ബെംഗളൂരു: ഇന്ത്യയുടെ ഐടി തലസ്ഥാനമായ ബെംഗളൂരു നഗരം കനത്ത മഴയിൽ ദുരിതത്തിലായി. ഞായറാഴ്ചയും ഇന്നലെ രാത്രിയുമായി ആറ് മണിക്കൂറിലധികം പെയ്ത കനത്ത മഴയെത്തുടർന്ന് നഗരത്തിന്റെ വിവിധ ഭാഗങ്ങൾ വെള്ളത്തിനടിയിലായി. വൈറ്റ്ഫീൽഡ് പ്രദേശത്ത് മതിൽ ഇടിഞ്ഞുവീണ് ശശികല (35) എന്ന സ്ത്രീ മരിച്ചു. വെള്ളപ്പൊക്കത്തിൽ ബെംഗളൂരുവിലെ ഒരു റോയൽ എൻഫീൽഡ് ഡീലർഷിപ്പിലെ പുതിയ മോട്ടോർസൈക്കിളുകൾ വെള്ളത്തിൽ മുങ്ങി.

 

 

കർണാടക മുഖ്യമന്ത്രി സിദ്ധരാമയ്യ ഇന്ന് മഴക്കെടുതി ബാധിച്ച പ്രദേശങ്ങൾ സന്ദർശിക്കും. ഉപമുഖ്യമന്ത്രി ഡി.കെ. ശിവകുമാർ ഉദ്യോഗസ്ഥരുമായി ബന്ധപ്പെട്ട് സ്ഥിതിഗതികൾ നിരീക്ഷിക്കുന്നുണ്ട്.  പുലർച്ചെ നഗരത്തിന്റെ പല ഭാഗങ്ങളിലും വ്യാപകമായ വെള്ളക്കെട്ടും ഗതാഗത തടസ്സവും റിപ്പോർട്ട് ചെയ്തു. കഴിഞ്ഞ 24 മണിക്കൂറിനുള്ളിൽ 105.5 മില്ലിമീറ്റർ മഴയാണ് ശരാശരി രേഖപ്പെടുത്തിയത്.

ഇന്ത്യൻ കാലാവസ്ഥാ വകുപ്പ് (IMD) ബെംഗളൂരുവിൽ വെള്ളിയാഴ്ച വരെ യെല്ലോ അലർട്ടും, ദക്ഷിണ കന്നഡ, ഉഡുപ്പി, ഉത്തര കന്നഡ, ഹാവേരി, ബെലഗാവി ജില്ലകളിൽ ഓറഞ്ച് അലർട്ടും പ്രഖ്യാപിച്ചു. ഇന്ന് നഗരത്തിൽ ഭാഗികമായി മേഘാവൃതമായ ആകാശവും കനത്ത മഴയ്ക്കും ഇടിമിന്നലിനും സാധ്യതയുണ്ട്. കുറഞ്ഞ താപനില 20 ഡിഗ്രി സെൽഷ്യസും ഉയർന്ന താപനില 30 ഡിഗ്രി സെൽഷ്യസുമായിരിക്കും.

 

 

ബെംഗളൂരു അർബൻ, ബെംഗളൂരു റൂറൽ, കോലാർ, ചിക്കബെല്ലാപുര, തുമകുരു, മാണ്ഡ്യ, മൈസൂരു, ഹാസൻ, കുടക്, ബെലഗാവി, ബിദാർ, റായ്ച്ചൂർ, യാദ്ഗിർ, ദാവൻഗരെ, ചിത്രദുർഗ ജില്ലകളിൽ നാശനഷ്ടങ്ങൾ റിപ്പോർട്ട് ചെയ്തു. സായി ലേഔട്ടും ഹൊറമാവും ഏറ്റവും കൂടുതൽ ബാധിത മേഖലകളാണ്. എച്ച്എസ്ആർ ലേഔട്ടിൽ കടുത്ത വെള്ളക്കെട്ട് ജനജീവിതം സ്തംഭിപ്പിച്ചു.