വൈപ്പിൻ: ഹെയർ ട്രാൻസ്പ്ലാന്റ് (മുടിവച്ച് പിടിപ്പിക്കുക) ചികിത്സയ്ക്ക് വിധേയനായ യുവാവ് തലയയോട്ടി പഴുത്ത്, അസ്ഥികൾ പുറത്തുവന്നതുൾപ്പെടെയുള്ള ഗുരുതര ആരോഗ്യപ്രശ്നങ്ങളുമായി ദുരിതത്തിൽ. വൈപ്പിൻ ചെറായി സ്വദേശിയും കൊച്ചി എളമക്കര കീർത്തി നഗറിൽ താമസക്കാരനുമായ ചെറുപറമ്പിൽ സനിൽ (49)ആണ് അണുബാധയെ തുടർന്ന് ദുരിതത്തിലായത്. ഇതിനകം 13 ശസ്ത്രക്രിയകൾക്ക് വിധേയനായ ഇദ്ദേഹം ഇപ്പോഴും ആരോഗ്യം വീണ്ടെടുത്തിട്ടില്ല. നിലവിൽ എറണാകുളത്തെ ആശുപത്രിയിൽ ചികിത്സയിസാണ് യുവാവുള്ളത്.  

കൊച്ചി പനമ്പിള്ളി നഗറിൽ പ്രവർത്തിക്കുന്ന സ്ഥാപനത്തിൽ നിന്നാണ് കഴിഞ്ഞ ഫെബ്രുവരി അവസാനത്തോടെ മുടിവച്ചുപിടിപ്പിച്ചത്. ഫേസ്ബുക്കിൽ കണ്ട പരസ്യത്തെ തുടർന്നാണ് ഇവരുമായി ബന്ധപ്പെട്ടത്. എന്നാൽ മടിവച്ചുപിടിപ്പിച്ച്  ദിവസങ്ങൾക്കുള്ളിൽ അസഹിനീയമായ തലവേദന ഉണ്ടായതിനെ തുടർന്ന് സ്ഥാപന അധികൃതരുമായി ബന്ധപ്പെട്ടങ്കിലും വേദനസംഹാരി ഗുളികകൾ കഴിക്കാനായിരുന്നു നിർദേശം. സ്ഥിതി ഗുരുതരമായതിനെ തുടർന്ന് എറണാകുളത്തെ ആശുപത്രിയിൽ ചികിത്സ തേടിയപ്പോൾ മുടിവച്ചുപിടിച്ച ഭാഗത്ത്  അണുബാധ ഉണ്ടായിട്ടുള്ളതായി കണ്ടെത്തി. അപ്പോഴേക്കും തലയിലെ തൊലി കാര്യമായ തോതിൽ നഷ്ടമായിരുന്നു. തുടർന്ന് അടിയന്തര ശസ്ത്രക്രിയകൾക്ക് വിധേയനാക്കുകയായിരുന്നു. തുടർ ശസ്ത്രക്രിയകളും വേണ്ടിവന്നു. ഇപ്പോൾ തലയിലെ പഴുപ്പ് വലിച്ച് എടുക്കുന്നതിനായി ഘടിപ്പിച്ചിട്ടുള്ള ഉപകരണം ഇല്ലാതെ സനിലിനെ മുന്നോട്ടുപോകാൻ കഴിയാത്ത സ്ഥിതിയാണ്. കൂടുതൽ ശസ്ത്രക്രിയകൾ ഇനിയുംആവശ്യമാണ്. അര ലക്ഷത്തോളം രൂപയാണ് മുടി വച്ചുപിടിപ്പിക്കുന്നതിനായി സ്ഥാപനം ഈടാക്കിയത്. തുടർന്നുണ്ടായ അസ്വസ്ഥതകൾക്കുള്ള ചികിത്സയ്ക്ക് ഇതുവരെ കുടുംബം 10 ലക്ഷം രൂപയോളം ചെലവിട്ടു കഴിഞ്ഞു. സ്ഥാപനത്തിനെതിരേ നിയമനടപടി സ്വീകരിക്കാനിരിക്കുകയാണ് കുടുംബം.