പഞ്ചാബ്: ഐപിഎല്ലിൽ എലിമിനേറ്റർ മത്സരത്തിൽ മുംബൈ ഇന്ത്യൻസിനെതിരെ ഗുജറാത്ത് ടൈറ്റൻസിന്‌ 229 റൺസിന്റെ വിജയലക്ഷ്യം. മത്സരത്തിൽ ഒരു പുതിയ നേട്ടമാണ് മുംബൈ താരം സൂര്യകുമാർ യാദവ് സ്വന്തമാക്കിയത്. ഐപിഎല്ലിൽ 450 ഫോറുകൾ പൂർത്തിയാക്കാനാണ് സ്കൈക്ക് സാധിച്ചത്. ഗുജറാത്തിനെതിരെ ഒരു ഫോറം മൂന്ന് സിക്‌സും ഉൾപ്പടെ 20 പന്തിൽ 33 റൺസാണ് സൂര്യകുമാർ നേടിയത്. മത്സരത്തിൽ നേടിയ ഒറ്റ ഫോറിന് പിന്നാലെയാണ് സൂര്യകുമാർ ഈ നേട്ടത്തിലേക്ക് നടന്നുകയറിയത്. 

ഈ സീസണിലെ സ്ഥിരതയാർന്ന പ്രകടനങ്ങളിലൂടെ ഒരു ലോക റെക്കോർഡും സ്‌കൈ സ്വന്തമാക്കിയിരുന്നു. ടി-20യിൽ  തുടർച്ചയായി ഏറ്റവും കൂടുതൽ 25+ സ്കോറുകൾ നേടുന്ന താരമായും സൂര്യ മാറിയിരുന്നു.

കഴിഞ്ഞ മത്സരത്തിലെ പ്രകടനങ്ങൾക്ക് പിന്നാലെ 14 തവണ തുടർച്ചയായി  25+ സ്കോറുകൾ നേടുന്ന താരമായും സൂര്യ മാറിയിരുന്നു .13 തവണ 25+ സ്കോറുകൾ തുടർച്ചയായി നേടിയ സൗത്ത് ആഫ്രിക്കൻ താരം ടെംബ ബവുമയെ മറികടന്നാണ് സ്‌കൈ ഈ നേട്ടം കൈവരിച്ചത്. 2019-20 വർഷത്തിലാണ് ബാവുമ തുടർച്ചയായി 13 തവണ 25+ സ്‌കോറുകൾ നേടിയത്.  

മത്സരത്തിൽ മുംബൈക്കായി രോഹിത് ശർമ്മ അർദ്ധ സെഞ്ച്വറി നേടി തിളങ്ങി. മത്സരത്തിൽ 50 പന്തിൽ 81 റൺസാണ് രോഹിത് നേടിയത്. ഒമ്പത് ഫോറുകളും നാല് സിക്സുകളുമാണ് താരം സ്വന്തമാക്കിയത്.     

ഗുജറാത്ത് ബൗളിങ്ങിൽ സായ് കിഷോർ, പ്രസീദ് കൃഷ്ണ എന്നിവർ രണ്ട് വിക്കറ്റുകൾ നേടിയപ്പോൾ മുഹമ്മദ് സിറാജ് ഒരു വിക്കറ്റും നേടി. 

ഗുജറാത്ത് ടൈറ്റൻസ് പ്ലെയിങ് ഇലവൻ 

ശുഭ്മാൻ ഗിൽ(ക്യാപ്റ്റൻ), സായ് സുദർശൻ, കുശാൽ മെൻഡിസ്(വിക്കറ്റ് കീപ്പർ), ഷാരൂഖ് ഖാൻ, വാഷിംഗ്ടൺ സുന്ദർ, രാഹുൽ തിവാട്ടിയ, റാഷിദ് ഖാൻ, രവിശ്രീനിവാസൻ സായ് കിഷോർ, ജെറാൾഡ് കോട്സി, മുഹമ്മദ് സിറാജ്, പ്രസീദ് കൃഷ്ണ. 

മുംബൈ ഇന്ത്യൻസ് പ്ലെയിങ് ഇലവൻ 

രോഹിത് ശർമ്മ, ജോണി ബെയർസ്റ്റോ (വിക്കറ്റ് കീപ്പർ), സൂര്യകുമാർ യാദവ്, തിലക് വർമ്മ, ഹാർദിക് പാണ്ഡ്യ (ക്യാപ്റ്റൻ), നമൻ ധിർ, രാജ് ബാവ, മിച്ചൽ സാൻ്റ്നർ, ട്രെൻ്റ് ബോൾട്ട്, ജസ്പ്രീത് ബുംറ, റിച്ചാർഡ് ഗ്ലീസൺ. 

Suryakumar Yadav create a new record in IPL