കുവൈത്ത് സിറ്റി: സര്‍ക്കാര്‍ ആശുപത്രിയില്‍ പ്രസവത്തിനിടെ ചികിത്സാപ്പിഴവ് ഉണ്ടായ സംഭവത്തില്‍ യുവതിക്ക് 45,000 കുവൈത്തി ദീനാര്‍ നഷ്ടപരിഹാരമായി നല്‍കാന്‍ ഉത്തരവിട്ട കീഴ്‌ക്കോടതി വിധി കുവൈത്ത് അപ്പീല്‍ കോടതി ശരിവച്ചു. അതായത് ഏകദേശം 147,000 അമേരിക്കന്‍ ഡോളര്‍. ആരോഗ്യമന്ത്രാലയത്തോടാണ് യുവതിക്ക് 45,000 കുവൈത്തി ദീനാര്‍ നല്‍കാന്‍ കോടതി ആവശ്യപ്പെട്ടത്.

മെഡിക്കല്‍ പിഴവ് മൂലം ആകെ ശാരീരിക ശേഷിയുടെ 20% വൈകല്യം സംഭവിച്ചതിനെ തുടര്‍ന്നാണ് യുവതി സര്‍ക്കാര്‍ ആശുപത്രിക്കെതിരെ പരാതി നല്‍കിയത്.

സര്‍ക്കാര്‍ ആശുപത്രിയിലെ മൂന്ന് ഡോക്ടര്‍മാര്‍ മെഡിക്കല്‍, പ്രൊഫഷണല്‍ പിഴവുകള്‍ വരുത്തിയതായി കുവൈത്ത് മെഡിക്കല്‍ ലയബലിറ്റി അതോറിറ്റി കണ്ടെത്തിയിരുന്നു. ഇക്കാര്യം യുവതിയുടെ അഭിഭാഷകന്‍ മിഷാരി അല്‍ മര്‍സൂഖ് കോടതിയെ അറിയിച്ചിരുന്നു. പരാതിക്കാരിയായ യുവതിക്ക് ഭൗതികവും ധാര്‍മ്മികവുമായ നാശനഷ്ടം ഉണ്ടായതായി അഭിഭാഷകന്‍ കോടതിയില്‍ വാദിച്ചു.

ഡോക്ടര്‍മാരുടെ അശ്രദ്ധ മൂലം യുവതിക്ക് ദീര്‍ഘകാലം ആശുപത്രിയില്‍ വസിക്കേണ്ടിവന്നു. കൂടാതെ മരുന്നുകളുടെ ചെലവുകള്‍, ഗര്‍ഭാശയത്തിനുണ്ടായ പ്രശ്‌നങ്ങള്‍ മൂലം വീണ്ടും ഗര്‍ഭം ധരിക്കാനുള്ള സാധ്യത കുറയല്‍ എന്നിവ കൂടി കണക്കിലെടുത്താണ് കോടതി യുവതിക്ക് ഭീമമായ നഷ്ടപരിഹാരം അനുവദിച്ചത്.

A Kuwait court has ruled in favor of a young woman, ordering the Health Ministry to pay $147,000 in compensation for medical malpractice. The case highlights growing concerns over healthcare standards in the region.