വിറ്റാമിന്‍ സി ധാരാളം അടങ്ങിയ നാരങ്ങ ശരീരത്തിനു നല്‍കുന്ന ഗുണങ്ങള്‍ നിരവധിയാണ്. വിറ്റാമിന്‍ സി, കാല്‍സ്യം, മഗ്നീഷ്യം, ഫ്‌ളേവനോയ്ഡുകള്‍ തുടങ്ങിയ പോഷകങ്ങളാല്‍ സമ്പന്നവുമാണ് നാരങ്ങ. ഇവ മുടിയുടെ വളര്‍ച്ചയ്ക്ക് വളരെയധികം സഹായിക്കുന്നു. 

എങ്ങനെയാണ് നാരങ്ങ മുടിയുടെ വളര്‍ച്ചയ്ക്ക് സഹായിക്കുന്നത്

നാരങ്ങയുടെ തൊലിയില്‍ അടങ്ങിയ ആന്റിഫംഗല്‍, ആന്റി ബാക്ടീരിയല്‍ ഗുണങ്ങള്‍ തലയോട്ടിയിലെ അഴുക്ക് അധികമുള്ള എണ്ണ, താരന്‍ എന്നിവ നീക്കം ചെയ്ത് തലയോട്ടി വൃത്തിയുള്ളതും ആരോഗ്യകരവുമായി നിലനിര്‍ത്താന്‍ സഹായിക്കുന്നു. അതുപോലെ തലയോട്ടിയിലുണ്ടാവുന്ന അധിക എണ്ണയെയും അമിത വരള്‍ച്ചയെയും തടയുകയും മുടിയുടെ താപനില സന്തുലിതമാക്കാന്‍ സഹായിക്കുകയും ചെയ്യുന്നു. 

നാരങ്ങയുടെ  തൊലിയിലെ വിറ്റാമിന്‍ സി മുടിയുടെ വളര്‍ച്ചയ്ക്ക് അത്യാവശ്യമായ കൊളാജന്റെ ഉല്‍പാദനം വര്‍ധിപ്പിക്കുന്നു. ഇതില്‍ അടങ്ങിയ ആന്റിഓക്‌സിഡന്റുകളും ധാതുക്കളും രോമകൂപങ്ങളെ പോഷിപ്പിക്കുകയും മുടി കൊഴിച്ചില്‍ കുറയ്ക്കുകയും ചെയ്യുന്നു. 

എങ്ങനെയാണ് ഉപയോഗിക്കുക

കുറച്ചു വെള്ളത്തില്‍ നാരങ്ങയുടെ തൊലിയിട്ട് തിളപ്പിക്കുക. ഇവ നന്നായി തിളച്ചതിനു ശേഷം തണുക്കാന്‍ വയ്ക്കുക. തണുത്തതിനു ശേഷം ഈ വെള്ളം തലയോട്ടിയിലും മുടിയിലും നന്നായി തേച്ചു പിടിപ്പിക്കുക. ഷാംപൂ ഉപയോഗിച്ച് മുടി കഴുകിയതിനു ശേഷമാണെങ്കിലും ഇത് തലയില്‍ പുരട്ടാവുന്നതാണ്. ഇങ്ങനെ നാരങ്ങാവെള്ളം പുരട്ടിയാല്‍ മുടിതഴച്ചു വളരാന്‍ നല്ലതാണ്. ആഴ്ചയില്‍ രണ്ടോ മൂന്നോ പ്രാവശ്യം ഇങ്ങനെ ചെയ്യുക.

നാരങ്ങയുടെ തൊലി ഉണക്കിപ്പൊടിച്ചെടുക്കുക. കട്ടിയുള്ള തൈരും വെളിച്ചെണ്ണയും ചേര്‍ത്തെടുത്ത മിശ്രിതം മുടിയുടെ വേരുകളില്‍ പുരട്ടി 20 മിനിറ്റു കഴിഞ്ഞാല്‍ കഴുകാവുന്നതാണ്.  ഇത് തലയോട്ടിയിലെ മൃതകോശങ്ങള്‍ നീക്കം ചെയ്യാനും തിളക്കമുണ്ടാവാനും സഹായിക്കുന്നു.

മുടി കൊഴിച്ചുലുണ്ടാവുന്ന സമയത്തും നാരങ്ങാതൊലി മുടിയില്‍ പുരട്ടുന്നത് മുടിയുടെ വളര്‍ച്ചയ്ക്കു ഗുണം നല്‍കും. 

നാരങ്ങയുടെ തൊലി നന്നായി അരച്ചെടുത്ത് അത് കുറച്ച് ഒലിവ് എണ്ണയിലോ വെളിച്ചെണ്ണയിലോ ഇട്ടുവയ്ക്കുക. ഒന്നോ രണ്ടോ ആഴ്ച സൂര്യപ്രകാശം ഏല്‍ക്കാത്ത ഇരുട്ടുള്ള സ്ഥലത്ത് സൂക്ഷിക്കുക. ശേഷം ഈ എണ്ണ അരിച്ചെടുത്ത് തലയോട്ടിയിലും മുടിയിലുമൊക്കെ പുരട്ടാവുന്നതാണ്.