അഹമ്മദാബാദ്: ഐപിഎല്ലില്‍ ഇന്നലെ ഡല്‍ഹിക്കെതിരായ മത്സരത്തിലെ വിജയത്തോടെ പ്ലേഓഫ് യോഗ്യത ഉറപ്പിച്ചിരിക്കുകയാണ് ഗുജറാത്ത് ടൈറ്റന്‍സ്. 10 വിക്കറ്റിനായിരുന്നു  ഡല്‍ഹിക്കെതിരെ ടൈറ്റന്‍സിന്റെ വിജയം. ഈ വിജയം മറ്റ് രണ്ട് ടീമുകള്‍ക്കും ഗുണം ചെയ്തു. ഇന്നലെ ടൈറ്റന്‍സ് വിജയിച്ചതോടെ റോയല്‍ ചലഞ്ചേഴ്‌സ് ബെംഗളൂരു, പഞ്ചാബ് കിംഗ്‌സ് എന്നീ ടീമുകള്‍ ആദ്യ നാലില്‍ ഇടം നേടി.

12 മത്സരങ്ങളില്‍ 9 വിജയങ്ങളോടെ 18 പോയിന്റ് നേടിയ ഗുജറാത്ത് പോയിന്റ് പട്ടികയില്‍ ഒന്നാം സ്ഥാനത്ത് എത്തി. പഞ്ചാബ് കിംഗ്‌സും റോയല്‍ ചലഞ്ചേഴ്‌സ് ബെംഗളൂരുവും 12 മത്സരങ്ങളില്‍ നിന്ന് 17 പോയിന്റുകള്‍ വീതം നേടി ആദ്യ നാലിലെ സ്ഥാനങ്ങള്‍ ഉറപ്പിച്ചു. ബാക്കിയുള്ള ഒരു സ്ഥാനത്തിനായി മുംബൈ ഇന്ത്യന്‍സും ഡല്‍ഹി ക്യാപിറ്റല്‍സും മത്സരിക്കും. 

11 വര്‍ഷത്തെ കാത്തിരിപ്പിനൊടുവിലാണ് പഞ്ചാബ് കിംഗ്‌സ് പ്ലേ ഓഫിലെത്തുന്നത്. 2014ലാണ് പഞ്ചാബ് അവസാനമായി പ്ലേഓഫില്‍ എത്തിയത്; ആ വര്‍ഷം അവര്‍ ഫൈനലില്‍ കൊല്‍ക്കത്തയോട് പരാജയപ്പെട്ടിരുന്നു. അതേസമയം, ഐപിഎല്ലില്‍ ആദ്യമായി മൂന്ന് ടീമുകളെ പ്ലേഓഫിലെത്തിച്ച ആദ്യ ക്യാപ്റ്റന്‍ എന്ന റെക്കോര്‍ഡ് പഞ്ചാബ് ക്യാപ്റ്റ്ന്‍ ശ്രേയസ് അയ്യര്‍ സ്വന്തമാക്കി. 

കെ.എല്‍ രാഹുലിന്റെ സെഞ്ചുറിക്ക് അതേ നാണയത്തില്‍ മറുപടി നല്‍കിയായിരുന്നു ടൈറ്റന്‍സിന്റെ വിജയം. ഓപണര്‍ കെ.എല്‍ രാഹുലിന്റെ സെഞ്ചുറിയുടെ കരുത്തിലായിരുന്നു ഡല്‍ഹി മികച്ച സ്‌കോര്‍ കണ്ടെത്തിയത്. ആദ്യം ബാറ്റു ചെയ്ത ഡല്‍ഹി നിശ്ചിത ഓവറില്‍ മൂന്ന് വിക്കറ്റ് നഷ്ടത്തില്‍ 199 റണ്‍സ് നേടി. മറുപടിക്കിറങ്ങിയ ഗുജറാത്ത് 19 ഓവറില്‍ വിക്കറ്റൊന്നും നഷ്ടപ്പെടാതെ ലക്ഷ്യം മറികടക്കുകയായിരുന്നു. ഔട്ടാകാതെ സെഞ്ചുറി നേടിയ സായ് സുദര്‍ശനും ശുഭ്മാന്‍ ഗില്ലുമായിരുന്നു ഗുജറാത്തിനെ വിജയത്തിലെത്തിയത്. 61 പന്തില്‍ നാലു സിക്‌സറും 12 ഫോറും ഉള്‍പ്പെടെയായിരുന്നു സായ് സുദര്‍ശന്‍ സെഞ്ചുറി നേടിയത്. 53 പന്തില്‍ 93 റണ്‍സാണ് ഗില്‍ നേടിയത്. 

ഓപണറായി എത്തി 65 പന്തില്‍ നാലു സിക്‌സറും 14 ഫോറും ഉള്‍പ്പെടെ 112 റണ്‍സാണ് രാഹുല്‍ ഡല്‍ഹിയുടെ സ്‌കോര്‍ ബോര്‍ഡിലേക്ക് കൂട്ടിച്ചേര്‍ത്ത്. കൂടെയുണ്ടായിരുന്ന ഫാഫ് ഡുപ്ലസിസ് 10 പന്തില്‍ അഞ്ച് റണ്‍സ് മാത്രമാണ് നേടിയത്. 19 പന്തില്‍ അഭിഷേക് പോറല്‍ 30 റണ്‍സ് നേടിയപ്പോള്‍ ക്യാപ്റ്റന്‍ അക്‌സര്‍ പട്ടേല്‍ 25 റണ്‍സാണ് സ്‌കോര്‍ ബോര്‍ഡിലേക്ക് സംഭാവന ചെയ്തത്. അര്‍ഷദ് ഖാന്‍, പ്രസിദ് കൃഷ്ണ, സായി കിഷോര്‍ എന്നിവര്‍ ഗുജറാത്തിനായി ഓരോ വിക്കറ്റുകള്‍ വീഴ്ത്തി.

The Titans secured a crucial win against Delhi, while Punjab and RCB confirmed their playoff spots. With these developments, the focus shifts to the intense battle for the fourth position, as teams vie for a chance to advance in the tournament.