ന്യൂഡൽഹി: സംഘർഷം രൂക്ഷമായതോടെ ഇറാനിലെ ഇന്ത്യക്കാരെ ഒഴിപ്പിച്ച് തുടങ്ങി. ഇതിന്റെ ആദ്യഘട്ടമായി 110 ഇന്ത്യൻ വിദ്യാർഥികളെ ഇറാനിൽ നിന്ന് കരമാർഗം അർമേനിയയിൽ എത്തിച്ചു. ഇവരെ ഇന്ന് വിമാന മാർഗം ഡൽഹിയിലെത്തിക്കും. ഉർമിയ മെഡിക്കൽ യൂനിവേഴ്‌സിറ്റിയിൽ പഠിക്കുന്ന വിദ്യാർഥികളെയാണ് സുരക്ഷിതമായി അതിർത്തി കടത്തി അർമേനിയയിലേക്ക് മാറ്റിയത്. 110 ഇന്ത്യൻ വിദ്യാർഥികളിൽ 90 പേർ കശ്മിരിൽ നിന്നുള്ളവരാണ്. തെഹ്റാനിൽ കുടങ്ങിയിരുന്ന ഇന്ത്യൻ പൗരൻമരെ എംബസി ഇടപെട്ട് മറ്റ് സ്ഥലങ്ങളിലേക്ക് മാറ്റിയിട്ടുണ്ട്.

സുരക്ഷാ കാരണങ്ങൾ കണക്കിലെടുത്ത് എംബസി നടത്തിയ ക്രമീകരണങ്ങളിലൂടെ, തെഹ്‌റാനിലെ ഇന്ത്യൻ വിദ്യാർഥികളെ നഗരത്തിന് പുറത്തേക്ക് മാറ്റിയെന്ന് വിദേശകാര്യ മന്ത്രാലയം പ്രസ്താവനയിൽ പറഞ്ഞു. അർമേനിയ അതിർത്തി വഴി ഇറാന് പുറത്തേക്ക് കടക്കാനുള്ള സൗകര്യം ഒരുക്കിയതായും ഇന്ത്യൻ പൗരൻമാർക്ക് സാധ്യമായ എല്ലാ സഹായങ്ങളും നൽകുന്നതിനായും വിദേശകാര്യ മന്ത്രാലയം അറിയിച്ചു. കുടുങ്ങി കിടക്കുന്ന ഇന്ത്യക്കാർക്ക് ബന്ധപ്പെടാൻ വിദേശകാര്യ മന്ത്രാലയവും തെഹ്റാനിലെ ഇന്ത്യൻ എംബിസിയും പ്രത്യേകം കൺട്രോൾ റൂമുകൾ ആരംഭിച്ചിട്ടുണ്ട്.

ഇറാനിലുള്ള ഇന്ത്യക്കാരിൽ ഭൂരിഭാഗവും വിദ്യാർഥികളാണ്. കഴിഞ്ഞദിവസം തെഹ്‌റാനിലുണ്ടായ ആക്രമണത്തിൽ രണ്ട് ഇന്ത്യൻ വിദ്യാർഥികൾക്ക് പരുക്കേറ്റിരുന്നു. ഇസ്റാഈലിൽ നിന്ന് മടങ്ങാൻ ആഗ്രഹിക്കുന്ന ഇന്ത്യക്കാരെയും തിരികെ എത്തിക്കാനുള്ള നടപടികൾ വിദേശകാര്യ മന്ത്രാലയം ആലോചിക്കുന്നുണ്ട്. ടെൽ അവീവിൽ നിന്ന് ജോർദാൻ, ഈജിപ്ത് അതിർത്തി വഴി പുറത്തെത്തിക്കാനാണ് ശ്രമിക്കുന്നത്. 

India begins evacuation operations from Iran amid rising tensions. A group of 110 Indian nationals is expected to land in Delhi today.