ദുബൈ: റിവാഖ് ഔഷ എജ്യുക്കേഷനല്‍ ഇന്‍സ്റ്റിറ്റ്യൂട്ട് യു.കെ ആസ്ഥാനമായി പ്രവര്‍ത്തിക്കുന്ന നെബോഷ് സഹകരണത്തോടെ യു.എ.ഇയിലെ 10,000 തൊഴിലാളികള്‍ക്ക് സൗജന്യ സുരക്ഷിതത്വ പരിശീലനം നല്‍കുന്ന പദ്ധതിക്ക് തുടക്കം കുറിച്ചു. ഈ വര്‍ഷം 3,000 തൊഴിലാളികള്‍ക്ക് പരിശീലനം നല്‍കും. മൂന്ന് വര്‍ഷം കൊണ്ട് പദ്ധതി പൂര്‍ത്തിയാക്കാനാണ് ലക്ഷ്യമിടുന്നതെന്ന് റിവാഖ് ഡയരക്ടര്‍ ഡോ. ആമിന അജ്മല്‍, മാനേജര്‍ അജ്മല്‍ ഷംസുദ്ദീന്‍ എന്നിവര്‍ അറിയിച്ചു.

നോളജ് ആന്‍ഡ് ഹ്യൂമന്‍ ഡെവലപ്‌മെന്റ് അതോറിറ്റി (കെ.എച്ച്.ഡി.എ), ദുബൈ ജനറല്‍ ഡയരക്ടറേറ്റ് ഓഫ് ഐഡന്റിറ്റി ആന്‍ഡ് ഫോറീനേഴ്സ് അഫയേഴ്സ് (ജി.ഡി.ആര്‍.എഫ്.എ.ഡി) എന്നിവയുടെ പിന്തുണയോടെയാണ് പരിശീലനം നല്‍കുന്നത്.

റിവാഖ് ഓഡിറ്റോറിയത്തില്‍ നടന്ന ചടങ്ങില്‍, റിവാഖ് എഡ്യുക്കേഷണല്‍ ഇന്‍സ്റ്റിറ്റ്യൂട്ടിന്റെ ചെയര്‍പേഴ്‌സണും യു.എ.ഇയിലെ ആദ്യ സ്വദേശി വനിതാ പിഎച്ച്.ഡി ബിരുദ ധാരിയുമായ ഡോ. മൗസ ഗുബാഷ് അല്‍ മുഹൈറി പദ്ധതി ഉദ്ഘാടനം ചെയ്തു. കെ.എച്ച്.ഡി.എ, ജി.ഡി.ആര്‍.എഫ്.എ.ഡി പ്രതിനിധികള്‍ പങ്കെടുത്തു.

തൊഴില്‍ സുരക്ഷാ മേഖലയിലെ പ്രമുഖ അവാര്‍ഡിംഗ് സ്ഥാപനമായ നെബോഷ് യു.കെയ്ക്ക് പുറത്തു നടത്തുന്ന ആദ്യ കോര്‍പറേറ്റ് സോഷ്യല്‍ റെസ്‌പോണ്‍സിബിലിറ്റി (സി.എസ്.ആര്‍) പദ്ധതിയാണിത്. ഉയര്‍ന്ന അപകട സാധ്യതയുള്ള മേഖലകളില്‍ ജോലി ചെയ്യുന്ന തൊഴിലാളികളില്‍ സുരക്ഷാ ബോധവും അടിയന്തര സാഹചര്യങ്ങള്‍ കൈകാര്യം ചെയ്യാനുള്ള കഴിവും വര്‍ധിപ്പിക്കുക എന്നതാണ് പദ്ധതിയുടെ പ്രധാന ലക്ഷ്യം. പ്രഥമ ശുശ്രൂഷ, സി.പി.ആര്‍, വൈദ്യതി സുരക്ഷ, അഗ്‌നി രക്ഷ എന്നീ മേഖലകളിലാണ് പരിശീലനം നല്‍കുന്നത്. വിവിധ ഭാഷകളില്‍ ക്ലാസുകള്‍ നല്‍കും. പരിശീലനം പൂര്‍ത്തിയാക്കിയവര്‍ക്ക് നെബോഷ് അംഗീകൃത സര്‍ട്ടിഫിക്കറ്റുകളും പഠന സാമഗ്രികളും സൗജന്യമായി ലഭിക്കും. ഇത്തരം പരിശീലന പദ്ധതി ഭാവിയില്‍ ഇന്ത്യയിലും നടപ്പാക്കുന്ന കാര്യം ആലോചിക്കുമെന്നും അധികൃതര്‍ അറിയിച്ചു.
ഡോ. ആമിന അജ്മല്‍, അജ്മല്‍ ഷംസുദ്ദീന്‍ എന്നിവരെക്കൂടാതെ, മാനേജര്‍ നാദിര്‍ ഖമീസി, ലേണിങ് സ്ട്രാറ്റജിസ്റ്റ് സിദ്ദീഖ് ഹില്‍സ്, സാമൂഹിക പ്രവര്‍ത്തകന്‍ അല്‍നിഷാജ് ഷാഹുല്‍ എന്നിവരും വാര്‍ത്താസമ്മേളനത്തില്‍ പങ്കെടുത്തു. കഴിഞ്ഞ 33 വര്‍ഷങ്ങളായി സാമൂഹിക സേവന രംഗത്തും വിദ്യാഭ്യാസ മേഖലയിലും സജീവമായി പ്രവര്‍ത്തിക്കുന്ന റിവാഖ് ഇന്‍സ്റ്റിറ്റ്യൂട്ട് ഹെല്‍ത്ത് കെയര്‍, ഹെല്‍ത്ത് ആന്‍ഡ് സേഫ്റ്റി, എഞ്ചിനിയറിംഗ്, മാനേജ്മെന്റ്, ഭാഷാ പരിശീലനം തുടങ്ങി ഇരുനൂറോളം കോഴ്സുകള്‍ നടത്തുന്നുണ്ട്. യു.എ.ഇയിലെ കമ്പനികളിലെ തൊഴിലാളികള്‍ക്ക് സൗജന്യ പരിശീലനവും സര്‍ട്ടിഫിക്കേഷനും ലഭ്യമാക്കുന്നതിനായി സ്ഥാപനങ്ങളുടെ അധികൃതര്‍ക്കും എച്ച്.ആര്‍ പ്രതിനിധികള്‍ക്കും ബന്ധപ്പെടാം: [email protected]

Rewaq Ousha Educational Institute, in collaboration with UK-based Nebosh, has launched a project to provide free safety training to 10,000 workers in the UAE.