2025 ഐപിഎൽ സീസണിന് തിരശ്ശീല വീണിരിക്കുകയാണ്. ഈ സീസണിൽ പുതിയ ചാമ്പ്യന്മാരെയാണ് ഐപിഎല്ലിന് ലഭിച്ചിരിക്കുന്നത്. നീണ്ട 18 വർഷത്തെ കിരീട വരൾച്ച അവസാനിപ്പിച്ചുകൊണ്ട് റോയൽ ചലഞ്ചേഴ്സ് ബെംഗളൂരുവാണ് ഇന്ത്യൻ ക്രിക്കറ്റിന്റെ നെറുകയിൽ എത്തിയത്. ഫൈനൽ പോരാട്ടത്തിൽ പഞ്ചാബ് കിങ്സിനെ ആറ് റൺസിന് വീഴ്ത്തിയാണ് ആർസിബി കിരീടം ചൂടിയത്.

മത്സരത്തിൽ നഷ്ടപ്പെട്ട് ആദ്യം ബാറ്റ് ചെയ്ത ബംഗളൂരു 20 ഓവറിൽ 9 വിക്കറ്റ് നഷ്ടത്തിൽ 190 റൺസ് ആണ് നേടിയത്. വിജയലക്ഷ്യം പിന്തുടർന്നിറങ്ങിയ പഞ്ചാബിനെ 20 ഓവറിൽ 7 വിക്കറ്റ് നഷ്ടത്തിൽ 184 റൺസിൽ എത്താനെ സാധിച്ചുള്ളൂ. ടൂർണ്ണമെന്റിലുടനീളം മികച്ച പ്രകടനം നടത്തിയ പഞ്ചാബിന് ഫൈനലിൽ കാലിടറുകയായിരുന്നു. 

മത്സരശേഷം ഫൈനലിലെ തോൽവിയെക്കുറിച്ച് പഞ്ചാബ് ക്യാപ്റ്റൻ ശ്രേയസ് അയ്യർ സംസാരിച്ചിരുന്നു. അടുത്ത വർഷം പഞ്ചാബിനൊപ്പം കിരീടം ഉയർത്തുമെന്നും ശക്തമായി തിരിച്ചുവരുമെന്നുമാണ് അയ്യർ പറഞ്ഞത്. 

''അടുത്ത വർഷം കിരീടം സ്വീകരിക്കേണ്ടതിനാൽ ഇപ്പോൾ ഞങ്ങളുടെ പകുതി ജോലി  പൂർത്തിയായി. ഈ വർഷം ഞങ്ങൾക്ക് വേണ്ടി കളിച്ച താരങ്ങൾ അടുത്ത സീസണിൽ കൂടുതൽ അനുഭവ സമ്പത്തോടെ തിരിച്ചെത്തും. അവരെ ഉപയോഗിച്ചുകൊണ്ടായിരിക്കും ഞങ്ങൾ തന്ത്രം കെട്ടിപ്പടുക്കുന്നത്" ശ്രേയസ് അയ്യർ പറഞ്ഞു.

പഞ്ചാബ് ഫൈനലിൽ കടന്നത്തോടെ ഐപിഎല്ലിൽ മറ്റൊരു ക്യാപ്റ്റനും സ്വന്തമാക്കാൻ സാധിക്കാത്ത ഒരു റെക്കോർഡ്‌ ആണ് പഞ്ചാബ് നായകൻ ശ്രേയസ് അയ്യർ നേടിയെടുത്തത്. ഐപിഎല്ലിൽ മൂന്ന് വ്യത്യസ്ത ടീമിനെ ഫൈനലിൽ എത്തിക്കുന്ന ആദ്യ ക്യാപ്റ്റൻ ആവനാണ് അയ്യരിന് സാധിച്ചത്. ഇതിന് മുമ്പ് കൊൽക്കത്ത നൈറ്റ്‌ റൈഡഴ്സ്, ഡൽഹി ക്യാപ്പിറ്റൽസ് എന്നീ ടീമുകളെയാണ് അയ്യർ ഫൈനലിലേക്ക് കൈപിടിച്ചുയർത്തിയത്. 

ഐപിഎൽ മെഗാ ലേലത്തിൽ 26.5 കോടിക്കായിരുന്നു ശ്രേയസിനെ പഞ്ചാബ് സ്വന്തമാക്കിയിരുന്നത്. ഐപിഎൽ ചരിത്രത്തിൽ ലേലത്തിൽ ഒരു താരത്തിന് ലഭിക്കുന്ന ഏറ്റവും ഉയർന്ന രണ്ടാമത്തെ തുക കൂടിയാണിത്.

Shreyas Iyer Talks about Defeat of Punjab Kings Against Royal Challengers Bangalore in IPL 2025