നിലമ്പൂർ: ഉപതെരഞ്ഞെടുപ്പിൽ പോളിംഗ് പുരോഗമിക്കുന്നതിനിടെ സ്ഥാനാർഥികൾ തമ്മിലുള്ള പോരും പുരോഗമിക്കുന്നു. വോട്ട് ചെയ്യാനെത്തിയതിനിടെ പരസ്പരം കണ്ടുമുട്ടിയ ആര്യാടൻ ഷൗക്കത്തിനെ അകറ്റി നിർത്തായാണ് അൻവർ തന്റെ എതിർപ്പ് അറിയിച്ചത്. മാധ്യമങ്ങൾക്ക് മുൻപിൽ വെച്ചാണ് തന്നെ കെട്ടിപ്പിടിക്കരുതെന്ന് ഷൗക്കത്തിനോട്  അൻവർ പറഞ്ഞത്. പോളിംഗ് ബൂത്തായ നിലമ്പൂർ മാനവേദൻ സ്‌കൂളിലാണ് നാടകീയ രംഗങ്ങൾ അരങ്ങേറിയത്.

മാനവേദൻ സ്‌കൂളിൽ വോട്ട് ചെയ്യാനെത്തിയതായിരുന്നു അൻവറും ഷൗക്കത്തും. അൻവർ ഉണ്ടെന്ന് അറിഞ്ഞ് അവിടേക്ക് നടന്നെത്തിയ ഷൗക്കത്തിനോട് കെട്ടിപിടിക്കരുതെന്ന് അൻവർ പരസ്യമായി പറയുകയായിരുന്നു. പിന്നാലെ  കൈ കൊടുത്ത ശേഷം കൂടുതൽ സൗഹൃദ സംഭാഷണത്തിനും അൻവർ തയ്യാറായില്ല. ഇതോടെ കൈ കൊടുത്ത് ആര്യാടൻ ഷൗക്കത്ത് നടന്നകന്നു.

ഇതിന് പിന്നാലെ മാധ്യമങ്ങളെ കണ്ട അൻവർ, ഷൗക്കത്തിന്റേത് ഒരു ധൃതരാഷ്ട്രാലിംഗനമായതുകൊണ്ടാണ് വേണ്ടെന്ന് പറഞ്ഞതെന്ന് പറഞ്ഞു.'ഷൗക്കത്ത് ഒരു കെട്ടിപ്പിടിക്കുന്ന ആളാണ്. അത് ഒരു ധൃതരാഷ്ട്രാലിംഗനമാണ്. മനസ്സിലായില്ലേ? എന്നും അൻവർ ചോദിച്ചു. മനുഷ്യൻമാർ തമ്മിൽ കാണുമ്പോൾ കൈകൊടുക്കുമല്ലോ. ഞാൻ അതുകൊടുത്തു. പുള്ളി സിനിമാസ്റ്റൈലിൽ ആണ്. എനിക്ക് അഭിനയം വല്യ പരിചയം ഇല്ല. പച്ചമനുഷ്യൻമാർക്കൊപ്പം നടക്കുന്നവരാണ് ഞാൻ. രാവിലെ രണ്ട് അഭിനേതാക്കൾ തമ്മിൽ കെട്ടിപ്പിടിച്ചത് കണ്ടില്ലേ? എന്നും അൻവർ ചോദിച്ചു. സ്ഥാനാർഥികൾ തമ്മിൽ സൗഹൃദം വേണം. പക്ഷെ അത് ആത്മാർത്ഥമായിരിക്കണം. പിന്നിൽ കൂടി പാര വെക്കരുത്.' അൻവർ പറഞ്ഞു

ആർഎസ്എസുമായി ബന്ധമില്ലെന്ന മുഖ്യമന്ത്രി പിണറായി വിജയന്റെ പ്രസ്താവന 2025ലെ ഏറ്റവും വലിയ തമാശയാണെന്നും അൻവർ പറഞ്ഞു. ഇന്നലെ പിണറായി വിജയൻ അത്താഴം കഴിച്ചത് പോലും കേന്ദ്രത്തിന്റെ ആളുകൾക്കൊപ്പമായിരിക്കാം. സ്വന്തം മകളെ രക്ഷപ്പെടുത്താൻ വേണ്ടി പ്രസ്ഥാനത്തെ ഒറ്റുകൊടുത്ത ആളാണ് പിണറായിയെന്നും അൻവർ ആവർത്തിച്ചു.