കൊച്ചി: മുനമ്പം വഖ്ഫ് ഭൂമി കേസിൽ മുൻകാല രേഖകള്‍ വിളിച്ചുവരുത്താനാവില്ലെന്ന കോഴിക്കോട് വഖ്ഫ് ട്രൈബ്യൂണല്‍ ഉത്തരവ് ഹൈക്കോടതി റദ്ദാക്കി. ട്രൈബ്യൂണല്‍ ഉത്തരവ് നിയമപരമായി നിലനില്‍ക്കില്ലെന്ന് ജസ്റ്റിസ് അമിത് റാവൽ അധ്യക്ഷനായ ഡിവിഷന്‍ ബെഞ്ച് വ്യക്തമാക്കി.

പറവൂര്‍ സബ് കോടതിയിലെ രേഖകള്‍ വിളിച്ചുവരുത്തണമെന്ന വഖ്ഫ് ബോര്‍ഡിന്റെ ആവശ്യം വീണ്ടും പരിഗണിച്ച് തീരുമാനമെടുക്കാനും ട്രൈബ്യൂണലിനോട്   നിർദേശിച്ചു. വഖ്ഫ് ബോര്‍ഡിന്റെ അപ്പീല്‍ തീര്‍പ്പാക്കിയാണ് ഹൈക്കോടതി നിർദേശം. മുനമ്പം വഖ്ഫ് ഭൂമി  കേസില്‍  വഖ്ഫ് ട്രൈബ്യൂനൽ അന്തിമ ഉത്തരവിറക്കുന്നത് വിലക്കി  ഹൈക്കോടതി മുൻപ് ഇടക്കാല ഉത്തരവിട്ടിരുന്നു.

ഇതിനിടെ മുനമ്പം വഖ്ഫ് വിഷയവുമായി ബന്ധപ്പെട്ട്, ട്രൈബ്യൂണലിന് മുമ്പാകെ പറവൂർ സബ് കോടതിയിലെ മുൻ ഉത്തരവിന്റെ രേഖകൾ വിളിച്ചുവരുത്തണം എന്നാവശ്യപ്പെട്ട് വഖ്ഫ് ബോർഡ് അപേക്ഷ നൽകി. എന്നാൽ,  ബോർഡിന്റെ ആവശ്യം ട്രൈബ്യൂണൽ നിരസിച്ചു. തുടർന്നാണ് ഇതിനെതിരേ വഖ്ഫ് ബോർഡ് ഹൈക്കോടതിയെ സമീപിച്ചത്.