്നാലെയാണ് രാഹുലിനെ വീണ്ടും കുട്ടിക്രിക്കറ്റിന്റെ ഫോർമാറ്റിലേക്ക് ബിസിസിഐ പരിഗണിക്കാൻ ഒരുങ്ങുന്നതെന്നാണ് ടൈംസ് ഓഫ് ഇന്ത്യ റിപ്പോർട്ട് ചെയ്യുന്നത്. 2022 ടി-20 ലോകകപ്പ് സെമി ഫൈനലിൽ ഇംഗ്ലണ്ടിനെതിരെയാണ് രാഹുൽ അവസാനമായി ഇന്ത്യയ്ക്കായി ടി-20യിൽ കളിച്ചത്. ഇനി ബംഗ്ലാദേശിനെതിരെയാണ് ഇന്ത്യക്ക് ടി-20 പരമ്പര ഉള്ളത്.

എന്നാൽ നിലവിലെ ഇന്ത്യ പാകിസ്താൻ സംഘർഷങ്ങളുടെ പശ്ചാത്തലത്തിൽ ബംഗ്ലാദേശിൽ നടക്കുന്ന ഈ പരമ്പരയിലും ഇന്ത്യ കളിക്കില്ലെന്ന റിപ്പോർട്ടുകളും നിലനിൽക്കുന്നുണ്ട്. അതിർത്തിയിൽ നിലനിൽക്കുന്ന സംഘർഷങ്ങൾക്കിടയിലെ ചില സംഭവവികാസങ്ങളെത്തുടർന്നാണ് ഈ പര്യടനം റദ്ദാക്കാൻ സാധ്യതയുള്ളതെന്നാണ് ലഭിക്കുന്ന വിവരങ്ങൾ. ഓഗസ്റ്റിൽ ബംഗ്ലാദേശിലെ ധാക്കയിലെ ഷേർ ഇ ബംഗ്ലാ നാഷണൽ സ്റ്റേഡിയത്തിലും ചാറ്റോഗ്രാമിലെ ബിർ ശ്രേഷ്ഠോ ഫ്ലൈറ്റ് ലെഫ്റ്റനന്റ് മതിയുർ റഹ്മാൻ സ്റ്റേഡിയത്തിലുമാണ് മത്സരങ്ങൾ നടക്കുക, പരമ്പരയിൽ മൂന്ന് വീതം ഏകദിനങ്ങളും ടി20 മത്സരങ്ങളും ആണ് ഉള്ളത്. 

അതേസമയം ഈ സീസണിൽ ഡൽഹിക്ക് വേണ്ടി 11 മത്സരങ്ങളിൽ നിന്ന് 493 റൺസാണ് താരം ഇതുവരെ നേടിയിട്ടുള്ളത്. ഗുജറാത്ത് ടൈറ്റൻസിനെതിരായ അവസാന മത്സരത്തിൽ സെഞ്ച്വറി നേടി രാഹുൽ തിളങ്ങിയിരുന്നു. മത്സരത്തിൽ 65 പന്തിൽ പുറത്താവാതെ 114 റൺസാണ് രാഹുൽ സ്വന്തമാക്കിയത്. 14 ഫോറുകളും നാല് സിക്സുകളും അടങ്ങുന്നതായിരുന്നു താരത്തിന്റെ ഇന്നിംഗ്സ്.

എന്നാൽ മത്സരം ഡൽഹി പരാജയപ്പെടുകയായിരുന്നു. മത്സരത്തിൽ ആദ്യം ബാറ്റ് ചെയ്ത ഡൽഹി ക്യാപിറ്റൽസ് നിശ്ചിത 20 ഓവറിൽ 3 വിക്കറ്റ് നഷ്ടത്തിൽ 199 റൺസെന്ന വൻ സ്കോർ സ്വന്തമാക്കിയെങ്കിലും, അതിന് മറുപടിയായി ഗുജറാത്ത് ടൈറ്റൻസ് 19 ഓവറിൽ വിക്കറ്റ് നഷ്ടമില്ലാതെ വിജയലക്ഷ്യം നേടുകയായിരുന്നു.

ഐപിഎല്ലിൽ ഇതിനോടകം തന്നെ മൂന്ന് ടീമുകൾ പ്ലേ ഓഫ് ഉറപ്പിച്ചു കഴിഞ്ഞു. പഞ്ചാബ് കിങ്‌സ്, റോയൽ ചലഞ്ചേഴ്‌സ് ബെംഗളൂരു, ഗുജറാത്ത് ടൈറ്റൻസ് എന്നീ ടീമുകളാണ് പ്ലേ ഓഫ് യോഗ്യത നേടിയത്. നാലാമതായി പ്ലേ ഓഫിൽ ഇടം നേടാൻ മുംബൈ ഇന്ത്യൻസും ഡൽഹി ക്യാപ്പിറ്റൽസുമാണ് ഇനി ശക്തമായ പോരാട്ടം നടക്കുന്നത്. നാളെയാണ് ഡൽഹിയും മുംബൈയും തമ്മിലുള്ള പോരാട്ടം നടക്കുന്നത്.

Report says KL Rahul will back Indian Ṭ20 Team after a long time