ജിസാന്‍: കരള്‍ രോഗം ബാധിച്ച് ജിസാനിലെ ആശുപത്രിയില്‍ ചികിത്സയിലായിരുന്ന പ്രവാസി മലയാളി മരിച്ചു. പ്രിന്‍സ് മുഹമ്മദ് ബിന്‍ നാസര്‍ ആശുപത്രിയില്‍ ചികിത്സയിലായിരുന്ന കൊല്ലം ഇളമാട് നെട്ടയം തെറ്റിക്കാട് നാസില മല്‍സിലില്‍ നൗഷാദ് (55) ആണ് മരിച്ചത്. ഗുരുതരമായ രോഗം ബാധിച്ച് രണ്ടാഴ്ച മുമ്പാണ് ദര്‍ബ് ജനറല്‍ ആശുപത്രിയില്‍ പ്രവേശിപ്പിച്ചത്. എന്നാല്‍ രോഗം മൂര്‍ച്ഛിച്ചതോടെ പത്തു ദിവസം മുമ്പ് ജിസാന്‍ പ്രിന്‍സ് മുഹമ്മദ് ബിന്‍ നാസാര്‍ ആശുപത്രിയിലേക്ക് മാറ്റുകയായിരുന്നു. ഇന്നലെ രാവിലെ ആരോഗ്യനില വഷളാകുകയും അന്ത്യം സംഭവിക്കുകയുമായിരുന്നു. മുപ്പതു വര്‍ഷമായി ജിസാന്‍ ദര്‍ബില്‍ ഡ്രൈവറായി ജോലിചെയ്തുവരികയായിരുന്നു നൗഷാദ്.

നൗഷാദിന്റെ മരണ വിവരമറിഞ്ഞ് ജിദ്ദയില്‍ ജോലിചെയ്യുന്ന ഇളയസഹോദരന്‍ അബ്ദുല്‍ സത്താര്‍ ജിസാനില്‍ എത്തി. കൊല്ലം ഇളമാട് നെട്ടയം തെറ്റിക്കാട് സൈനല്ലാബ്ദീനിന്റെയും ഫാത്തിമ ബീബിയുടെയും മകനാണ്. ഷൈലജയാണ് ഭാര്യ. മക്കള്‍: നാസില, നൗഫി, നസി, മാഹിന്‍ എന്നിവര്‍.

പ്രിന്‍സ് മുഹമ്മദ് ബിന്‍ നാസര്‍ ആശുപത്രി മോര്‍ച്ചറിയില്‍ സൂക്ഷിച്ചിരിക്കുന്ന മയ്യിത്ത് നാട്ടിലെത്തിച്ച് മറവുചെയ്യും. ഇതിനു വേണ്ടിയുള്ള നിയമ നടപടികള്‍ കെ.എം.സി.സി കേന്ദ്ര കമ്മിറ്റി പ്രസിഡന്റും ഇന്ത്യന്‍ കോണ്‍സുലേറ്റ് സാമൂഹിക ക്ഷേമ സമിതി അംഗവുമായ ഷംസു പൂക്കോട്ടൂരിന്റെ നേതൃത്വത്തില്‍ ആണ് നടക്കുന്നത്.

Malayali Pravasi passed away at the Prince Muhammad Bin Nasser Hospital in Jazan due to liver disease