തിരുനാവായ: റാങ്ക് ലിസ്റ്റുകളെ അവഗണിച്ച് ഹൈസ്കൂൾ ഇംഗ്ലിഷ് അധ്യാപക തസ്തികകളിൽ താൽക്കാലിക നിയമനം നടത്തുന്നതിൽ പ്രതിഷേധമുയരുന്നു. പി.എസ്‌.സി റാങ്ക് ലിസ്റ്റ് നിലവിലുള്ളപ്പോൾ താൽക്കാലിക നിയമനം പാടില്ലെന്ന സർക്കാർ നിർദേശമാണ് ഹൈസ്കൂൾ ഇംഗ്ലിഷ് അധ്യാപക തസ്തികയിൽ സർക്കാർതന്നെ അട്ടിമറിച്ചിരിക്കുന്നത്.
മറ്റു വിഷയങ്ങൾ പഠിപ്പിക്കുന്ന അധ്യാപകരെ ഇംഗ്ലിഷ്  പഠിപ്പിക്കാൻ നിയോഗിക്കാതെ ഇംഗ്ലിഷ് അധ്യാപകരെത്തന്നെ നിയമിക്കണമെന്ന ഹൈക്കോടതി വിധിപോലും വിദ്യാഭ്യാസ വകുപ്പ് നടപ്പാക്കുന്നില്ല. ഇതിനിടയിലാണ്  ഹൈസ്കൂൾ ഇംഗ്ലിഷ് റാങ്ക് ലിസ്റ്റ് നിലവിലിരിക്കെയുള്ള താൽക്കാലിക നിയമനങ്ങൾ. ഇതെല്ലാം ലിസ്റ്റിലുള്ള ഉദ്യോഗാർഥികളുടെ  ആശങ്ക വർധിപ്പിക്കുകയാണ്.സംസ്ഥാനത്തെ ഭൂരിഭാഗം സർക്കാർ ഹൈസ്‌കൂളുകളിലും അധ്യയനവർഷം തുടങ്ങിയത് സ്ഥിരം ഇംഗ്ലിഷ് അധ്യാപകരില്ലാതെയാണ്. കൂടുതൽ ഡിവിഷനുള്ള സ്കൂളുകളിൽ പീരിയഡ് അടിസ്ഥാനത്തിൽ ഇംഗ്ലിഷിനു തസ്‌തിക അനുവദിച്ചിട്ടും റാങ്ക് ലിസ്റ്റിൽനിന്ന് നിയമനം നടത്താതെ താൽക്കാലിക നിയമനം തുടരുകയാണ്.

എല്ലാ ജില്ലയിലും ഹൈസ്കൂൾ ഇംഗ്ലിഷ് റാങ്ക് ലിസ്റ്റ് നിലവിലുണ്ട്.  2023ൽ നിലവിൽ വന്ന ലിസ്റ്റുകളുടെ കാലാവധി 2026ൽ അവസാനിക്കും. 1400 ലേറെ പേർ ഉൾപ്പെട്ട റാങ്ക് ലിസ്‌റ്റുകളിൽനിന്ന് ഇതുവരെ നടന്നത് 185 നിയമന ശുപാർശ മാത്രമാണ്. കൂടുതൽ  നടന്ന മലപ്പുറം ജില്ലയിൽ 45 നിയമന ശുപാർശയാണ്. കുറവ് നടന്ന പത്തനംതിട്ട, കോട്ടയം, ഇടുക്കി ജില്ലകളിൽ ഒന്ന് വീതവുമാണ്. എറണാകുളം ജില്ലയിൽ ഒരാൾക്കുപോലും നിയമന ശുപാർശ നൽകിയിട്ടില്ല.

ഇംഗ്ലിഷിൽ ബിരുദവും ബി.എഡുമാണ് എച്ച്.എസ്‌.ടി ഇംഗ്ലിഷ് തസ്തികയുടെ അടിസ്ഥാന യോഗ്യത. റാങ്ക് ലിസ്റ്റിലുള്ള യോഗ്യരായവരെ പരിഗണിക്കാതെ, മറ്റു വിഷയങ്ങൾ പഠിപ്പിക്കുന്ന അധ്യാപകരെ ഇംഗ്ലിഷ് പഠിപ്പിക്കാൻ നിയോഗിക്കുകയായിരുന്നു. ഇതിനെതിരേ ഉദ്യോഗാർഥികൾ ഹൈക്കോടതിയിൽനിന്ന് അനുകൂല ഉത്തരവ് നേടിയെങ്കിലും താൽക്കാലിക നിയമനം തുടരുകയാണ്.മറ്റു വിഷയങ്ങൾ പഠിപ്പിക്കാൻ അതതു വിഷയങ്ങളിൽ ബിരുദം നേടിയ സ്ഥിരം അധ്യാപകരെ നിയമിക്കുമ്പോൾ ഇംഗ്ലിഷിനോടു മാത്രം ഇത്തരമൊരു നയം തുടരുന്നതിലാണ് പ്രതിഷേധം. ഭാഷാവിഷയമെന്ന പരിഗണന നൽകി ഇംഗ്ലിഷിന് സ്ഥിരം അധ്യാപകരെ നിയമിക്കണമെന്നാണ് ഉദ്യോഗാർഥികളുടെ ആവശ്യം.