ന്യൂഡൽഹി: വയനാട് ജില്ലയിലെ മുണ്ടക്കൈ, ചൂരൽമല ഉരുൾപൊട്ടൽ ദുരന്തത്തിൽ ദുരിതമനുഭവിക്കുന്നവരുടെ വായ്പ എഴുതിത്തള്ളാൻ ദേശീയ ദുരന്ത നിവാരണ അതോറിറ്റിക്ക് (എൻഡിഎംഎ) അധികാരമില്ലെന്ന് കേന്ദ്ര സർക്കാർ കേരള ഹൈക്കോടതിയിൽ അറിയിച്ചു. 2025 മാർച്ചിലെ ഭേദഗതി പ്രകാരം 2005-ലെ ദേശീയ ദുരന്ത നിവാരണ നിയമത്തിലെ സെക്ഷൻ 13 ഒഴിവാക്കിയതിനാൽ വായ്പ തിരിച്ചടവിൽ ശുപാർശ ചെയ്യാനുള്ള അധികാരം നഷ്ടപ്പെട്ടുവെന്ന് കേന്ദ്രം സമർപ്പിച്ച സത്യവാങ്മൂലത്തിൽ വ്യക്തമാക്കി. 2024 ജൂലൈയിൽ വയനാട്ടിലുണ്ടായ മണ്ണിടിച്ചിലിന്റെ ദുരിതമനുഭവിക്കുന്നവർക്ക് ഇത് കനത്ത തിരിച്ചടിയാകും.

ചൂരൽമലയിലും മുണ്ടക്കൈയിലും ഉണ്ടായ ദുരന്തത്തിൽ ബാധിതരായവർക്ക് വായ്പ എഴുതിത്തള്ളൽ സാധ്യമാണോയെന്ന കോടതിയുടെ നിർദേശത്തിന്റെ അടിസ്ഥാനത്തിൽ എൻഡിഎംഎയിലെ അണ്ടർ സെക്രട്ടറി ചന്ദൻ സിംഗ് സത്യവാങ്മൂലം സമർപ്പിച്ചു. 2025 മാർച്ച് 29-ന് കേന്ദ്ര നിയമ നീതിന്യായ മന്ത്രാലയം പുറപ്പെടുവിച്ച ഗസറ്റ് വിജ്ഞാപനം വഴി, ദുരിതാശ്വാസത്തിന്റെ ഏറ്റവും കുറഞ്ഞ മാനദണ്ഡങ്ങൾ നിർദേശിച്ച സെക്ഷൻ 12, 13 എന്നിവ ഒഴിവാക്കിയതായി കേന്ദ്രം വിശദീകരിച്ചു. മുൻപ് സെക്ഷൻ 13 പ്രകാരം, ഗുരുതര ദുരന്തങ്ങളിൽ വായ്പ തിരിച്ചടവിൽ ഇളവോ പുതിയ വായ്പകൾക്ക് ആനുകൂല്യമോ ശുപാർശ ചെയ്യാൻ എൻഡിഎംഎയ്ക്ക് അധികാരമുണ്ടായിരുന്നു.

ദുരന്തനിവാരണ നിയമത്തിലെ വ്യവസ്ഥകൾ ഉപയോഗിച്ച് ദുരിതാശ്വാസം സുഗമമാക്കണമെന്ന് കോടതി നേരത്തെ ആവശ്യപ്പെട്ടിരുന്നു. വയനാട്ടിലെ ദുരന്തബാധിതരുടെ പുനരധിവാസവുമായി ബന്ധപ്പെട്ട സ്വമേധയാ ഹരജി ജൂൺ 13-ന് ഹൈക്കോടതി പരിഗണിക്കും.