കൂത്തുപറമ്പ്: അസ്നയെ ഓർമയില്ലേ. കണ്ണൂർ ജില്ലയിലെ ബോംബ് രാഷ്ട്രീയത്തിന്റെ ജീവിക്കുന്ന ഇര. രാഷ്ട്രീയ വൈരം തീർത്ത ജീവിതത്തിലെ നൊമ്പര പ്രതിസന്ധികൾ ഒന്നൊന്നായി തരണം ചെയ്ത് ഡോക്ടർ അസ്നയായി മാറിയ അവർ ഇപ്പോൾ വിവാഹ ജീവിതത്തിലേക്ക് കടക്കുകയാണ്. ജൂലൈ അഞ്ചിന് വീട്ടുമുറ്റത്ത് നടക്കുന്ന ചടങ്ങിൽ അസ്നയെ ആലക്കോട് അരങ്ങം വാഴയിൽ വീട്ടിൽ നിഖിൽ താലി കെട്ടും. ഇനി അസ്നയുട ജീവിതത്തിൽ താങ്ങും തണലുമായി നിഖിൽ ഉണ്ടാകും. ഷാർജയിൽ എൻജിനീയർ ആയി ജോലി ചെയ്യുകയാണ് നിഖിൽ.

2000 സെപ്റ്റംബർ 27ന് നടന്ന തദ്ദേശ തെരഞ്ഞെടുപ്പിനിടെയുണ്ടായ രാഷ്ട്രീയ സംഘർഷത്തിലാണ് അസ്നക്ക് ബോംബേറിൽ ഗുരുതരമായി പരുക്കേൽക്കുന്നത്. പ്രദേശത്തെ സജീവ കോൺഗ്രസ് പ്രവർത്തകനായിരുന്നു അസ്നയുടെ പിതാവ്. ആർ.എസ്.എസ് പ്രവർത്തകർ നടത്തിയ ബോംബ് ആക്രമണത്തിലാണ് അസ്‌നക്ക് ഗുരുതരമായി പരുക്കേറ്റത്.  
അന്ന് മൂന്ന് വയസ് മാത്രം പ്രായമുണ്ടായിരുന്ന അസ്ന സംഭവസമയത്ത് പോളിങ് സ്റ്റേഷനായ പൂവത്തൂർ എൽ.പി സ്‌കൂളിന് സമീപത്തെ വീട്ടു മുറ്റത്ത് കളിക്കുകയായിരുന്നു. അസ്നയെ കൂടാതെ അമ്മ ശാന്തയ്ക്കും സഹോദരൻ ആനന്ദിനും പരുക്കേറ്റു. അസ്നക്ക് വലതു കാലിനായിരുന്നു ഗുരുതരമായി പരുക്കേറ്റത്. ചികിത്സക്കിടെ വലതുകാൽ മുട്ടിനു താഴെ മുറിച്ചു മാറ്റേണ്ടി വന്നു.  പിന്നീട് ജീവിതം കൃത്രിമക്കാലിലായി.

ചെറുവാഞ്ചേരിയുടെ നൊമ്പരമായി മാറിയ അസ്‌ന വിധിക്ക് മുൻപിൽ തളരാതെ കീഴടങ്ങാതെ മുന്നോട്ടു നടന്നപ്പോൾ തടസങ്ങളും വെല്ലുവിളികളും വഴിമാറി. ഇന്നിപ്പോൾ അവരുടെയൊക്കെ അഭിമാനമായ ഡോക്ടർ അസ്നയായി മാറി. 2013ൽ കോഴിക്കോട് മെഡിക്കൽ കോളജിൽ നിന്ന് എം.ബി.ബി.എസ് ബിരുദം നേടിയ അസ്ന ഇപ്പോൾ വടകരയിലെ ഒരു ക്ലിനിക്കിൽ ആണ് ജോലി ചെയ്യുന്നത്. അതിനിടയിൽ സ്വന്തം നാട്ടിലെ ആരോഗ്യ കേന്ദ്രത്തിലും സേവനം ചെയ്തു. ജൂലൈ അഞ്ചിന് അവർ പുതുജീവിതത്തിലേക്ക് കാലെടുത്ത് വയ്ക്കുമ്പോൾ നാടൊന്നടങ്കം പൂവത്തൂരിലെ തരശിപറമ്പത്ത് വീട്ടു മുറ്റത്തെത്തും. അവരെ ആശിർവദിക്കാൻ, കൈപിടിച്ച് പുതിയ ജീവിതത്തിലേക്ക് നടത്താൻ.