ന്യൂഡൽഹി: പഹൽഗാം ഭീകരാക്രമണത്തിന് പിന്നാലെ കഴിഞ്ഞ മാസം ഇന്ത്യയും പാകിസ്ഥാനും തമ്മിലുണ്ടായ യുദ്ധം അവസാനിപ്പിക്കാൻ ഇടപെട്ടത് താൻ തന്നെയാണെന്ന് യുഎസ് പ്രസിഡന്റ് ഡൊണാൾഡ് ട്രംപ് ആവർത്തച്ചതിൽ പ്രധാനമന്ത്രി നരേന്ദ്രമോദിക്കെതിരെ രൂക്ഷവിമർശനവുമായി കോൺഗ്രസ് നേതാവ് പി ചിദംബരം. 'യുദ്ധം അവസാനിപ്പിക്കാൻ മോദിയും പാകിസ്ഥാൻ സൈനിക മേധാവി അസിം മുനീറും സഹായകരമായിരുന്നു' എന്ന് ട്രംപ് താരതമ്യം ചെയ്തതിനെക്കുറിച്ചും ചിദംബരം ചോദ്യമുന്നയിച്ചു. പാകിസ്ഥാൻ സൈനിക മേധാവി അസിം മുനീറുമായി നടത്തിയ ഉച്ചഭക്ഷണ കൂടിക്കാഴ്ചയ്ക്ക് പിന്നാലെയായിരുന്നു ട്രംപിന്റെ പരാമർശം ഉണ്ടായത്.

'ആരാണ് യുദ്ധം നിർത്തിയത്' എന്ന കഥ കൂടുതൽ കൗതുകകരവുമായിക്കൊണ്ടിരിക്കുകയാണ്. ഇന്ത്യയും പാകിസ്ഥാനും തമ്മിലുള്ള യുദ്ധം താൻ മധ്യസ്ഥത വഹിച്ച് നിർത്തിയെന്ന് ട്രംപ് ആദ്യമായി അവകാശപ്പെട്ട് 39 ദിവസങ്ങൾക്ക് ശേഷം മാത്രമാണ് മോദി ട്രംപിനോട് 'ഇന്ത്യ മധ്യസ്ഥത സ്വീകരിക്കുന്നില്ല, ഒരിക്കലും സ്വീകരിക്കുകയുമില്ല, എന്ന് ഒരു ടെലിഫോൺ കോളിൽ പറഞ്ഞത് എന്നും ചിദംബരം എക്‌സിലെ ഒരു പോസ്റ്റിൽ പറഞ്ഞു.

കഴിഞ്ഞ ദിവസം ട്രംപുമായുള്ള ഫോൺ സംഭാഷണത്തിനിടെ മോദി, ഇന്ത്യ ഒരിക്കലും മൂന്നാം കക്ഷി മധ്യസ്ഥത സ്വീകരിച്ചിട്ടില്ലെന്നും ഭാവിയിൽ അത്തരം മധ്യസ്ഥത സ്വീകരിക്കില്ലെന്നും ആവർത്തിച്ചതായി വിദേശകാര്യ സെക്രട്ടറി വിക്രം മിശ്ര ഒരു വീഡിയോ സന്ദേശത്തിൽ പറഞ്ഞിരുന്നു. എന്നാൽ, ബുധനാഴ്ച പ്രധാനമന്ത്രി മോദിയുമായുള്ള ഫോൺ സംഭാഷണത്തിന് മണിക്കൂറുകൾക്ക് ശേഷം, ട്രംപ് പാകിസ്ഥാൻ സൈനിക മേധാവിയെ വൈറ്റ് ഹൗസിലേക്ക് ക്ഷണിക്കുകയും ഇന്ത്യയും പാകിസ്ഥാനും തമ്മിലുള്ള സംഘർഷം രൂക്ഷമാകുന്നത് തടഞ്ഞതിന് ജനറൽ മുനീറിനെ പ്രശംസിക്കുകയും ചെയ്തു.

ഏപ്രിൽ 22 ലെ പഹൽഗാം ഭീകരാക്രമണത്തെത്തുടർന്ന് നാല് ദിവസത്തെ സൈനിക നടപടികൾക്ക് ശേഷം ഇന്ത്യ-പാകിസ്ഥാൻ വെടിനിർത്തൽ ധാരണയിൽ മധ്യസ്ഥത വഹിച്ചതിൽ താൻ പ്രധാന പങ്കുവഹിച്ചുവെന്ന ട്രംപിന്റെ പ്രസ്താവന ഉണ്ടായത്. ട്രംപിന്റെ വാദത്തെ ഇന്ത്യ എതിർക്കുകയും ഇന്ത്യയുടെയും പാകിസ്ഥാന്റെയും ഡയറക്ടർ ജനറൽസ് ഓഫ് മിലിട്ടറി ഓപ്പറേഷൻസ് (ഡിജിഎംഒ) തമ്മിലുള്ള ചർച്ചകൾക്ക് ശേഷമാണ് ഇരു രാജ്യങ്ങളുടെയും 'ധാരണ'യിലെത്തിയതെന്ന് പറയുകയും ചെയ്തു.

അതേസമയം, ട്രംപിന്റെ ആവർത്തിച്ചുള്ള അവകാശവാദം നിരസിക്കാൻ 39 ദിവസമെടുത്തത് എന്തുകൊണ്ടാണെന്ന് ചിദംബരം ചോദിച്ചു, ട്രംപ് പലതവണ ആവർത്തിച്ചപ്പോഴും എന്തുകൊണ്ട് നിശബ്ദനായി. വൈകിയ പ്രസ്താവന മോദി നേരിട്ട് ഇന്ത്യൻ ജനതയെയോ ഇന്ത്യൻ പാർലമെന്റിനെയോ അറിയിക്കാത്തത് എന്തുകൊണ്ടാണെന്നും അദ്ദേഹം ചോദിച്ചു.