ന്യൂഡല്‍ഹി: ഐപിഎല്ലില്‍ ചില താരങ്ങള്‍ക്ക് പ്രത്യേക പരിഗണന ലഭിക്കുന്നുവെന്ന ആരോപണവുമായി രംഗത്തെത്തിയിരിക്കുകയാണ് മുന്‍ ഇന്ത്യന്‍ ക്രിക്കറ്റ് താരം വീരേന്ദര്‍ സെവാഗ്. ലഖ്‌നൗ സൂപ്പര്‍ ജയന്റ്‌സ് താരം ദിഗ്‌വേഷ് റാത്തിയെ പെരുമാറ്റച്ചട്ട ലംഘനത്തിന് ബിസിസിഐ ഒരു മത്സരത്തില്‍ നിന്ന് വിലക്കിയ നടപടിയെ ചൂണ്ടിക്കാട്ടിയാണ് സെവാഗിന്റെ വിമര്‍ശനം.

സണ്‍റൈസേഴ്‌സ് ഹൈദരാബാദ് താരം അഭിഷേക് ശര്‍മയുമായി വാക്കുതര്‍ക്കത്തില്‍ ഏര്‍പ്പെട്ടതിനെ തുടര്‍ന്നാണ് ദിഗ്‌വേഷിനെതിരെ നടപടി എടുത്തത്. ദിഗ്‌വേഷ് സീസണില്‍ മൂന്നാം തവണയും പെരുമാറ്റച്ചട്ട ലംഘനം നടത്തിയതായി വിലയിരുത്തിയാണ് ബിസിസിഐ നടപടിയെടുത്തത്.

എന്നാല്‍ സെവാഗ് ഈ തീരുമാനത്തോട് വിയോജിപ്പ് പ്രകടിപ്പിച്ചു. 'ഇത് അല്‍പം കഠിനമായ നടപടിയാണ്. ഇത് ദിഗ്‌വേഷിന്റെ ആദ്യ ഐപിഎല്‍ സീസണാണ്. മുന്‍പ് എം.എസ്. ധോനി ഗ്രൗണ്ടിലേക്ക് അനധികൃതമായി കയറിയിട്ടും അദ്ദേഹത്തിന് വിലക്ക് ലഭിച്ചിരുന്നില്ല. വിരാട് കോഹ്ലി അമ്പയര്‍മാരോട് കയര്‍ത്ത് സംസാരിച്ച സംഭവങ്ങളും നമുക്ക് അറിയാം. എന്നാല്‍ അദ്ദേഹത്തിനും ഒരിക്കലും വിലക്ക് ലഭിച്ചിട്ടില്ല, അതിനാല്‍ ദിഗ്വേഷിനെയും ഒഴിവാക്കാമായിരുന്നു' ക്രിക്ബസിലെ പരിപാടിയില്‍ സംസാരിക്കവേ സെവാഗ് വ്യക്തമാക്കി.  

2019ലെ ഐപിഎല്‍ സീസണില്‍ രാജസ്ഥാന്‍ റോയല്‍സിനെതിരായ മത്സരത്തിലായിരുന്നു ഡഗ്ഔട്ടില്‍ നിന്ന് പിച്ചിലെത്തിയ ധോണി അമ്പയറോട് കയര്‍ത്ത് സംസാരിച്ചത്. ഒരു നോബോളുമായി ബന്ധപ്പെട്ട വിഷയത്തിലാണ് ധോണി ഡഗ്ഔട്ടില്‍ നിന്ന് പിച്ചിലെത്തി അമ്പയറോട് കയര്‍ത്ത് സംസാരിച്ചത്. ഇത്തരത്തില്‍ പെരുമാറ്റച്ചട്ടം ലംഘിച്ചതിന് മാച്ച് ഫീയുടെ 50 ശതമാനം ധോണിക്ക് പിഴവിധിച്ചിരുന്നു.

Former Indian cricketer Virender Sehwag criticizes BCCI for alleged favoritism in disciplinary actions after Lucknow Super Giants' Digvijay Rathi faces one-match ban. Sehwag points out MS Dhoni and Virat Kohli's past incidents went unpunished, questioning unequal treatment of young players in IPL.