ന്യൂഡൽഹി: യാത്രക്കാർക്ക് ആശ്വാസമായി ട്രെയിൻ പുറപ്പെടുന്നതിന് 24 മണിക്കൂർ മുമ്പ് പാസഞ്ചർ ചാർട്ട് പുറത്തിറക്കാനുള്ള സാധ്യത റെയിൽവേ മന്ത്രാലയം പരിശോധിക്കുന്നു. നിലവിൽ ടിക്കറ്റുകൾ ട്രെയിൻ പുറപ്പെടുന്നതിന് 2 മുതൽ 4 മണിക്കൂർ മുമ്പ് മാത്രമേ പുറത്തിറക്കാറുള്ളു. ഇത് അവസാന നിമിഷം വരെ യാത്രക്കാരെ അനിശ്ചിതത്വത്തിലാക്കുന്ന സാഹചര്യത്തിലാണ് പുതിയ നടപടിയ്ക്ക് റെയിൽവേ ഒരുങ്ങുന്നത്. പദ്ധതിയുടെ പരീക്ഷണം രാജസ്ഥാനിൽ ആരംഭിച്ചിട്ടുണ്ട്. ഇത് വ്യജയമായാൽ വർഷങ്ങളായുള്ള പ്രശ്‌നത്തിനാണ് പരിഹാരമാകുന്നത്.

നിലവിൽ ടിക്കറ്റുകളുടെ സ്ഥിരീകരണം ലഭിക്കാൻ യാത്രക്കാർക്ക് പുറപ്പെടുന്ന ദിവസം വരെ കാത്തിരിക്കേണ്ടി വരാറുണ്ട്. പ്രത്യേകിച്ച് വെയ്റ്റിംഗ് ലിസ്റ്റിലുള്ള യാത്രക്കാർക്ക് ആണ് ഈ അനിശ്ചിതത്വം ഏറെ ബുദ്ധിമുട്ടാകാറുള്ളത്. അന്തിമ പട്ടിക പുറത്തുവരുന്നതുവരെ ടിക്കറ്റ് നിലയെക്കുറിച്ച് ഒരു ധാരണയും ലഭിക്കാറില്ല എന്നതിനാൽ യാത്ര പോകണോ വേണ്ടയോ ബദൽ മാർഗം തേടാനോ എന്നൊന്നും അറിയാത്ത അവസ്ഥ ഉണ്ടാകാറുണ്ട്. ദൂരെ സ്ഥലങ്ങളിൽ നിന്ന് ട്രെയിനുകൾ പിടിക്കാൻ വരുന്നവർക്ക് സ്റ്റേഷനിൽ എത്തുമ്പോൾ മാത്രമാകും ക്യാൻസൽ ആയ കാര്യമോ മറ്റോ അറിയുക. വർഷങ്ങളായുള്ള ഈ പ്രശ്നം പരിഹരിക്കാനാണ് മന്ത്രാലയം ശ്രമിക്കുന്നത്. 

ALSO READ: ആധാറും ഒടിപിയും നിർബന്ധം; ഇല്ലെങ്കിൽ തത്കാൽ ടിക്കറ്റ് റിസർവേഷൻ ബുക്കിംഗ് നടക്കില്ല

റിപ്പോർട്ടുകൾ പ്രകാരം, ജൂൺ 6 മുതൽ രാജസ്ഥാനിലെ ബിക്കാനീർ ഡിവിഷനിൽ ഈ സംവിധാനത്തിന്റെ പരീക്ഷണങ്ങൾ നടപ്പിലാക്കിത്തുടങ്ങി. ഫലങ്ങളുടെ അടിസ്ഥാനത്തിൽ ഇന്ത്യയിലുടനീളം ഈ സംവിധാനം നടപ്പിലാക്കാനാണ് റെയിൽവേ മന്ത്രാലയത്തിന്റെ ശ്രമം. മാറിക്കൊണ്ടിരിക്കുന്ന ബുക്കിംഗുകളും റദ്ദാക്കലുകളും കൈകാര്യം ചെയ്യാൻ സിസ്റ്റത്തിന് കഴിയുമോ എന്നും റെയിൽവേ സെർവറുകൾക്ക് തത്സമയം അപ്‌ഡേറ്റ് ചെയ്യാൻ കഴിയുമോ എന്നും ഈ പരീക്ഷണങ്ങൾ പരിശോധിക്കും. 

നിലവിൽ, ട്രെയിൻ പുറപ്പെടുന്നതിന് 4 മണിക്കൂർ മുമ്പാണ് ആദ്യത്തെ പാസഞ്ചർ ചാർട്ട് തയ്യാറാക്കുന്നത്. അവസാന നിമിഷത്തിലെ മാറ്റങ്ങൾ ഉൾപ്പെടുത്തി രണ്ടാമത്തേത് പലപ്പോഴും പുറപ്പെടുന്നതിന് 30 മിനിറ്റ് മുമ്പാണ് തയ്യാറാക്കുന്നത്. പുതിയ സംവിധാനം 24 മണിക്കൂർ മുമ്പ് ഒരു ചാർട്ട് സൃഷ്ടിക്കാനും അതിനുശേഷം ഏതെങ്കിലും റദ്ദാക്കലുകൾക്കോ ​​പുതിയ ബുക്കിംഗുകൾക്കോ ​​തത്സമയ അപ്‌ഡേറ്റുകൾ നൽകാനും പദ്ധതിയിടുന്നു.

തത്കാൽ ബുക്കിംഗിനെ ബാധിക്കുമോ? 

തത്കാൽ ടിക്കറ്റ് ബുക്കിംഗിനെ ഈ പുതിയ നിയമം ബാധിക്കില്ലെന്ന് റെയിൽവേ വ്യക്തമാക്കിയിട്ടുണ്ട്. ട്രെയിനുകൾ പുറപ്പെടുന്നതിന് 48 മണിക്കൂർ മുമ്പ് തത്കാൽ ടിക്കറ്റുകൾ ബുക്ക് ചെയ്യുന്നതിനാൽ, അവയുടെ സ്ഥിരീകരണ പ്രക്രിയ മുമ്പത്തെപ്പോലെ തന്നെയായിരിക്കും.

അതേസമയം, സ്ഥിരീകരിച്ച ടിക്കറ്റുള്ള യാത്രക്കാരുടെ രണ്ടാമത്തെയോ മൂന്നാമത്തെയോ പട്ടിക റെയിൽ‌വേ പുറത്തിറക്കുന്നതിനെക്കുറിച്ച് ഇപ്പോൾ വ്യക്തതയില്ല.