എറണാകുളം: തിരുവാങ്കുളത്ത് കാണാതായ മൂന്നുവയസുകാരിക്കായി മൂഴിക്കുളത്തെ പുഴയിലും തിരച്ചില്‍ ആരംഭിച്ചു. കുട്ടിയുടെ അമ്മയുടെ മൊഴിയുടെ അടിസ്ഥാനത്തിലാണ് തിരച്ചില്‍. കുട്ടിയെ കാണാതായ വിവരം അറിയിച്ചത് മുതല്‍ അമ്മ പരസ്പര വിരുദ്ധമായാണ് സംസാരിക്കുന്നത്. ഇവര്‍ക്ക് മാനസിക പ്രശ്‌നങ്ങള്‍ ഉള്ളതായി കുടുംബത്തിന്റെ മൊഴിയുണ്ട്. 

മൂഴിക്കുളത്തെ പുഴക്ക് സമീപം കുട്ടിയെ വിട്ടതായി അമ്മ പറഞ്ഞെന്നാണ് റിപ്പോര്‍ട്ട്. ഇതിന്റെ അടിസ്ഥാനത്തില്‍ മുങ്ങല്‍ വിദഗ്ദരടക്കം എത്തിയാണ് തിരച്ചില്‍ നടത്തുന്നത്.

കുട്ടിയുടെ മാതാപിതാക്കള്‍ തമ്മില്‍ അകല്‍ച്ചയിലായിരുന്നുവെന്ന് പൊലീസ് പറയുന്നു. അമ്മ വ്യക്തമായി സംസാരിക്കാത്ത സാഹചര്യത്തിലാണ് പൊലീസ് അന്വേഷണം വ്യാപിപ്പിച്ചത്. കുട്ടിയുമായി ഒരു യുവതി പോകുന്ന ദൃശ്യങ്ങള്‍ ഇതിനോടകം പുറത്തുവന്നിട്ടുണ്ട്. അത് കുട്ടി തന്നെയാണോ എന്ന് പൊലീസ് പരിശോധിച്ചുവരികയാണ്. കുടുംബപരമായി പ്രശ്‌നങ്ങള്‍ നിലവിലുള്ളതിനാല്‍ കുട്ടിയെ അച്ഛന്റെ വീട്ടിലേക്ക് കൊണ്ടുവന്നിരുന്നു. ഇവിടെ നിന്നാണ് അമ്മ കുട്ടിയെ കൊണ്ടുപോയത്. 

ഇന്ന് വൈകീട്ടോടെയാണ് ആലുവ തിരുവാങ്കുളത്ത് വെച്ച് മൂന്ന് വയസുകാരിയെ കാണാതായി പരാതി ലഭിച്ചത്. കല്യാണിയെന്നാണ് കുട്ടിയുടെ പേര്. അംഗനവാടിയില്‍ നിന്ന് അമ്മയാണ് കുട്ടിയെ കൂട്ടിക്കൊണ്ടുവന്നത്. തുടര്‍ന്ന് ബസില്‍ തന്റെ വീട്ടിലേക്ക് പോവുന്നതിനിടെയാണ് കുട്ടിയെ കാണാതായതെന്നാണ് യുവതി ആദ്യം മൊഴി നല്‍കിയത്. തിരുവാങ്കുളം ഭാഗത്ത് വെച്ച് യുവതി കുട്ടിയെയും എടുത്ത് നടന്നുപോകുന്നതിന്റെ സിസിടിവി ദൃശ്യങ്ങളും പൊലിസ് കണ്ടെടുത്തിട്ടുണ്ട്. 

കുട്ടിക്കായി ജില്ലയിലുടനീളം അന്വേഷണം വ്യാപിപിച്ചിട്ടുണ്ട്. വാഹന പരിശോധനയും നടക്കുന്നുണ്ട്. കുട്ടിയെ കുറിച്ച് എന്തെങ്കിലും സൂചന ലഭിക്കുന്നവര്‍ 0484 2623550 എന്ന നമ്പറില്‍ അറിയിക്കണമെന്ന് പൊലിസ് അറിയിച്ചു.