ലഖ്‌നൗ: ബിജെപി നേതാവും ഉത്തര്‍ പ്രദേശ് മുഖ്യമന്ത്രി യോഗി ആദിത്യനാഥുമായി കൂടിക്കാഴ്ച നടത്തി ഇന്ത്യന്‍ ക്രിക്കറ്റ് താരം മുഹമ്മദ് ഷമി. തിങ്കളാഴ്ച ഉത്തര്‍ പ്രദേശ് മുഖ്യമന്ത്രിയായ യോഗി ആദിത്യനാഥിന്റെ ഔദ്യോഗിക വസതിയിലെത്തിയാണ് ഷമി കൂടിക്കാഴ്ച നടത്തിയത്. ഷമി ബിജെപിയില്‍ ചേര്‍ന്നേക്കുമെന്ന അഭ്യഹം ശക്തമാകുന്നതിനിടയിലാണ് ഷമിയുടെ കൂടിക്കാഴ്ച.

നിലവില്‍ ഐപിഎല്ലില്‍ സണ്‍റൈഴ്‌സ് ഹൈദരാബാദിനായി കളിക്കുന്ന താരം ക്രിക്കറ്റില്‍ നിന്ന് വിരമിക്കാന്‍ ഒരുങ്ങുന്നതായി റിപ്പോര്‍ട്ടുകള്‍ ഉണ്ടായിരുന്നു. ക്രിക്കറ്റില്‍ നിന്ന് വിരമിച്ചതിനു ശേഷം രാഷ്ട്രീയത്തില്‍ സജീവമാകാനാണ് താരത്തിന്റെ പദ്ധതിയെന്നും സൂചനയുണ്ട്. കേന്ദ്ര ആഭ്യന്തര മന്ത്രി അമിത് ഷായുമായും നേരത്തേ ഷമി കൂടിക്കാഴ്ച നടത്തിയിരുന്നു.

भारतीय क्रिकेट टीम के प्रख्यात गेंदबाज मोहम्मद शमी जी से आज लखनऊ स्थित सरकारी आवास पर शिष्टाचार भेंट हुई।@MdShami11 pic.twitter.com/M7DQl6VnGB

— Yogi Adityanath (@myogiadityanath) May 19, 2025

2025ലെ ഐപിഎല്ലില്‍ മോശം പ്രകടനം തുടരുന്നതിനിടെയാണ് ഷമിയുടെ കൂടിക്കാഴ്ച. ഒമ്പത് മത്സരങ്ങളില്‍ നിന്ന് 56.16 ശരാശരിയില്‍ ആറ് വിക്കറ്റുകള്‍ മാത്രമാണ് ഷമി ഇത്തവണ നേടിയത്. 

2023ല്‍ ഓസ്‌ട്രേലിയയ്‌ക്കെതിരായ ലോക ടെസ്റ്റ് ചാമ്പ്യന്‍ഷിപ്പ് ഫൈനലിനുശേഷം ഷമി ഇന്ത്യയ്ക്കായി ടെസ്റ്റ് ക്രിക്കറ്റില്‍ പന്തെറിഞ്ഞിട്ടില്ല. അതേ വര്‍ഷം നടന്ന ഏകദിന ലോകകപ്പിന് ശേഷം ഷമി മാസങ്ങളോളം കളിക്കളത്തില്‍ നിന്ന് വിട്ടുനിന്നിരുന്നു.

ആഭ്യന്തര ക്രിക്കറ്റിലേക്ക് തിരിച്ചെത്തിയ ഷമി ബംഗാളിനായി രഞ്ജി ട്രോഫിയില്‍ കളിച്ചിരുന്നു. കഴിഞ്ഞ വര്‍ഷം മധ്യപ്രദേശിനെതിരെ നടന്ന മത്സരത്തില്‍ ഏഴ് വിക്കറ്റുകളുമായി മികച്ച പ്രകടനം നടത്താന്‍ ഷമിക്ക് സാധിച്ചിരുന്നു. എന്നാല്‍ ബോര്‍ഡര്‍ ഗാവസ്‌കാര്‍ പരമ്പരയില്‍ പന്തെറിയാന്‍ ഷമിക്ക് കഴിഞ്ഞിരുന്നില്ല.