നിലവിലെ യൂറോകപ്പ് ചാമ്പ്യന്മാരായ സ്‌പെയ്‌നെ തകർത്തുകൊണ്ട് യുവേഫ നേഷൻസ് ലീഗിന്റെ രാജാക്കന്മാരായി മാറിയിരിക്കുകയാണ് പോർച്ചുഗൽ. കലാശപോരാട്ടത്തിൽ സ്‌പെയിനെ പെനാൽറ്റി ഷൂട്ടൗട്ടിൽ 5-3 ന് വീഴ്ത്തിയാണ് ക്രിസ്റ്റ്യാനോ റൊണാൾഡോയും സംഘവും കിരീടം കൈപ്പിടിയിലാക്കിയത്. മത്സരത്തിന്റെ നിശ്ചിത സമയത്തും അധിക സമയത്തും 2-2 എന്ന സ്‌കോറിൽ സമനിലയിൽ പിരിയുകയായിരുന്നു.

മത്സരത്തിൽ പോർച്ചുഗലിനായി ന്യൂനോ മെൻഡസും റൊണാൾഡോയുമാണ് ഗോളുകൾ നേടിയത്. ഈ കിരീടനേട്ടത്തോടെ റൊണാൾഡോയും റൊണാൾഡോയുടെ മകൻ സിആർ സേവന ജൂനിയറും ഒരേ വർഷം തന്നെ പോർച്ചുഗൽ ടീമിനൊപ്പം കിരീടം സ്വന്തമാക്കിയിരിക്കുകയാണ്. റൊണാൾഡോ നേഷൻസ് ലീഗ് വിജയിച്ചപ്പോൾ റൊണാൾഡോ ജൂനിയർ പോർച്ചുഗൽ അണ്ടർ 15 ടീമിനൊപ്പമാണ് കിരീടം നേടിയെടുത്തത്. 

വ്ലാറ്റ്കോ മാർക്കോവിച്ച് ടൂർണമെന്റിലാണ് പോർച്ചുഗൽ അണ്ടർ 15 ടീം കിരീടം സ്വന്തമാക്കിയത്. കലാശപ്പോരാട്ടത്തിൽ ക്രോയേഷ്യയെ രണ്ടിനെതിരെ മൂന്ന് ഗോളുകൾക്ക് വീഴ്ത്തിയാണ് പോർച്ചുഗൽ ചാമ്പ്യന്മാരായത്. മത്സരത്തിൽ പറങ്കിപ്പടക്ക് വേണ്ടി റൊണാൾഡോ ജൂനിയർ ഇരട്ട ഗോൾ നേടി ടീമിന്റെ വിജയത്തിൽ നിർണായകമായ പങ്കാണ് വഹിച്ചത്. 

ക്രോയേഷ്യയിൽ നടന്ന ഈ ടൂർണമെന്റിൽ ആദ്യമായാണ് റൊണാൾഡോ ജൂനിയർ പോർച്ചുഗൽ ജേഴ്സി ധരിച്ചിരുന്നത്. പോർച്ചുഗൽ ടീമിനൊപ്പം തന്റെ കഴിവ് തെളിയിക്കാനുള്ള ഈ അവസരം റൊണാൾഡോ ജൂനിയർ കൃത്യമായി വിനിയോഗിക്കുകയായിരുന്നു. ടൂർണമെന്റിൽ ജപ്പാനെതിരെയുള്ള മത്സരത്തിലാണ് താരം പോർച്ചുഗലിനായി അരങ്ങേറ്റം കുറിച്ചത്. 

ജപ്പാനെതിരെ 4-1ന്റെ തകർപ്പൻ വിജയമാണ് പോർച്ചുഗൽ സ്വന്തമാക്കിയത്. രണ്ടാം മത്സരത്തിൽ ഗ്രീസിനെതിരെ പോർച്ചുഗൽ സമനില പിടിക്കുകയും ചെയ്തു. മത്സരത്തിൽ ഇരു ടീമുകളും ഓരോ ഗോൾ വീതം നേടി പോയിന്റുകൾ പങ്കുവെക്കുകയായിരുന്നു. ഈ മത്സരത്തിൽ പോർച്ചുഗലിനായി ആദ്യ ഇലവനിൽ റൊണാൾഡോ ജൂനിയർ ഇടം നേടിയിരുന്നു. മൂന്നാം മത്സരത്തിൽ ഇംഗ്ലണ്ടിനെ 2-1നും പോർച്ചുഗൽ പരാജയപ്പെടുത്തി.