തിരുവനന്തപുരം: നിലമ്പൂര്‍ ഉപതെരഞ്ഞെടുപ്പില്‍ ബി.ജെ.പി സ്ഥാനാര്‍ഥിയായി അഡ്വ.മോഹന്‍ ജോര്‍ജ് മത്സരിക്കും. മുന്‍ കേരള കോണ്‍ഗ്രസ് അംഗമാണ്  മോഹന്‍ ജോര്‍ജ്. നിലമ്പൂരില്‍ അഭിഭാഷകനായി പ്രവര്‍ത്തിക്കുകയാണ്. ബി.ജെ.പി കേന്ദ്രനേതൃത്വമാണ് സ്ഥാനാര്‍ഥിയെ പ്രഖ്യാപിച്ചത്. നിലമ്പൂരില്‍ ശക്തമായ മത്സരമുണ്ടാകുമെന്ന് മോഹന്‍ ജോര്‍ജ് പറഞ്ഞു.

മാര്‍ത്തോമ സഭാംഗമായ മോഹന്‍ ജോര്‍ജ് നിലവില്‍ ബി.ജെ.പി അംഗമല്ല. ഉടന്‍ ബി.ജെ.പി അംഗത്വം സ്വീകരിച്ച് താമര അടയാളത്തിലാകും മത്സരിക്കുക. 
ആര്‍ക്കും ഗുണകരമല്ലാത്ത അടിച്ചേല്‍പ്പിച്ച തെരഞ്ഞെടുപ്പാണ് നിലമ്പൂരിലേതെന്നായിരുന്നു പാര്‍ട്ടി സംസ്ഥാന അധ്യക്ഷന്‍ രാജീവ് ചന്ദ്രശേഖര്‍ നേരത്തെ പ്രതികരിച്ചിരുന്നത്. നിലമ്പൂര്‍ തെരഞ്ഞെടുപ്പ് ഫലം സംസ്ഥാന രാഷ്ട്രീയത്തില്‍ ഒരു മാറ്റവും ഉണ്ടാക്കില്ലെന്നും ആറ് മാസം മാത്രമായിരിക്കും പുതിയ എം.എല്‍.എയുടെ കാലാവധിയെന്നും ചന്ദ്രശേഖര്‍ വ്യക്തമാക്കി.  

അതിനിടെ, വോട്ട് കച്ചവടത്തിനായാണ് ബി.ജെ.പി സ്ഥാനാര്‍ഥിയെ നിര്‍ത്താത്തതെന്ന് ആരോപണം ഉയര്‍ന്നു. പിന്നാലെ, നിലമ്പൂരില്‍ മത്സരിക്കുമെന്ന സൂചന കഴിഞ്ഞദിവസം ബിജെപി നല്‍കിയിരുന്നു. മത്സരിക്കുന്ന കാര്യത്തില്‍ തിങ്കളാഴ്ചക്ക് മുന്‍പ് തീരുമാനമുണ്ടാകുമെന്ന് ബിജെപി സംസ്ഥാന അധ്യക്ഷന്‍ രാജീവ് ചന്ദ്രശേഖരന്‍ കഴിഞ്ഞദിവസം പറഞ്ഞിരുന്നു. ആരോപണമുയര്‍ന്നത് ദേശീയതലത്തില്‍ തന്നെ വലിയ ചര്‍ച്ചയായതോടെയാണ് നിലമ്പൂരില്‍ സ്ഥാനാര്‍ഥിയെ നിര്‍ത്താന്‍ ബി.ജെ.പി തീരുമാനിച്ചത്. ആദ്യഘട്ടത്തില്‍ ബി.ഡി.ജെ.എസിനോട് സീറ്റ് ഏറ്റെടുക്കാന്‍ ബി.ജെ.പി ആവശ്യപ്പെട്ടിരുന്നു എന്നാല്‍ അവര്‍ അതിന് തയാറായില്ല. തുടര്‍ന്നാണ് സ്വന്തം സ്ഥാനാര്‍ഥിയെ നിര്‍ത്താന്‍ തീരുമാനിച്ചത്.