ബാംഗ്ലൂർ: 2025 ഐപിഎല്ലിന്റെ ഫൈനലിലേക്ക് മുന്നേറിയിരിക്കുകയാണ് റോയൽ ചലഞ്ചേഴ്‌സ് റോയൽ ചലഞ്ചേഴ്‌സ് ബെംഗളൂരു. കഴിഞ്ഞ ദിവസം നടന്ന ക്വാളിഫയർ വണ്ണിൽ പഞ്ചാബ് കിങ്സിനെ വീഴ്ത്തിയാണ് ആർസിബി ഫൈനലിലേക്ക് കാലെടുത്തുവെച്ചത്. മത്സരത്തിൽ ടോസ് നേടിയ ആർസിബി ബൗളിംഗ് തെരഞ്ഞെടുക്കുകയായിരുന്നു. ആദ്യം ബാറ്റ് ചെയ്ത പഞ്ചാബ് 14.1 ഓവറിൽ 101 റൺസിന് പുറത്താവുകയായിരുന്നു. വിജയലക്ഷ്യം പിന്തുടർന്ന ആർസിബി 10 ഓവറിൽ 2 വിക്കറ്റ് നഷ്ടത്തിൽ ലക്ഷ്യം അനായാസമായി മറികടക്കുകയായിരുന്നു. 

ജൂൺ മൂന്നിന് ഗുജറാത്ത് അഹമ്മബാദിലെ നരേന്ദ്ര മോദി സ്റ്റേഡിയത്തിലാണ് കലാശ പോരാട്ടം നടക്കുന്നത്. ഐപിഎൽ ചരിത്രത്തിലെ ആദ്യ കിരീടം സ്വപ്നം കാണുന്ന ബെംഗളൂരുവിന് അനുകൂലമായ ഒരു വസ്തുതയാണ് ഏറെ ശ്രദ്ധേയയമാവുന്നത്. ബെംഗളൂരുവിന്റെ ഓസ്‌ട്രേലിയൻ സ്റ്റാർ പേസർ ജോഷ് ഹേസൽവുഡ് കളിച്ചിട്ടുള്ള ഒരു ഫൈനലിലും താരം ഇതുവരെ പരാജയപ്പെട്ടില്ല. ഹേസൽവുഡ് തന്റെ കരിയറിൽ ഇതുവരെ ആറ് ഫൈനലുകളിലാണ് കളിച്ചിട്ടുള്ളത്. ഈ ആറ് തവണയും വിജയം ഹേസൽവുഡ് അണിനിരന്ന ടീമിനൊപ്പം ആയിരുന്നു.

2012ൽ ചാമ്പ്യൻസ് ലീഗ് ടി-20യിൽ സിഡ്നി സിക്സേഴ്സിനു വേണ്ടിയാണ് താരം ആദ്യമായി വിജയിക്കുന്നത്. പിന്നീട് ഓസ്‌ട്രേലിയക്കൊപ്പം 2015 ലോകകപ്പ്, സിഡ്നി സിക്സേഴ്സിനു വേണ്ടി 2020 ബിബിഎൽ എന്നിവയും താരം സ്വന്തമാക്കി. 2021ൽ ചെന്നൈ സൂപ്പർ കിങ്‌സിനൊപ്പം ഐപിഎല്ലും ഓസ്‌ട്രേലിയക്കൊപ്പം ടി-20 ലോകകപ്പും താരം നേടി. രണ്ട് വർഷങ്ങൾക്ക് ശേഷം ഓസ്‌ട്രേലിയക്കായി 2023 ഏകദിന വേൾഡ് കപ്പും താരം വിജയിച്ചു.

ഇപ്പോൾ വീണ്ടുമൊരു ഫൈനൽ ഹേസൽവുഡിന്റെ മുന്നിലെത്തി നിൽക്കുമ്പോൾ ഏഴാം ഫൈനലിലും ഹേസൽവുഡ് കിരീടം ഉയർത്തുമോ എന്നാണ് ക്രിക്കറ്റ് ലോകം ഉറ്റുനോക്കുന്നത്.  ഈ സീസണിൽ ആർസിബിയുടെ ബൗളിങ്ങിലെ അവിഭാജ്യ ഘടകമായിരുന്നു ജോഷ് ഹേസൽവുഡ്. 15 മത്സരങ്ങളിൽ നിന്ന് 21 വിക്കറ്റുകൾ ആണ് താരം നേടിയിട്ടുള്ളത്.  

ഈ സീസണിൽ സ്വപ്ന തുല്യമായ മുന്നേറ്റമാണ് ബെംഗളൂരു നടത്തികൊണ്ടിരിക്കുന്നത്. സീസണിലെ ആദ്യ മത്സരത്തിൽ കൊൽക്കത്ത നൈറ്റ് റൈഡേഴ്സിനെ വീഴ്ത്തിയാണ് ബെംഗളൂരു തുടക്കം കുറിച്ചത്. രണ്ടാം മത്സരത്തിൽ ചെന്നൈ സൂപ്പർ കിങ്സിനെയും ആർസിബി പരാജയപ്പെടുത്തി. 17 വർഷങ്ങൾക്ക് ശേഷം ഇതാദ്യമായിട്ടാരുന്നു ചെപ്പോക്കിന്റെ മണ്ണിൽ ആർസിബി ചെന്നൈയെ കീഴടക്കിയത്.

എന്നാൽ മൂന്നാം മത്സരത്തിൽ ഗുജറാത്ത് ടൈറ്റൻസിനോട് ബെംഗളൂരു പരാജയപ്പെട്ടിരുന്നു. പിന്നീട് വാംഖഡെയിൽ മുംബൈ ഇന്ത്യൻസിനെതിരെയുള്ള മത്സരം വിജയിച്ചുകൊണ്ട് ആർസിബി തിരിച്ചുവരികയായിരുന്നു. ഈ സീസണിൽ ഗ്രൂപ്പ് ഘട്ടത്തിൽ നാല് മത്സരങ്ങളിലാണ് ആർസിബി പരാജയപ്പെട്ടത്. കളിച്ച എല്ലാ എവേ മത്സരങ്ങളും വിജയിച്ചുകൊണ്ടാണ് ആർസിബി പ്ലേ ഓഫിലേക്ക് മുന്നേറിയിത്. 

Royal Challengers Bangalores Australian star pacer Josh Hazlewood has never lost a final in which he has played