മസ്കത്ത്: മസ്കത്ത് സുന്നി സെന്ററിന്റെ നേതൃത്വത്തിൽ ഈ വർഷത്തെ ഹജ്ജ് കർമ്മത്തിന് പോകുന്നവർക്കായി മെയ് 24 ശനിയാഴ്ച ഹജ്ജ് ക്യാമ്പ് റൂവി മൻബഉൽ ഹുദാ മദ്രസയിൽ സംഘടിപ്പിച്ചു. ഈ മാസം 15 മുതൽ 19 വരെ രാത്രി 8മണി മുതൽ 10 മണി വരെ അഞ്ചു ദിവസം നീണ്ടു നിന്ന പഠന ക്ലാസ്സിലും ക്യാമ്പിലും ഒമാന്റെ പല ഭാഗങ്ങളിൽ നിന്നായി ഹജ്ജിനു പോകുന്നവരും അല്ലാത്തവരുമായി നിരവധി പേർ സംബന്ധിച്ചു.

ഈ വർഷം സുന്നി സെന്ററിനു കീഴിൽ ഒമാനിൽ നിന്നും 52 പേർ ഹജ്ജിനു പോകുന്നുണ്ട്. മെയ് 28ന് രാവിലെ 10 മണിക്ക് റൂവി ഖാബൂസ് മസ്ജിദ് പരിസരത്തു നിന്നും യാത്ര പുറപ്പെടും. ഉസ്താദ് സക്കീർ ഹുസൈൻ ഫൈസിയാണ് യാത്ര അമീർ.

മസ്കത്ത് സുന്നി സെന്റർ (എസ്.ഐ.സി മസ്കത്ത്) പ്രസിഡണ്ട് അൻവർ ഹാജി അധ്യക്ഷത വഹിച്ചു. ഹജ്ജ് കമ്മിറ്റി കോർഡിനേറ്റർ ഗഫൂർ ഹാജി പ്രമേയ പ്രഭാഷണം നടത്തി. മദ്രസാ കൺവീനർ സലിം കോർണേഷ്, സെന്റർ വൈസ് പ്രസിഡന്റ് ഉമർ വാഫി, കോ: കൺവീനർ സുലൈമാൻകുട്ടി,  കെ.എം.സി.സി. നേതാക്കളായ പി.എ.വി. അബൂബക്കർ ഹാജി, റഫീഖ് ശ്രീകണ്ഠപുരം, ശുഹൈബ് പാപ്പിനിശ്ശേരി എന്നിവർ ആശംസകൾ നേർന്നു സംസാരിച്ചു. 

ഹജ്ജ് സമ്പൂർണ്ണ പഠനം എന്ന വിഷയം അവതരിപ്പിച്ചുകൊണ്ട് എൻ. മുഹമ്മദലി ഫൈസി പ്രസംഗിച്ചു. ഹജ്ജ് യാത്ര പ്രസന്റേഷൻ സക്കീർ ഹുസൈൻ ഫൈസിയും ഹജ്ജും ആരോഗ്യവും എന്ന വിഷയം അവതരിപ്പിച്ചുകൊണ്ട് അൽ അബീർ ഹോസ്പിറ്റൽ ഡോക്ടർ മുഹമ്മദലി, ആഖിൽ റഹ്മാൻ എന്നിവർ ക്ലാസ് എടുത്തു.

സുന്നി സെന്റർ ജനറൽ സെക്രട്ടറി ഷാജുദ്ദീൻ ബഷീർ സ്വാഗതവും ഹജ്ജ് കമ്മിറ്റി കൺവീനവർ ബി. മുഹമ്മദ് പന്നിയൂർ നന്ദിയും പറഞ്ഞു.