ഒരുപാട് ഇതിഹാസ താരങ്ങളെ കളി പഠിപ്പിച്ച പരിശീലകനാണ് പെപ് ഗ്വാർഡിയോള. ഇപ്പോൾ തന്റെ കീഴിൽ കളിച്ചവരിൽ ഏറ്റവും മികച്ച രീതിയിൽ പാസുകൾ നൽകുന്ന താരം ആരാണെന്ന് പറയുകയാണ് ഗ്വാർഡിയോള. ലയണൽ മെസിക്ക് ശേഷം മികച്ച രീതിയിൽ പാസ് നൽകാൻ കഴിവുള്ള താരമായി കെവിൻ ഡി ബ്രൂയ്‌നെയാണ് ഗ്വാർഡിയോള തെരഞ്ഞെടുത്തത്. 

''ഒന്നാമതായി മെസിയാണ് ഉള്ളത് ഞാൻ കെവിനെ രണ്ടാമതായി തെരഞ്ഞെടുക്കും. ഞാൻ കണ്ടിട്ടുള്ളതിൽ ഏറ്റവും മികച്ച താരമാണ് മെസി. ടീമിന് വേണ്ടി മെസി ടീമിന് നൽകുന്ന സ്റ്റാറ്റിസ്റ്റിക്സ്, ഗോളുകൾ, അസിസ്റ്റുകൾ എന്നിവ വളരെ മികച്ചതാണ്. അതുകൊണ്ട് അദ്ദേഹം ക്ലബ്ബിന്റെ ഏറ്റവും മികച്ച താരമായി മാറിയത്. അദ്ദേഹം വളരെ പ്രത്യേക താരമാണ്'' പെപ് ഗ്വാർഡിയോള ബിബിസിയോട് പറഞ്ഞു.

ഈ സീസൺ അവസാനത്തോട് കൂടി ഡി ബ്രൂയ്ൻ മാഞ്ചസ്റ്റർ സിറ്റി വിടുമെന്ന് അടുത്തിടെ അറിയിച്ചിരുന്നു. ഡി ബ്രൂയ്നെ പോലുള്ള ഒരു മികച്ച താരത്തിന്റെ അഭാവം വരും സീസണിൽ മാഞ്ചസ്റ്റർ സിറ്റിയുടെ മധ്യനിരയിൽ വലിയൊരു വിടവ് തന്നെയായിരിക്കും സൃഷ്ടിക്കുക.

2015 സീസണിൽ ജർമൻ ക്ലബ് വോൾഫ്സ്ബർഗിൽ നിന്നുമാണ് കെവിൻ ഡി ബ്രൂയ്ൻ മാഞ്ചസ്റ്റർ സിറ്റിയുടെ തട്ടകത്തിൽ എത്തിയത്. ഇത്തിഹാദിന്റെ മണ്ണിൽ ഡി ബ്രൂയ്ൻ ലോകത്തെ ഏറ്റവും മികച്ച മിഡ്ഫീൽഡർമാരിൽ ഒരാളായി മാറുകയായിരിക്കുന്നു. ടീമിനൊപ്പം 16 കിരീടങ്ങളാണ് ഡി ബ്രൂയ്ൻ നേടിയിട്ടുള്ളത്. ഇതിൽ ആറ് ഇംഗ്ലീഷ് പ്രീമിയർ ലീഗ് കിരീടങ്ങളും ഒരു ചാമ്പ്യൻസ് ലീഗ് കിരീടവും ഡി ബ്രൂയ്ൻ മാഞ്ചസ്റ്റർ സിറ്റിക്കൊപ്പം സ്വന്തമാക്കിയിട്ടുണ്ട്.

ഇംഗ്ലീഷ് പ്രീമിയർ ലീഗിൽ ഈ സീസണിൽ ഒരു തകർപ്പൻ റെക്കോർഡും ബെൽജിയം താരം സ്വന്തമാക്കിയിരുന്നു. വോൾവസിനെതിരെയുള മത്സരത്തിൽ ഗോൾ നേടിയതോടെ മാഞ്ചസ്റ്റർ സിറ്റിക്കൊപ്പം 250 കോൺഡ്രിബ്യൂഷൻസ് സ്വന്തമാക്കാനാണ് ഡി ബ്രൂയ്ന് സാധിച്ചത്. മാഞ്ചസ്റ്റർ സിറ്റിക്ക് വേണ്ടി 92 ഗോളുകളും 158 അസിസ്റ്റുകളുമാണ് താരം നേടിയത്. ഇതോടെ പെപ് ഗ്വാർഡിയോളയുടെ കീഴിൽ 250 ഗോൾ കോൺഡ്രിബ്യൂഷൻസ് നടത്തുന്ന രണ്ടാമത്തെ താരമായി മാറാനും കെവിൻ ഡി ബ്രൂയ്ന് സാധിച്ചു. ഇതിനുമുമ്പ് ഈ നേട്ടം സ്വന്തമാക്കിയത് ഇതിഹാസതാരം ലയണൽ മെസിയാണ്.

അതേസമയം നിലവിൽ മെസി അമേരിക്കൻ ക്ലബ് ഇന്റർ മയാമിയുടെ താരമാണ്. 2023ലാണ് മെസി പാരീസ് വിട്ട് മേജർ ലീഗിലേക്ക് പോയത്. മെസിയുടെ വരവോടെ ഇന്റർ മയാമി വേണ്ടി മിന്നും പ്രകടനമാണ് നടത്തിയിരുന്നത്. ക്ലബ്ബിന്റെ ചരിത്രത്തിൽ ഇതുവരെ ഇല്ലാതിരുന്ന ലീഗ്‌സ് കപ്പ് കിരീടവും മെസിയുടെ നേതൃത്വത്തിൽ ആണ് മയാമി സ്വന്തമാക്കിയത്. ഇതിന് പുറമെ സപ്പോർട്ടേഴ്‌സ് ഷീൽഡും മയാമി സ്വന്തമാക്കി. 

pep guardiola talks about kevin de bruyne passing ability in football