ശ്രീനഗര്‍: ഇന്‍ഡിഗോ വിമാനം ആലിപ്പഴം വീണതിനെ തുടര്‍ന്ന് അടിയന്തരമായി നിലത്തിറക്കി. ഇന്‍ഡിഗോയുടെ ഡല്‍ഹി- ശ്രീനഗര്‍ വിമാനമാണ് അടിയന്തരമായി നിലത്തിറക്കിയത്. ബുധനാഴ്ച ഡല്‍ഹിയില്‍ നിന്ന് ശ്രീനഗറിലേക്ക് സര്‍വീസ് നടത്തിയ ഇന്‍ഡിഗോ വിമാനത്തിനു മുകളിലേക്കാണ് പെട്ടെന്ന് ആലിപ്പഴം വീണത്. തുടര്‍ന്ന് വിമാനം കുലുങ്ങി.

കൂടുതല്‍ അപകടത്തിലേക്കു പോകുന്നതിനു മുമ്പ് പൈലറ്റ് വിമാനം പെട്ടെന്നു തന്നെ ശ്രീനഗറില്‍ ഇറക്കുകയായിരുന്നു. സമൂഹമാധ്യമങ്ങളില്‍ പ്രചരിക്കുന്ന ദൃശ്യങ്ങളില്‍ വിമാനത്തിനു കേടുപാടുകള്‍ സംഭവിച്ചതും കാണാം. 260 യാത്രക്കാരുമായാണ് ഡല്‍ഹിയിലേക്കു വിമാനം പുറപ്പെട്ടത്. ഇതിനിടെയാണ് ആലിപ്പഴവര്‍ഷം.

 വൈകുന്നേരം 6.30 നാണ് വിമാനം ശ്രീനഗറില്‍ ഇറക്കുന്നത്. ഇന്‍ഡിഗോ 6E2142 വിമാനത്തിന്റെ ക്യാബിന്‍ ജീവനക്കാര്‍ സുരക്ഷിതമായി വിമാനമിറക്കിയെന്ന് എയര്‍പോര്‍ട്ട് അധികൃതര്‍ വ്യക്തമാക്കി. വിമാനത്തിന് ആലിപ്പഴം വീണ് കേടുപാടുകള്‍ സംഭവിച്ചതൊന്നും അധികൃതര്‍ പറയുന്നുമില്ല.